1 Sasa Bwana Mungu akazidisha njaa kuwa kali sana katika nchi ya Uru, kiasi kwamba Harani, kaka yangu, akafa; lakini Tera, baba yangu, bado aliishi katika nchi ya Uru, ya Wakaldayo.

2 Na ikawa kwamba mimi, Ibrahimu, nikamchukua Sarai kuwa mke wangu, na Nahori, kaka yangu, akamchukua Milka kuwa mke wake, aliyekuwa binti wa Harani.

3 Sasa Bwana alikuwa ameniambia: Ibrahimu, toka katika nchi yako, na kutoka kwa jamaa zako, na kutoka nyumba ya baba yako, uende katika nchi nitakayokuonyesha.

4 Kwa hiyo nikaondoka nchi ya Uru, ya Wakaldayo, na kwenda katika nchi ya Kanaani; nami nikamchukua Loti, mwana wa kaka yangu, na mke wake, na Sarai mke wangu; na pia baba yangu akanifuata, kwenye nchi ambayo tuliita Harani.

5 Na njaa ikapungua; na baba yangu akakaa katika Harani na akaishi hapo, kwa vile palikuwa na mifugo mingi katika Harani; na baba yangu akageukia tena kwenye kuabudu sanamu zake, kwa hiyo akaendelea katika Harani.

6 Lakini mimi, Ibrahimu, na Loti, mwana wa kaka yangu, tukamwomba Bwana, na Bwana akanitokea, na akaniambia: Simama, na umchukue Loti pamoja nawe; kwa maana nimekusudia kuwatoa ninyi nje ya Harani, na kukufanya mhudumu wa kulichukua jina langu katika nchi ya kigeni nchi ambayo nitaitoa kwa uzao wako baada yako kuwa miliki isiyo na mwisho, wakiisikiliza sauti yangu.

7 Kwa maana Mimi ndimi Bwana Mungu wako; ninakaa mbinguni; dunia ni pa kuwekea miguu yangu; ninanyoosha mkono wangu juu ya bahari, nayo huitii sauti yangu; huufanya upepo na moto kuwa gari langu; ninaiambia milima—Ondoka hapa—na tazama, inaondolewa kwa upepo wa tufani, katika kitambo kidogo, mara moja.

8 Jina langu ni Yehova, nami ninajua mwisho kutoka mwanzo; kwa hiyo mkono wangu utakuwa juu yako.

9 Nami nitakufanya wewe kuwa taifa kubwa, nami nitakubariki kupita kipimo, na kulifanya jina lako kuwa kubwa miongoni mwa mataifa yote, nawe utakuwa baraka kwa uzao wako baada yako, ili katika mikono yao wataichukua huduma hii na Ukuhani kwa mataifa yote;

10 Nami nitawabariki wao kupitia jina lako; kwani kadiri wengi watakavyoipokea Injili hii wataitwa kwa jina lako, nao watahesabiwa kuwa uzao wako, na watainua na kukubariki, kama baba yao;

11 Nami nitawabariki wao wenye kukubariki wewe, na nitawalaani wao wenye kukulaani wewe; na katika wewe (yaani, katika Ukuhani wako) na katika uzao wako (yaani, Ukuhani wako), kwani ninakupa ahadi kwamba haki hii itaendelea ndani yako, na katika uzao wako baada yako (ndiyo kusema, uzao wako halisi, au uzao wa mwili wako) familia zote za dunia zitabarikiwa, hata kwa baraka za Injili, ambazo ni baraka za wokovu, hata za uzima wa milele.

12 Sasa, baada ya Bwana alipojiondoa kutoka kusema nami, na kuondoa uso wake kwangu, nikasema moyoni mwangu: Mtumishi wako amekutafuta kwa dhati; sasa nimekupata;

13 Wewe uliwatuma malaika zako ili kunikomboa kutoka kwa miungu wa Elkena, nami nitafanya vyema kuisikiliza sauti yako, kwa hiyo mwache mtumishi wako asimame na kuondoka kwa amani.

14 Hivyo mimi, Ibrahimu, nikaondoka kama Bwana alivyoniambia, na Loti pamoja nami; na mimi, Ibrahimu, nilikuwa na umri wa miaka sitini na miwili wakati nilipoondoka kutoka Harani.

15 Nami nikamchukua Sarai, ambaye nilimchukua kuwa mke wangu wakati nilipokuwa Uru, katika Ukaldayo, na Loti, mwana wa kaka yangu, na mali yetu yote tuliyoikusanya, na watu wale tuliowapata Harani, na tukatoka katika njia ya kwenda nchi ya Kanaani, na kukaa katika mahema tulipokuwa tukisafiri;

16 Kwa hiyo, milele yalikuwa maficho yetu na mwamba wetu na wokovu wetu, tulipokuwa tukisafiri kutoka Harani kwa njia ya Jershoni, ili kuja nchi ya Kanaani.

17 Sasa mimi, Ibrahimu, nikajenga madhabahu katika nchi ya Jershoni, nami nikamfanyia Bwana sadaka, na nikaomba kwamba njaa ipate kugeuzwa kutoka nyumba ya baba yangu, ili wasiangamie.

18 Na kisha tukapita kutoka Jershoni kupitia nchi ya mahali pa Sechemu; iliyokuwa katika nyanda za More, na tulikuwa tayari tumekuja katika mipaka ya nchi ya Wakanaani, nami nikatoa dhabihu hapo katika nyanda za More, na nikamwitia Bwana kwa moyo mkuu, kwa sababu tulikuwa tayari tumekuja katika nchi ya taifa hili la miungu wa uongo.

19 Na Bwana akanitokea katika kujibu sala zangu, na akaniambia: Uzao wako nitawapa nchi hii.

20 Na mimi, Ibrahimu, nikaamka kutoka mahali pa madhabahu ambayo nilimjengea Bwana, na nikaondoka kutoka mahali hapo kuelekea mlima wa mashariki ya Betheli, na nikapiga hema langu hapo, Betheli upande wa magharibi, na Ai upande wa mashariki; na huko nikamjengea Bwana madhabahu nyingine, na nikaliitia tena jina la Bwana.

21 Na mimi, Ibrahimu, nikasafiri, nikiendelea kuelekea kusini; na kulikuwa na kuendelea kwa njaa katika nchi; nami, Ibrahimu, nikaishia kwenda katika Misri, ili kukaa huko, kwa kuwa njaa imekuwa kali.

22 Na ikawa wakati nilipokaribia kuingia Misri, Bwana akaniambia: Tazama, Sarai, mke wako, ni mwanamke mzuri wa sura;

23 Kwa hiyo itakuwa, wakati Wamisri watakapomwona, watasema—Huyu ni mke wake; nao watakuua, lakini watamwacha mke wako hai; kwa hiyo angalia kwamba unafanya hekima hii:

24 Mwache yeye aseme kwa Wamisri, kuwa yeye ni dada yako, na nafsi yako itaishi.

25 Na ikawa kwamba mimi, Ibrahimu, nikamwambia Sarai, mke wangu, yale yote ambayo Bwana aliniambia—Kwa hiyo uwaambie, ninakuomba, kuwa wewe u dada yangu, ili ipate kuwa heri kwangu kwa ajili yako, na nafsi yangu itaishi kwa sababu yako.