¶ 1 BEA nae folofola a Jihova kia Mosese i he toafa o Sainai, i he uluaki mahina o hono ua ta‘u hili e nau ha‘u mei he fonua ko Ijibite, o behe,

2 Tuku ae fānau a Isileli ke nau fai foki ae laka‐atu i hono gaahi aho kuo kotofa.

3 I hono aho hogofulu ma fa oe mahina ni, i he efiafi, te mou fai ia i hono gaahi aho kuo kotofa: o fakatatau ki hono aga kotoabe, bea te mou fai ia o fakatatau ki hono tuutuuni kotoabe.

4 Bea nae lea a Mosese ki he fānau a Isileli, ke nau fai ae laka‐atu.

5 Bea naa nau fai ae laka‐atu i hono aho hogofulu ma fa oe uluaki mahina, i he efiafi, i he toafa o Sainai: o fakatatau ki he fekau kotoabe a Jihova kia Mosese, nae fai behe ae fānau a Isileli.

¶ 6 Bea nae i ai ae kau tagata niihi, naa nau taemaa i he jino mate o ha tagata, koia nae ikai ai te nau fai ae laka‐atu i he aho koia: bea naa nau ha‘u ki he ao o Mosese mo Elone i he aho koia:

7 Bea nae lea behe ae kau tagata koia kiate ia, Oku mau uli i he jino mate oe tagata: koeha kuo taofi ai akimautolu, ke oua naa mau atu ae feilaulau kia Jihova i hono kuoga kuo kotofa ki he fānau a Isileli?

8 Bea nae behe e Mosese kiate kinautolu, Mou tatali, kae oua keu fanogo be koeha e fekau e Jihova kiate kimoutolu.

¶ 9 Bea nae folofola a Jihova kia Mosese, o behe,

10 Ke ke lea ki he fānau a Isileli, mo ke behe, Kabau e taemaa ha tagata iate kimoutolu be i ho mou hako koeuhi koe jino mate, bea mo ia oku fonoga mamao, e fai be eia ae laka‐atu kia Jihova.

11 I hono aho hogofulu ma fa o hono ua mahina i he efiafi te nau fai ia, bea e kai fakataha ia moe ma tae fakalevani moe gaahi akau kona.

12 E ikai te nau tuku hono toe ki he abogibogi, be feji‘i ha hui i ai: te nau fai ia o fakatatau ki he gaahi tuutuuni oe laka‐atu.

13 Ka koe tagata oku maa, bea oku ikai fonoga mamao, bea oku ikai fai eia ae lakaatu, koe tagata koia e tuuji mei hono kakai: koeuhi nae ikai te ne omi ae feilaulau a Jihova i hono aho kuo kotofa; e fua e he tagata koia a ene agahala.

14 Bea kabau e aunofo ha muli iate kimoutolu, bea fai eia ae laka‐atu kia Jihova; e fakatatau ki he tuutuuni oe laka‐atu, bea fakatatau ki hono aga, e behe ene fai: koe fekau be taha te mou ma‘u ki he muli, bea mo ia oku fanau‘i i he fonua.

¶ 15 Bea i ne aho nae fokotuu ai ae fale fehikitaki nae uufi aki ae fale fehikitaki ae ao, io, koe fale fehikitaki oe fakamooni: bea nae i he fuga fale fehikitaki i he efiafi ae mea o hage koe afi, o a‘u ki he bogibogi.

16 Nae behe mau ai be: nae uufi aki ia ae ao i he aho, bea hage koe afi i he bo.

17 Bea oka too hake ae ao mei he fale fehikitaki, hili ia, nae fonoga ae fānau a Isileli: bea koe botu nae tuu ai ae ao, koia naa nau fokotuu ai ho nau gaahi fale fehikitaki.

18 Bea nae fonoga atu ae fānau a Isileli i he fekau a Jihova, bea nau nofo i he fekau a Jihova: naa nau nofo i ho nau abitaga o hage ko hono fuoloa oe nofo ae ao i he fuga fale fehikitaki.

19 Bea ka tatali fuoloa ae ao i he fuga fale fehikitaki o aho lahi, nae fai e he fānau a Isileli ki he tauhi o Jihova, bea nae ikai fonoga.

20 Bea nae behe, i he nofo ae ao i he fuga fale fehikitaki i he gaahi aho jii; o fakatatau ki he fekau a Jihova naa nau nofo i ho nau abitaga, bea naa nau fonoga o fakatatau ki he fekau a Jihova.

21 Bea nae behe, ka tuu ae ao mei he efiafi o a‘u ki he bogibogi, bea toki too hake ae ao i he bogibogi, naa nau fonoga: i he aho be i he bo kuo too hake ai ae ao naa nau fonoga.

22 Bea kabau koe aho e ua, be taha mahina, be taha ta‘u, moe tuu ae ao i he fuga fale fehikitaki, o tuu mau ai, nae nofo ae fānau a Isileli i ho nau abitaga, bea nae ikai te nau fonoga: bea i hono too hake ia naa nau fonoga.

23 Bea naa nau mālōlō i ho nau abitaga i he fekau a Jihova, bea naa nau fonoga i he fekau a Jihova: naa nau fai ki he bule a Jihova, i he fekau a Jihova i he nima o Mosese.