¶ 1 BEA i he fanogo ae tu‘i ko Alati, koe Kenani, aia nae nofo i he botu toga, kuo ha‘u a Isileli i he hala oe kau mataki; naa ne tau‘i a Isileli, o ave ae niihi iate kinautolu o fakabobula‘i.

2 Bea nae fuakava aki e Isileli ae fuakava kia Jihova, o behe, Kabau te ke tuku mai ae kakai ni ki hoku nima, teu toki fakaauha aubito a ho nau gaahi kolo.

3 Bea nae afio‘i e Jihova ae le‘o o Isileli, bea nae tuku atu ae kau Kenani; bea naa nau fakaauha aubito akinautolu mo ho nau gaahi kolo: bea naa ne fakahigoa ae botu koia ko Hoama.

4 Bea naa nau fonoga mei he mouga ko Hoa i he hala i he Tahi Kulokula, ke kabu‘i ae fonua ko Itomi: bea nae vaivai aubito ae loto oe kakai koeuhi koe hala.

5 Bea nae lāuga ae kakai ki he Otua, bea mo Mosese,  o behe, Koeha kuo mo omi ai akimautolu mei Ijibite ke mau mate i he toafa ni? he oku ikai ha ma, bea oku ikai ha vai; bea oku mau fehia ki he ma bahabahagi ni.

6 Bea nae tuku mai e Jihova ae faga gata fakavela ki he kakai, bea naa nau uuji ae kakai; bea nae mate ai ae kakai toko lahi.

¶ 7 Koia nae ha‘u ai ae kakai kia Mosese, o behe, Kuo mau agahala he kuo mau lāuga kia Jihova, bea mo koe; ke ke lotu kia Jihova, ke ne ave ae faga gata ni iate kimautolu. Bea nae hufia e Mosese ae kakai.

8 Bea nae folofola a Jihova kia Mosese, o behe, Ke ke gaohi maau ha gata fakavela, o ai ia ki ha akau: bea e behe, koia kuo uujia, oka jio ia ki ai, e moui ai ia.

9 Bea nae gaohi e Mosese ae gata balasa o ne ai ia ki he akau, bea nae hoko o behe, kabau kuo uujia ha tagata e ha gata, bea jio ia ki he gata balasa, nae moui ia.

¶ 10 Bea nae fonoga atu ae fānau a Isileli o nofo i Oboti.

11 Bea naa nau fonoga mei Oboti, o nofo i Iji‐ebalemi, i he toafa aia oku i he gataaga fonua o Moabe, ki he hoboaga oe laa.

12 Bea naa nau hiki mei ai o nofo i he vahaa o Seleti.

13 Bea naa nau hiki mei ai, o nofo i he botu e taha o Alanoni, aia oku i he toafa oku tuu i he vee fonua oe kau Amoli: he ko Alanoni oku tuu ia i he gataaga o Moabe, i he vahaa o Moabe moe kau Amoli.

14 Koia oku behe ai i he tohi oe gaahi tau a Jihova, Mei Vaeba mo Sufa, bea moe gaahi vaitafe o Alanoni,

15 Bea moe maga oe gaahi vaitafe aia oku tafe ki lalo ki he nofoaga o Ala bea oku tuu i he gataaga o Moabe.

16 Bea naa nau hiki mei ai ki Biea: koe vai keli ia nae folofola ai a Jihova kia Mosese, Fakataha ae kakai, bea teu foaki ae vai kiate kinautolu.

17 Bea nae hiva aki ae hiva ni e Isileli, Tubu hake, e vai keli ē; mou hiva ki ai:

18 Nae keli ae vai e he houeiki moe kau matābule oe kakai, aki a ho nau gaahi tokotoko, i he  eginaki oia nae fai fono. Bea naa nau hiki mei he toafa ki Matana.

19 Bea mei Matana ki Neelili: bea mei Neelili ki Bamoti:

20 Bea mei Bamoti ki he vahaa, aia oku i he fonua o Moabe, ki he tumutumu o Bisika, aia oku haga atu ki Jesimoni.

21 Bea nae fekau e Isileli ae kau talafekau kia Sihoni koe tu‘i oe kakai Amoli, o behe,

22 Tuku keu alu atu i ho fonua: e ikai te mau afe ki he goue, be ki he goue vaine; e ikai te mau inu ae vai oe vai keli: ka te mau alu i he hala motua oe tu‘i, kae oua ke mau tuku ki mui ae gataaga o ho fonua.

23 Bea nae ikai loto a Sihoni ke fonoga atu a Isileli i hono fonua: ka nae fakataha e Sihoni a hono kakai kotoabe, bea nae alu ia ki Isileli i he toafa: bea naa ne ha‘u ki Jehasi, o tau ki Isileli.

24 Bea nae ta‘i ia e Isileli aki ae mata oe heleta, bea naa nau ma‘u hono fonua mei Alanoni ki Jakobi, o a‘u ki he fānau a Amoni: he nae malohi ae gataaga fonua oe fānau a Amoni.

25 Bea nae ma‘u e Isileli ae gaahi kolo ni kotoabe: bea nae nofo a Isileli i he gaahi kolo kotoabe oe kau Amoli, i Hesiboni, bea mo hono botu kakai kotoabe.

26 He ko Hesiboni koe kolo ia o Sihoni koe tu‘i oe kau Amoli, aia nae tau ki he tu‘i e taha o Moabe, o ne ma‘u mei hono nima a hono fonua kotoabe, io o a‘u ki Alanoni.

27 Bea koia oku behe ai akinautolu oku faa lea i he lea fakatātā, Ha‘u ki Hesiboni, lagai hake mo teuteu ae kolo o Sihoni.

28 He kuo alu atu ae afi i Hesiboni, ae uloafi mei he kolo o Sihoni: kuo fakaoji eia a Ala i Moabe, bea moe houeiki oe gaahi botu maoluga o Alanoni.

29 Oku malaia akoe, Moabe! kuo ke auha, E kakai o Kimosi: kuo foaki eia a hono gaahi foha mo hono gaahi ofefine kuo hao, ke bobula ki a Sihoni, koe tu‘i oe kau Amoli.

30 Naa mau fana‘i akinautolu; kuo auha a Hesiboni o a‘u ki Tiboni, bea kuo mau fakalala akinautolu o a‘u ki Nofa, aia oku a‘u ki Metiba.

¶ 31 Bea nae behe ae nofo a Isileli i he fonua oe kau Amoli.

32 Bea nae fekau e Mosese ke mataki‘i a Jesa, bea naa nau ma‘u a hono gaahi botu kakai, bea naa nau kabuji kitua ae kau Amoli nae i ai.

¶ 33 Bea naa nau foki o alu hake i he hala o Besani: bea ko Oki koe tu‘i o Besani nae alu atu ia kiate kinautolu, aia, bea mo hono kakai, ki he tau i Etilei.

34 Bea nae folofola a Jihova kia Mosese, Oua naa ke manavahe kiate ia: he kuou tuku ia ki ho nima, mo hono kakai kotoabe, mo hono fonua; bea te ke fai kiate ia o hage ko hoo fai kia Sihoni koe tu‘i oe kau Amoli, aia nae nofo i Hesiboni.

35 Bea koia, naa nau ta‘i ia, mo hono gaahi foha, bea mo hono kakai kotoabe, bea nae ikai tuku ha taha moui kiate ia: bea naa nau ma‘u a hono fonua.