¶ 1 BEA nae hiki atu ae fānau a Isileli, o nofo i he toafa o Moabe i he botu mai o Joatani  o ofi ki Jeliko.

¶ 2 Bea nae ilo e Belaki koe foha o Siboa ae mea kotoabe kuo fai e Isileli ki he kau Amoli.

3 Bea nae manavahe lahi a Moabe ki he kakai, koeuhi naa nau toko lahi: bea nae mamahi lahi a Moabe koeuhi koe fānau a Isileli.

4 Bea nae behe e Moabe ki he kau mātua o Mitiane, Koeni, e emo hake e he kakai ni aia kotoabe oku takatakai akitautolu, o hage oku emo hake e he bulu ae mohuku oe goue. Bea ko Belaki koe foha o Siboa koe tu‘i ia oe kau Moabe i he kuoga koia.

5 Koia naa ne fekau ai kia Belami koe foha o Beoli ki Bitoli, aia oku ofi ki he vaitafe oe fonua oe fānau a hono kakai, ke ui ia, o behe, Vakai, kuo ha‘u ha kakai mei Ijibite: vakai, oku nau ufiufi ae fuga fonua, bea oku nau nofo ofi kiate au:

6 Bea koeni, oku ou kole kiate koe, ke ke ha‘u o fakamalaia‘i maaku ae kakai ni, he oku nau malohi fau kiate au: bea teu vetekina nai, mo teia akinautolu, bea teu kabujia akinautolu i he fonua ni: he oku ou behe, oku monuia ia oku ke fakamonuia‘i, bea oku malaia ia oku ke fakamalaia‘i.

7 Bea koe kau mātua o Moabe moe kau mātua o Mitiane naa nau ave i ho nau nima ae totogi o ene tukitala; bea naa nau ha‘u kia Belami, o fakaha kiate ia ae lea a Belaki.

8 Bea naa ne behe kiate kinautolu, Mou nofo i heni i he bo ni, bea teu toe omi ae lea kiate kimoutolu, o hage koe tolofola a Jihova kiate au: bea nae nofo mo Belami ae houeiki o Moabe.

9 Bea nae haele mai ae Otua kia Belami, mo ne behe, Koeha ae kau tagata ni oku iate koe?

10 Bea nae behe e Belami ki he Otua, Ko Belaki koe foha o Siboa, koe tu‘i o Moabe, kuo ne fekau mai kiate au, o behe,

11 Vakai kuo ha‘u ha kakai mei Ijibite, oku nau ufiufi ae fuga fonua: koia ke ke ha‘u o fakamalaia‘i maaku akinautolu; bea teu malohi abe iate kinautolu, bea kabuji atu akinautolu.

12 Bea nae behe e he Otua kia Belami, Oua aubito te ke alu mo kinautolu; e ikai te ke fakamalaia‘i ae kakai: he oku nau monuia.

13 Bea nae tuu hake a Belami i he bogibogi, bea naa ne behe ki he houeiki mei a Belaki, Mou o ki ho mou fonua: he kuo taofi au e Jihova ke oua naa tau o mo kimoutolu.

14 Bea nae tuu hake ae houeiki o Moabe, o nau o kia Belaki, o behe, Oku behe e Belami, e ikai te ne ha‘u mo kimautolu.

¶ 15 Bea nae toe fekau e Belaki ae houeiki kehe nae ogoogolelei mo toko lahi hake iate kinautolu.

16 Bea naa nau ha‘u kia Belami, o behe kiate ia, Oku behe e Belaki koe foha o Siboa, Oku ou kole atu kiate koe, oua naa toe ai ha mea ke taofi hoo ha‘u kiate au:

17 He teu hiki hake koe ke ke ogoogolelei lahi, bea teu fai o hage ko hoo lea mai kiate au: koia ke ke ha‘u, oku ou kole kiate koe, o fakamalaia‘i maaku ae kakai ni.

18 Bea nae lea a Belami ki he kau talafekau a Belaki, Kabau e foaki e Belaki kiate au a hono fale oku bito i he siliva moe koula, e ikai teu faa fakakehe‘i ae folofola a Jihova ko hoku Otua, ke fai o lahi hake be jii hifo.

19 Bea koeni, oku ou kole atu kiate kimoutolu, mou nofo foki i heni i he bo ni, koeuhi keu ilo be koeha e toe folofola mai e Jihova kiate au.

20 Bea nae haele mai ae Otua i he bo kia Belami, o ne behe kiate ia, Kabau e ha‘u ae kau tagata ke ui koe, tuu hake, o alu mo kinautolu; ka koe lea teu lea aki kiate koe, koia be te ke fai.

21 Bea nae tuu hake a Belami i he bogibogi, be naa ne ai ae hekaaga ki he ene asi, bea alu moe houeiki o Moabe.

¶ 22 Bea nae tubu ae houhau oe Otua koeuhi ko ene alu: bea nae tuu i he hala ae agelo a Jihova koe tali tau kiate ia. Bea nae heka ia i he ene asi, bea mo ene ogo tamaioeiki mo ia.

23 Bea nae mamata ae asi ki he agelo a Jihova nae tuu i he hala, bea mo ene heleta nae i hono nima: bea nae afe atu ae asi mei he hala, o alu ki he goue: bea nae ta‘i e Belami ae asi, ke fakafoki ia ki he hala.

24 Ka nae tuu ae agelo a Jihova, i he hala oe goue vaine, bea nae ai ae a maka i he botu toomatau, moe botu toohema.

25 Bea i he mamata ae asi ki he agelo a Jihova, nae oho ia ki he a maka, bea nae mamulu ae va‘e o Belami i he a maka: bea naa ne toe ta‘i ia.

26 Bea nae alu ae agelo a Jihova, bea nae tuu ia i he botu abiabi, bea nae ikai i ai ha hala ke afe ki he nima toomatau be ki he toohema.

27 Bea i he mamata ae asi ki he agelo a Jihova, nae to ia ki lalo mo Belami: bea nae tubu ai ae ita a Belami, o ne ta‘i ae asi aki ae tokotoko.

28 Bea nae too e Jihova ae gutu oe asi, bea ne behe eia kia Belami, Koeha kuou fai kiate koe, kuo ke ta‘i ai au o liuga tolu?

29 Bea behe e Belami ki he asi, Koeuhi kuo ke manuki‘i au: amujiaage e au kuo i hoku nima ha heleta, he ka ne ai teu tamate‘i koe.

30 Bea nae behe e he asi kia Belami, Ikai ko hoo asi au kuo ke heka ki ai talu hoo ma‘u au o a‘u ki he aho ni? He kuou faa fai behe ni kiate koe? Bea ne behe eia, Nae ikai.

31 Bea nae toki fakaa e Jihova ae mata o Belami, bea nae mamata ia ki he agelo a Jihova oku tuu i he hala, mo ene heleta kuo too i hono nima: bea nae bunou eia hono ulu, bea foohifo ki hono mata.

32 Bea nae behe e he agelo kiate ia, Koeha kuo ke ta‘i ai a hoo asi ni o liuga tolu? vakai neu alu atu o taofi koe, koeuhi oku kovi ho hala i hoku ao:

33 Bea nae mamata ae asi kiate au, bea ne afe meiate au o liuga tolu: ka ne ikai afe ia meiate au koe mooni kuou tamate‘i foki koe, kae tuku ia ke moui.

34 Bea nae behe e Belami ki he agelo a Jihova, Kuou agahala au; he nae ikai teu ilo naa ke tuu kiate au i he hala: bea ko eni, kabau oku kovi kiate koe, teu toe foki au.

35 Bea nae behe e he agelo a Jihova kia Belami, Alu moe kau tagata: ka koe lea be teu lea aki kiate koe, koia be te ke lea aki. Bea nae alu a Belami moe houeiki mei a Belaki.

¶ 36 Bea nae fanogo a Belaki kuo ha‘u a Belami, bea nae alu atu ia o fakafetaulaki mo ia ki ha kolo i Moabe, aia oku i he mata fonua o Alanoni, i hono gataaga mamao atu.

37 Bea nae behe e Belaki kia Belami, Ikai naaku fekau malohi kiate koe o ui koe? ka koeha nae ikai te ke ha‘u ai kiate au? ikai oku ou mafai keu hiki hake koe ke ke ogoogolelei?

38 Bea behe e Belami kia Belaki, Vakai, kuou ha‘u kiate koe: bea oku ai ha malohi jii iate au keu lea ki ha mea? ka koe folofola e tuku mai e he Otua ki hoku gutu, koia be teu lea aki.

39 Bea nae alu a Belami mo Belaki, bea naa na hoko ki Kejahusoti.

40 Bea nae feilaulau aki e Belaki ae faga bulu moe sibi, o ne tali kia Belami, moe houeiki nae iate ia.

41 Bea nae hoko o behe, i he bogibogi hake, nae ave e Belaki a Belami, o omi ia ki he gaahi botu maoluga o Beali, koeuhi ke ne mamata mei ai ki he gataaga oe kakai i tuaa.