¶ 1 BEA nae folofola a Jihova kia Mosese, o behe,

2 Ke ke lea kia Elone, mo ke behe kiate ia, Oka ke ka fokotuu ae gaahi māma, e ulo atu ae gaahi māma e fitu mei he tuuga māma.

3 Bea nae fai behe e Elone; naa ne tutu ae gaahi māma i ai ke ulo atu mei he tuuga māma, o hage koe fekau a Jihova kia Mosese.

4 Bea nae gaohi ae tuuga māma aki ae koula kuo tuki, o a‘u hifo ki hono kau, mo hono gaahi fiji, koe koula tuki ia: o hage koe fakatātā aia nae fakaha e Jihova kia Mosese, nae behe ene gaohi ae tuuga māma.

¶ 5 Bea nae folofola a Jihova kia Mosese, o behe,

6 Mavahe ae kau Livai mei he fānau a Isileli, o fakamaa akinautolu.

7 Bea e behe ni hoo fai kiate kinautolu, ke fakamaa akinautolu: Ke ke luluku akinautolu aki ae vai fakamaa, o tuku akinautolu ke nau tele ho nau jino kotoabe, o fo ho nau gaahi kofu, ke behe e nau fakamaa akinautolu.

8 Bea te nau toki ave ae bulu mui fakataha moe feilaulau meakai oku kau ai, io, ae mahoaa lelei kuo fefiofi moe lolo, bea te ke ave ae bulu mui e taha koe feilaulau ma ae agahala.

9 Bea te ke omi ae kau Livai ki he mata fale fehikitaki oe kakai: bea te ke tanaki ae kakai kotoabe oe fānau a Isileli ke nau fakataha:

10 Bea te ke omi ae kau Livai ki he ao o Jihova: bea koe fānau a Isileli te nau hilifaki ho nau nima ki he kau Livai:

11 Bea e atu e Elone ae kau Livai ki he ao o Jihova koe feilaulau ia ae fānau a Isileli, koeuhi ke nau fai ki he gaue a Jihova.

12 Bea e hilifaki e he kau Livai ho nau nima ki he ulu oe ogo bulu: bea te ke atu ae taha koe feilaulau ma ae agahala, bea koe taha koe feilaulau tutu, kia Jihova, ke fai ae fakalelei koeuhi koe kau Livai.

13 Bea te ke tuku ae kau Livai i he ao o Elone, moe ao o hono gaahi foha, o atu akinautolu koe feilaulau kia Jihova.

14 E behe hao vahe‘i ae kau Livai mei he fānau a Isileli: bea koe kau Livai e ooku akinautolu.

15 Bea hili ia, e alu ae kau Livai ke fai ae gaue oe fale fehikitaki oe kakai: bea te ke fakamaa akinautolu, o atu akinautolu koe feilaulau.

16 He kuo tuku maaku akinautolu mei he fānau a Isileli; ke fetogi aki akinautolu oku  fuofua to mei he manava, io ke fetogi aki ae uluaki fanau oe fānau a Isileli, koia kuou omi ai maaku akinautolu.

17 He koe uluaki tama kotoabe oe fānau a Isileli e ooku ia, ae tagata moe manu fakatouoji be: i he aho neu ta‘i ai ae uluaki tama kotoabe i he fonua ko Ijibite, neu fakatabu‘i akinautolu maaku.

18 Bea kuou fili mai ae kau Livai ke fetogi aki ae uluaki tama kotoabe i he fānau a Isileli.

19 Bea kuou foaki ae kau Livai mei he fānau a Isileli koe foaki kia Elone mo hono gaahi foha ke fai ae gaue ma ae fānau a Isileli i he fale fehikitaki oe kakai, bea ke nau fai ae fakalelei koeuhi koe fānau a Isileli: koeuhi ke oua naa hoko ha mahaki fakaauha ki he fānau a Isileli, oka ha‘u o ofi ae fānau a Isileli ki he fale tabu.

20 Bea ko Mosese mo Elone, moe kakai kotoabe oe fānau a Isileli, naa nau fai ki he kau Livai o fakatatau ki he fekau kotoabe a Jihova kia Mosese koeuhi koe kau Livai, nae fai behe ae fānau a Isileli kiate kinautolu.

21 Bea nae fakamaa ae kau Livai, bea naa nau fo ho nau gaahi kofu; bea nae atu e Elone akinautolu koe feilaulau i he ao o Jihova; bea nae fai e Elone ae fakalelei maa nautolu ke fakamaa akinautolu.

22 Bea hili ia nae hu ae kau Livai ke fai ae gaue i he fale fehikitaki oe kakai i he ao o Elone, moe ao o hono gaahi foha: o hage koe fekau a Jihova kia Mosese koeuhi koe kau Livai, naa nau fai behe kiate kinautolu.

¶ 23 Bea nae folofola a Jihova kia Mosese, o behe,

24 Bea koe mea ni oku kau ki he kau Livai: te nau hu ke talifekau i he gaue oe fale fehikitaki oe kakai mei ho nau ta‘u e uofulu ma nima:

25 Bea oka hoko ki he nimagofulu ta‘u, te nau tuku ae nau tauhi ae gaue i ai, bea e ikai te nau toe fai:

26 Ka te nau fai fakataha mo ho nau kaiga i he fale fehikitaki oe kakai, ke fai ki he tauhi, ka e ikai te nau fai ha gaue lahi. Ke ke fai behe ki he kau Livai i ho nau tauhi.