ការស្ដារឡើងវិញដែលកំពុងកើតឡើង
ការស្ដារឡើងវិញបានចាប់ផ្ដើមនៅក្នុងព្រៃពិសិដ្ឋ ២០០ ឆ្នាំកន្លងមកហើយ ហើយវាបន្តនៅសព្វថ្ងៃនេះ—ហើយអ្នក និងខ្ញុំអាចធ្វើជាផ្នែករបស់វា ។
បំណងប្រាថ្នានៃដួងចិត្តខ្ញុំ ( ការនិមិត្តដំបូង ) ដោយ វលធើរ រេន
នេះគឺជាគ្រាដ៏អស្ចារ្យ និងរំភើបដើម្បីរស់នៅលើផែនដី ។ យើងមានពរជ័យនៃការចូលរួមក្នុងព្រឹត្តិការណ៍ដ៏អស្ចារ្យ ដែលកំពុងតែកើតឡើងនៅក្នុងគ្រាកាន់កាប់ត្រួតត្រានៃកាលពេញកំណត់នេះ ជាការរៀបចំដល់ការយាងមកជាលើកទីពីររបស់ព្រះអម្ចាស់ ។១ យើងមិនត្រឹមតែបានឃើញព្រឹត្តិការណ៍ទាំងនេះលាតត្រដាងនោះទេ តែថែមទាំងជាផ្នែកនៃព្រឹត្តិការណ៍ទាំងនេះផងដែរ ។២
ជួនកាលយើងនិយាយអំពីការស្ដារឡើងវិញនៃដំណឹងល្អ ដូចជាវាបានកើតឡើងទាំងអស់ក្នុងពេលតែមួយ ។ កាលពីពីររយឆ្នាំមុន ការនិមិត្តដំបូងបានចាប់ផ្ដើមដំណើរការ ប៉ុន្តែពិតណាស់ ការស្ដារឡើងវិញមិនបានបញ្ចប់នៅទីនោះទេ ។ កិច្ចការរបស់ព្រះអម្ចាស់តាមរយៈ យ៉ូសែប ស៊្មីធ និងសហការីរបស់លោកបានផ្ដើមវាដោយការបកប្រែព្រះគម្ពីរមរមន ការស្ដារបព្វជិតភាព ការរៀបចំសាសនាចក្រ ការបញ្ជូនពួកអ្នកផ្សព្វផ្សាយសាសនា ការសាងសង់ព្រះវិហារបរិសុទ្ធ ការរៀបចំសមាគមន៍សង្គ្រោះ ជាដើម ។ ព្រឹត្តិការណ៍នៃការស្ដារឡើងវិញទាំងនេះបានចាប់ផ្ដើមនៅក្នុងឆ្នាំ ១៨២០ ហើយបានបន្តអស់ពេញមួយជីវិតរបស់ យ៉ូសែប ស៊្មីធ ។
ទោះជាអ្វីៗដែលព្រះបានបើកបង្ហាញតាមរយៈ យ៉ូសែប ស៊្មីធ ជាការណ៍ដ៏អស្ចារ្យ ប៉ុន្តែការស្ដារឡើងវិញមិនបានបញ្ចប់នៅក្នុងជីវិតរបស់យ៉ូសែបនោះទេ ។ តាមរយៈពួកព្យាការីបន្ទាប់ពីលោក យើងបានទទួលការណ៍ទាំងឡាយបែបនោះ ដែលជាការអភិវឌ្ឍជាបន្តបន្ទាប់នៃកិច្ចការព្រះវិហារបរិសុទ្ធ ព្រះគម្ពីរបន្ថែម ការបកប្រែព្រះគម្ពីរទៅជាភាសាជាច្រើន ការប្រកាសដំណឹងល្អទៅទូទាំងពិភពលោក ការរៀបចំសាលាថ្ងៃអាទិត្យ យុវនារី កុមារ និងកូរ៉ុមបព្វជិតភាព និងការកែសម្រួលជាច្រើនដល់ការរៀបចំ និងនិតិវិធីរបស់សាសនាចក្រ ។
ប្រធាន រ័សុល អិម ណិលសុន បានមានប្រសាសន៍ ៖ « យើងជាសាក្សីដល់ដំណើរការមួយនៃការស្ដារឡើងវិញ ។ ប្រសិនបើបងប្អូនគិតថា សាសនាចក្រត្រូវបានស្ដារឡើងវិញពេញលេញហើយនោះ នោះបងប្អូនទើបតែឃើញការចាប់ផ្ដើមប៉ុណ្ណោះ ។ មានអ្វីៗជាច្រើនដែលនឹងកើតឡើង ។… ចាំដល់ឆ្នាំក្រោយ ។ ហើយឆ្នាំក្រោយទៀត ។ សូមលេបថ្នាំគ្រាប់វីតាមីនរបស់អ្នក ។ ហើយសម្រាកឲ្យស្រួលខ្លួនចុះ ។ វានឹងមានរឿងរំភើបចិត្តកើតឡើង » ។៣
ដោយយល់ស្របនឹងការប្រកាសរបស់ប្រធាន ណិលសុនដែលថាការស្ដារឡើងវិញកំពុងតែបន្ត នោះយើងបានឃើញការកែសម្រួលសំខាន់ៗជាច្រើននៅក្នុងសាសនាចក្រ តាំងពីលោកបានក្លាយជាប្រធានសាសនាចក្រ ។ ក្នុងចំណោមការកែសម្រួលនោះ គឺការធ្វើរចនាសម្ព័ន្ធកូរ៉ុមបព្វជិតភាពឡើងវិញ ការងារបម្រើជំនួសឲ្យការបង្រៀនតាមផ្ទះ និងការបង្រៀនសួរសុខទុក្ខ និងការអនុវត្តនូវរបៀបនៃការសិក្សាដំណឹងល្អដែលផ្ដោតនៅក្នុងផ្ទះ និងគាំទ្រដោយសាសនាចក្រ ។៤ ការកែសម្រួលបន្ថែមទៀតបានកើតឡើងនៅពេលនោះ និងការកែសម្រួលបន្ថែមទៀតនឹងមកនៅពេលខាងមុខ ។
គំរូមួយនៅទ្វីបអាហ្វ្រិកខាងលិច
ទីបន្ទាល់របស់ខ្ញុំអំពីធម្មជាតិដែលកំពុងតែបន្តនៃការស្ដារឡើងវិញបានទទួលឥទ្ធិពលមកពីរយៈពេលប្រាំឆ្នាំដែលខ្ញុំបានចំណាយពេលបម្រើនៅក្នុងគណៈប្រធានតំបន់អាហ្វ្រិកខាងលិច ។ ខ្ញុំបានមានទីបន្ទាល់អំពីដំណឹងល្អ តាំងពីខ្ញុំជាយុវជនម្នាក់ ។ ប៉ុន្តែកាលរស់នៅក្នុងទ្វីបអាហ្វ្រិក ខ្ញុំបានប្រាស្រ័យទាក់ទងនឹងជនជាតិអាហ្វ្រិកខាងលិចដំបូងៗមួយចំនួនដែលបានទទួលដំណឹងល្អ ។ ខ្ញុំក៏បានឃើញសាសនាចក្ររីករាលដាលយ៉ាងលឿននៅទូទាំងទ្វីបអាហ្វ្រិក ដោយមានវួដ និងស្តេករាប់រយត្រូវបានបង្កើតឡើង ព្រះវិហារបរិសុទ្ធ និងសាលាប្រជុំបំពេញកន្លែងបន្ថែមដោយសមាជិកដ៏ស្មោះត្រង់ ព្រមទាំងស្ត្រី និងបុរសល្អៗដែលឱបក្រសោបដំណឹងល្អដែលបានស្ដារឡើងវិញដោយអស់ពីដួងចិត្តរបស់ពួកគេ ។ ខ្ញុំបានឃើញការបំពេញការព្យាកររបស់ យ៉ូសែប ស៊្មីធ ដោយផ្ទាល់ភ្នែកខ្ញុំ ដែលថាសាសនាចក្រ « នឹងបំពេញពិភពលោកនេះ » ។៥
សមាជិកដ៏ស្មោះត្រង់ដូចនោះពីររូបគឺ ជេមស៍ អ៊ីវូដហ្សី និង ហ្វ្រិដឺរិក អែនវី បានជួយខ្ញុំនៅថ្ងៃមួយនៅក្នុងព្រះវិហារបរិសុទ្ធ អាក្រា ហ្គាណា ។ ជាច្រើនឆ្នាំមុនពេលដែលពួកអ្នកផ្សព្វផ្សាយសាសនាពួកបរិសុទ្ធថ្ងៃចុងក្រោយបានមកដល់ប្រទេសហ្គាណា ជេមស៍ជាផ្នែកនៃក្រុមមួយដែលមានមនុស្សប្រហែល ១០០០នាក់ ដែលបានប្រើប្រាស់ព្រះគម្ពីរមរមន និងសម្ភារសាសនាចក្រផ្សេងៗទៀតនៅក្នុងការបម្រើខាងសាសនាចក្ររបស់ពួកគេ ។ ពួកគេបានអធិស្ឋានសូមឲ្យថ្ងៃនោះមកដល់ដែលសាសនាចក្រនឹងមកប្រទេសហ្គាណា ។ គាត់បានចូលរួមជាមួយនឹងយុវជនផ្សេងទៀតធ្វើដំណើរជុំវិញប្រទេសហ្គាណា ហើយបង្រៀនដំណឹងល្អដែលមានក្នុងសម្ភាររបស់យើង ។ ពេលពួកអ្នកផ្សព្វផ្សាយបានមកដល់នៅក្នុងឆ្នាំ ១៩៧៨ គាត់បានទទួលបុណ្យជ្រមុជទឹកនៅថ្ងៃទីមួយដែលបុណ្យជ្រមុជទឹកនៃពួកបរិសុទ្ធថ្ងៃចុងក្រោយបានធ្វើឡើងនៅក្នុងប្រទេសហ្គាណា ។
ហ្វ្រិដ អែនវី ជាសមាជិកត្រួសត្រាយផ្លូវរបស់សាសនាចក្រនៅក្នុងប្រទេសហ្គាណា
ពេលហ្វ្រិដជាសមាជិកដំបូងៗ គាត់បានចូលរួមបុណ្យសពរបស់សាច់ញាតិម្នាក់ដែលជាមេកន្ទ្រាញកុលសម្ព័ន្ធមួយ ។ នៅទីនោះ គាត់បានដឹងថា ផែនការក្រុមគ្រួសារគឺឲ្យគាត់ធ្វើជាមេកន្ទ្រាញថ្មី ។ ដោយដឹងថាមុខតំណែងមួយបែបនោះ នឹងបណ្ដាលឲ្យគាត់ធ្វើអ្វីៗដែលផ្ទុយពីជំនឿដំណឹងល្អរបស់គាត់ នោះគាត់បានប្រញាប់ចាកចេញភ្លាមបន្ទាប់ពីការបញ្ចុះសព ហើយមិនបានទទួលយកមុខតំណែងមួយដែលនឹងនាំភាពលេចធ្លោ និងទ្រព្យសម្បត្តិដល់គាត់ទេ ។
នៅពេលដែលព្រះវិហារបរិសុទ្ធអាក្រាបានឧទ្ទិសឆ្លង ទាំងជេមស៍ និងហ្វ្រិដ បានធ្វើដំណើរជាងបួនម៉ោងមួយជើង ជារៀងរាល់សប្ដាហ៍ដើម្បីពួកគេអាចធ្វើជាអ្នកធ្វើការក្នុងព្រះវិហារបរិសុទ្ធ ។ កាលដែលខ្ញុំបានធ្វើពិធីបរិសុទ្ធជាមួយពួកគេ ខ្ញុំត្រូវបានគ្របដណ្ដប់ដោយវិញ្ញាណនៃប្រវត្តិសាស្ត្រដែលហ៊ុំព័ទ្ធជុំវិញខ្ញុំ ។ ដោយបានដឹងពីប្រវត្តិសាសនាចក្រនៅក្នុងទ្វីបអាហ្វ្រិក ដែលពួកគេទាំងពីរជាអ្នកតំណាង នោះខ្ញុំបានមានអារម្មណ៍ស្ទើរតែដូចជាមាន យ៉ូហាន ថេលើរ ឬ វិលហ្វួឌ វូឌដ្រុព្វ ឬសមាជិកសាសនាចក្រពីដំបូងៗផ្សេងទៀតនៅជាមួយខ្ញុំធ្វើពិធីបរិសុទ្ធទាំងនោះ ។
អ្វីដែលខ្ញុំបានឃើញ បានដកពិសោធន៍ និងបានទទួលអារម្មណ៍នៅក្នុងអាហ្វ្រិកខាងលិច គឺជាផ្នែកនៃអ្វីដែលព្រះអម្ចាស់បានប្រាប់ហេណុកថានឹងកើតឡើង ៖ « ហើយរីឯសេចក្ដីសុចរិត នោះយើងនឹងចាត់ឲ្យចុះមកពីស្ថានសួគ៌ ហើយឯសេចក្ដីពិត នោះយើងនឹងចាត់ឲ្យចេញពីផែនដីទៅ ដើម្បីទៅធ្វើបន្ទាល់ពីព្រះរាជបុត្រាបង្កើតតែមួយរបស់យើង … ហើយសេចក្ដីសុចរិត និងសេចក្ដីពិត នោះយើងនឹងបណ្ដាលឲ្យបោសផែនដី ដូចជាទឹកជំនន់ ដើម្បីប្រមូលពួកអ្នកជម្រើសរបស់យើងពីទិសទាំងបួននៃផែនដី » ( ម៉ូសេ ៧:៦២ ) ។
ខ្ញុំបានឃើញភាពសុចរិត និងសេចក្ដីពិតដែលកំពុងរីករាលដាលយ៉ាងលឿននៅក្នុងទ្វីបអាហ្វ្រិក ហើយពួកជម្រើសកំពុងត្រូវបានប្រមូលផ្ដុំពីផ្នែកនោះនៃផែនដី ។ ទីបន្ទាល់របស់ខ្ញុំអំពីការស្ដារឡើងវិញត្រូវបានពង្រឹង ដោយសារខ្ញុំបានឃើញផ្នែកដ៏សំខាន់នៃការស្ដារឡើងវិញនោះកំពុងកើតឡើងនៅនឹងមុខខ្ញុំ ។
ខ្ញុំក៏បានឃើញអ្វីផ្សេងទៀតផងដែរអំពីការស្ដារឡើងវិញដែលកំពុងតែបន្តនេះ ៖ សេចក្ដីជំនឿដ៏រស់រវើក និងថាមពលខាងវិញ្ញាណក្នុងចំណោមសមាជិកអាហ្វ្រិក ។ ខ្ញុំបានឮ អែលឌើរ ដេវីឌ អេ បែតណា នៃកូរ៉ុមនៃពួកសាវកដប់ពីរនាក់ មានប្រសាសន៍ថា « ខឺតឡង់ [ ជាកន្លែងដែលពួកបរិសុទ្ធថ្ងៃចុងក្រោយបានរស់នៅក្នុងទសវត្សរ៍ឆ្នាំ ១៨៣០ ] គឺមិនគ្រាន់តែនៅក្នុងរដ្ឋអូហៃអូប៉ុណ្ណោះទេ ។ វាក៏នៅក្នុងអាហ្វ្រិកផងដែរ » ។ មនុស្សជាច្រើនកំពុងចូលរួមសាសនាចក្រនៅក្នុងអាហ្វ្រិក ដោយផ្អែកលើបទពិសោធន៍ខាងវិញ្ញាណផ្ទាល់ខ្លួនប្រកបដោយអានុភាពរបស់ពួកគេ ។ សមាជិកថ្មីៗទាំងនោះនាំមកនូវថាមពលខាងវិញ្ញាណ និងតម្រូវការដើម្បីរៀនដំណឹងល្អបន្ថែមទៀត ។ សម្រាប់ពួកគេ ការស្ដារឡើងវិញគឺកំពុងតែបន្តនៅក្នុងស្មារតីផ្ទាលខ្លួន ។ ពេលពួកគេរៀនបន្ថែម ហើយបន្ថែមទៀតអំពីសាសនាចក្រ នោះសេចក្ដីពិតនៃដំណឹងល្អបន្តលាតត្រដាងដល់ទស្សនវិស័យរបស់ពួកគេ ។ វាដូចគ្នាសម្រាប់យើងទាំងអស់គ្នាផងដែរ ពេលយើងបន្តពង្រីកចំណេះដឹងខាងដំណឹងល្អរបស់យើង ។
របៀបបីយ៉ាងដើម្បីជួយនៅក្នុងការស្តារឡើងវិញដែលកំពុងកើតឡើង
ព្រះបានប្រទានដល់យើងនូវឱកាសដ៏ប្រសើរលើសលប់ដើម្បីបំពេញមុខងារយ៉ាងសំខាន់នៅក្នុងកិច្ចការនេះ ។ ព្រះអម្ចាស់បានមានព្រះបន្ទូលថា « រូបកាយ [ នៃសាសនាចក្រ ] ក៏ត្រូវការអវយវៈទាំងអស់ដែរ » ( គោលលទ្ធិ និង សេចក្ដីសញ្ញា ៨៤:១១០ ) ។ សមាជិកសាសនាចក្រទាំងអស់មានពរជ័យនៃការចូលរួមនៅក្នុងការស្តារឡើងវិញដែលកំពុងកើតឡើង ។ តើយើងធ្វើដូច្នោះដោយរបៀបណា ?
របៀបមួយដែលយើងចូលរួម គឺដោយការធ្វើ និងរក្សាសេចក្ដីសញ្ញាដ៏ពិសិដ្ឋ ។ ពិធីបរិសុទ្ធទាំងឡាយ រួមទាំងពិធីបរិសុទ្ធនៃព្រះវិហារបរិសុទ្ធ ពុំមានគោលបំណងមួយទេ លើកលែងតែមនុស្សពិតជាធ្វើ និងរក្សាសេចក្ដីសញ្ញាដែលទាក់ទងនឹងពិធីបរិសុទ្ធនោះ ។ ស៊ីស្ទើរ ប៉ូនី ផាកកិន អតីតប្រធានសមាគមសង្គ្រោះទូទៅ បានបង្រៀនថា « ការធ្វើសេចក្ដីសញ្ញាទាំងឡាយ គឺជាការបង្ហាញពីដួងចិត្តដែលមានឆន្ទៈ ការរក្សាសេចក្ដីសញ្ញាជាការបង្ហាញពីដួងចិត្តដែលស្មោះត្រង់ » ។៦
ដោយការធ្វើ និងរក្សាសេចក្ដីសញ្ញា យើងមិនត្រឹមតែរៀបចំខ្លួនយើងសម្រាប់ជីវិតដ៏នៅអស់កល្បជានិច្ចនោះទេ តែថែមទាំងជួយរៀបចំ និងពង្រឹងអ្វីដែលព្រះអម្ចាស់ហៅថា « រាស្ត្ររបស់យើងដែលនៅក្នុងសេចក្ដីសញ្ញា » ទៀតផង ( គោលលទ្ធិ និងសេចក្ដីសញ្ញា ៤២:៣៦ ) ។ យើងធ្វើសេចក្ដីសញ្ញាជាមួយព្រះ ហើយក្លាយជាផ្នែកនៃរាស្ត្រដែលនៅក្នុងសេចក្ដីសញ្ញារបស់ទ្រង់ តាមរយៈពិធីបុណ្យជ្រមុជទឹក ពិធីបញ្ជាក់ ពិធីសាក្រាម៉ង់ បព្វជិតភាពមិលគីស្សាដែក និងពិធីបរិសុទ្ធព្រះវិហារបរិសុទ្ធទាំងឡាយ ។
របៀបទីពីរដែលយើងអាចចូលរួមនៅក្នុងការស្ដារឡើងវិញដែលកំពុងកើតឡើង គឺដោយការបំពេញការហៅបម្រើ និងការចាត់តាំងដែលយើងទទួល ។ នោះហើយជារបៀបដែលសាសនាចក្រឈានឆ្ពោះទៅមុខ ។ គ្រូបង្រៀនដែលមានចិត្តឧទ្ទិសបង្រៀនដំណឹងល្អទៅកុមារ យុវវ័យ និងមនុស្សពេញវ័យ ។ បងប្អូនប្រុសស្រីដែលផ្ដល់ការងារបម្រើថែទាំសមាជិកម្នាក់ៗនៃសាសនាចក្រ ។ គណៈប្រធាន និងគណៈប៊ីស្សពផ្ដល់ការណែនាំដល់ស្តេក មណ្ឌល វួដ សាខា កូរ៉ុម អង្គការ ថ្នាក់ និងក្រុមទាំងឡាយ ។ ថ្នាក់ដឹកនាំយុវវ័យថែទាំយុវនារី និងយុវជន ។ ស្មៀន និងលេខាកត់ត្រាព័ត៌មានចាំបាច់ដែលត្រូវបានកត់ត្រានៅស្ថានសួគ៌ ហើយអ្នកផ្សេងជាច្រើនទៀតបំពេញមុខងារយ៉ាងសំខាន់បំផុតនៅក្នុងការរៀបចំមនុស្សសម្រាប់ជីវិតដ៏នៅអស់កល្បជានិច្ច និងការយាងមកជាលើកទីពីររបស់ព្រះអង្គសង្គ្រោះ ។
យុវវ័យតម្រង់ជួរដើម្បីចូលទៅក្នុងព្រះវិហារបរិសុទ្ធអាក្រាហ្គាណា ។
របៀបទីបីដែលយើងអាចចូលរួមនៅក្នុងការស្ដារឡើងវិញ គឺដោយការជួយប្រមូលផ្ដុំវង្សអ៊ីស្រាអែល ។ តាំងពីពេលដំបូងបំផុតនៃការស្ដារឡើងវិញ ការណ៍នេះជាផ្នែកសំខាន់មួយនៃកិច្ចការនោះ ។ ដូចដែលបានបង្រៀនដោយប្រធាន ណិលសុន យើងមានឱកាស និងកាតព្វកិច្ចដើម្បីជួយនៅក្នុងការប្រមូលផ្ដុំវង្សអ៊ីស្រាអែលដែលកើតឡើងនៅផ្នែកសងខាងនៃវាំងនន ។ នៅក្នុងសារបញ្ចប់របស់លោកនៅក្នុងសន្និសីទទូទៅដំបូងរបស់លោកក្នុងនាមជាប្រធានសាសនាចក្រ ប្រធានណិលសុនបានថ្លែងយ៉ាងច្បាស់ថា « សារលិខិតរបស់យើងទៅកាន់ពិភពលោកគឺសាមញ្ញ ហើយដោយស្មោះ ៖ ពួកយើងសូមអញ្ជើញបុត្រាបុត្រីរបស់ព្រះទាំងអស់ដែលនៅសងខាងនៃវាំងននឲ្យមករកព្រះអង្គសង្គ្រោះ ទទួលយកពរជ័យនៃព្រះវិហារបរិសុទ្ធដ៏បរិសុទ្ធ ទទួលបានអំណរយូរអង្វែង និងសក្ដិសមសម្រាប់ជីវិតអស់កល្បជានិច្ច » ។៧
ការប្រមូលផ្ដុំវង្សអ៊ីស្រាអែលនៅសងខាងនៃវាំងនន យើងទាំងអស់គ្នាដែលអាចបម្រើបេសកកម្មពេញម៉ោងគួរតែពិចារណាដោយយកចិត្តទុកដាក់ពីឱកាសនោះ ។ ខ្ញុំរាប់វាថាជាឱកាសដ៏អស្ចារ្យមួយដែលខ្ញុំអាចទៅបម្រើបេសកកម្មនៅប្រទេសអ៊ីតាលីនៅគ្រាមួយដែលសាសនាចក្រនៅថ្មីថ្មោងនៅឡើយនៅទីនោះ ។ សាខាទាំងឡាយបានជួបនៅអគារជួលនានា ហើយយើងបានសង្ឃឹមថា ថ្ងៃណាមួយនឹងមានស្តេក និងវួដនៅទីនោះ ។ ខ្ញុំបានមើលឃើញពួកអ្នកត្រួសត្រាយផ្លូវដ៏ក្លាហានចូលក្នុងសាសនាចក្រ ហើយបានដាក់គ្រឹះដើម្បីប្រមូលផ្ដុំវង្សអ៊ីស្រាអែលនៅក្នុងដែនដីដ៏អស្ចារ្យនោះ ។
ម្នាក់ក្នុងចំណោមនេះគឺ អេកនេស ហ្គាលឌីអូឡូ ។ យើងទាំងអស់គ្នាបានទទួលអារម្មណ៍ពីព្រះវិញ្ញាណដ៏មានព្រះចេស្ដា ពេលនាងបានរៀនពីមេរៀនអ្នកផ្សព្វផ្សាយសាសនា ។ ប៉ុន្តែ សូម្បីតែការទទួលអារម្មណ៍ពីព្រះវិញ្ញាណនោះ នាងបានដឹងថា គ្រួសាររបស់នាងនឹងប្រឆាំងយ៉ាងខ្លាំងចំពោះបុណ្យជ្រមុជទឹករបស់នាង ។ ទោះយ៉ាងណា នៅពេលជាក់លាក់មួយ ដោយបានពោរពេញដោយព្រះវិញ្ញាណ នាងបានយល់ព្រមទទួលបុណ្យជ្រមុជទឹក ។ ប៉ុន្តែនាងបានផ្លាស់ចិត្តនាងនៅព្រឹកនៃថ្ងៃបុណ្យជ្រមុជទឹកដែលបានគ្រោងទុករបស់នាង ។ នាងបានមកអគារជួលនោះមុនម៉ោង ជាកន្លែងដែលនាងត្រូវទទួលបុណ្យជ្រមុជទឹកដើម្បីប្រាប់យើងថា នាងមិនអាចធ្វើវាបានទេ ដោយសារមានសម្ពាធពីគ្រួសារ ។
ពីមុនពេលនាងចាកចេញទៅ នាងបានយល់ព្រមថា យើងអាចនិយាយគ្នាពីរបីនាទី ។ យើងបានទៅថ្នាក់រៀនមួយដែលយើងបានផ្ដល់យោបល់ថា យើងអធិស្ឋានជាមួយគ្នា ។ បន្ទាប់ពីយើងបានលុតជង្គង់ចុះ យើងបានសូមនាងឲ្យអធិស្ឋាន ។ បន្ទាប់ពីការអធិស្ឋាន នាងបានក្រោកឈរឡើងទាំងទឹកភ្នែក ហើយនិយាយថា « មែនហើយ ខ្ញុំនឹងទទួលបុណ្យជ្រមុជទឹក » ។ ហើយពីរបីនាទីក្រោយមក នាងបានទទួលបុណ្យជ្រមុជទឹក ។ នាឆ្នាំបន្ទាប់ នាងបានរៀបការនឹង សេបាធាណូ ខារូសូ ហើយពួកគេបានចិញ្ចឹមបីបាច់កូនបួននាក់ ដែលពួកគេទាំងអស់គ្នាបានបម្រើបេសកកម្ម ហើយបានបន្តដើម្បីបម្រើនៅក្នុងសាសនាចក្រតាំងពីនោះមក ។
អែលឌើរ និងស៊ីស្ទើរ ខឺតធិស ជាមួយនឹងសមាជិកមួយចំនួននៃគ្រួសារខារូសូ ។
អេកនេស និង សេបាធាណូ ក៏បានបម្រើបេសកកម្មមួយផងដែរ ដោយសេបាធាណូជាប្រធានបេសកកម្ម ។ ពេលខ្ញុំបានបម្រើបេសកកម្មទីពីររបស់ខ្ញុំនៅប្រទេសអ៊ីតាលី ២៥ ឆ្នាំក្រោយពីបេសកកម្មទីមួយ ខ្ញុំបានឃើញពីអ្វីដែលគ្រួសារខារូសូ និងអ្នកត្រួសត្រាយផ្លូវផ្សេងទៀតបានធ្វើ ដើម្បីពង្រីកនគររបស់ព្រះនៅទីនោះ ។ ពួកអ្នកផ្សព្វផ្សាយសាសនារបស់ខ្ញុំ និងខ្ញុំ បានធ្វើកិច្ចការដើម្បីស្ថាបនាសាសនា ដោយសុបិនថា ថ្ងៃមួយអាចមានព្រះវិហារបរិសុទ្ធមួយ ប្រហែលនឹងត្រូវបានសាងសង់នៅក្នុងប្រទេសអ៊ីតាលី ។ សូមស្រមៃមើលពីអំណររបស់ខ្ញុំ ដែលឥឡូវនេះយើងពិតជាមានព្រះវិហារបរិសុទ្ធរ៉ូមអ៊ីតាលី ។
មានអំណរមួយចំនួនដែលអាចប្រៀបធៀបនឹងអំណររបស់អ្នកផ្សព្វផ្សាយសាសនា ។ ឱ វាជាពរជ័យដ៏អស្ចារ្យមួយ ដែលបានកើតមកនៅគ្រាមួយ ដែលយើងអាចចូលរួមដោយអំណររីករាយនៅក្នុងការស្ដារឡើងវិញដែលកំពុងកើតឡើង គឺដោយការជួយប្រមូលផ្ដុំវង្សអ៊ីស្រាអែលនោះ !
ពិតណាស់ អំណរនៃអ្នកផ្សព្វផ្សាយសាសនាមិនត្រឹមតែមានចំពោះពួកអ្នកផ្សព្វផ្សាយសាសនាពេញម៉ោងប៉ុណ្ណោះទេ ។ យើងម្នាក់ៗអាចជួយនៅក្នុងការប្រែចិត្តជឿ ឬការធ្វើឲ្យសកម្មឡើងវិញរបស់បងប្អូនប្រុសស្រីយើង ដោយការប្រកៀកដៃគ្នាជាមួយនឹងពួកអ្នកផ្សព្វផ្សាយសាសនាពេញម៉ោង ។ យើងមានឱកាសដើម្បីប្រមូលផ្ដុំវង្សអ៊ីស្រាអែល ដោយការអញ្ជើញអ្នកផ្សេងទៀតឲ្យមក ហើយមើល និងដោយការរាក់ទាក់ពួកអ្នកដែលកំពុងរៀន ។
វាគឺដោយសារកិច្ចការព្រះវិហារបរិសុទ្ធ និងពង្សប្រវត្តិដែលយើងជួយប្រមូលផ្ដុំវង្សអ៊ីស្រាអែលនៅផ្នែកម្ខាងទៀតនៃវាំងនន ។ វាជាការទទួលខុសត្រូវដ៏ពិសិដ្ឋរបស់យើងក្នុងការធ្វើកិច្ចការអស់ជាច្រើនឆ្នាំមកហើយ ។ មុនពេលមរណភាពរបស់ យ៉ូសែប ស៊្មីធ ពួកបរិសុទ្ធបានធ្វើពិធីបុណ្យជ្រមុជទឹកសម្រាប់មរណជន ហើយមានមនុស្សមួយចំនួនបានទទួលអំណោយទានពិសិដ្ឋ និងពិធីផ្សារភ្ជាប់របស់ពួកគេ ។ ជាមួយនឹងការបញ្ចប់នៃព្រះវិហារបរិសុទ្ធណៅវូ អំណោយទានពិសិដ្ឋសម្រាប់អ្នកនៅរស់បានចាប់ផ្ដើមធ្វើឡើងច្រើនឡើង ។ អំណោយទានពិសិដ្ឋ និងពិធីផ្សារភ្ជាប់សម្រាប់បុព្វការីជនក៏បានចាប់ផ្ដើមនៅក្នុងព្រះវិហារបរិសុទ្ធនានានៅរដ្ឋយូថាហ៍ផងដែរ ។
អ៊ីឡៃស្សា អរ ស្នូ ជាអ្នកចូលរួមដ៏សំខាន់ម្នាក់នៅក្នុងដំណើរការនៃការស្ដារឡើងវិញនោះ បានយល់ពីសារសំខាន់នៃផ្នែកនោះនៃការស្ដារឡើងវិញ ។ គាត់បានចំណាយពេលជាច្រើននៅក្នុងបន្ទប់ធ្វើពិធីអំណោយទានពិសិដ្ឋ ដោយបានជួយនៅក្នុងពិធីបរិសុទ្ធនានានៅទីនោះ ។៨ ក្នុងអំឡុងនៃការសួរសុខទុក្ខរបស់សមាគមសង្គ្រោះមួយនៅក្នុងឆ្នាំ ១៨៦៩ គាត់បានបង្រៀនដល់បងប្អូនស្ត្រីរបស់គាត់ថា « ខ្ញុំបានសញ្ជឹងគិតពីកិច្ចការដ៏អស្ចារ្យដែលយើងមានដើម្បី ជួយដល់សេចក្ដីសង្គ្រោះនៃអ្នកនៅរស់ និងមរណជន ។ យើងចង់ធ្វើជា … ដៃគូដ៏សក្ដិសមរបស់ព្រះ និងពួកបរិសុទ្ធទាំងឡាយ » ។៩
ហើយពិតណាស់ លទ្ធភាពដើម្បីធ្វើពិធីបរិសុទ្ធព្រះវិហារបរិសុទ្ធត្រូវបានពង្រីកយ៉ាងធំទូលាយ ជាមួយនឹងការកសាងព្រះវិហារបរិសុទ្ធជាច្រើននៅជុំវិញពិភពលោក ដោយមានច្រើនទៀតនឹងត្រូវសាងសង់ឡើង ។
ដោយមានឧបករណ៍ជាច្រើនដែលយើងអាចប្រើប្រាស់បាន នោះកិច្ចការព្រះវិហារបរិសុទ្ធ និងពង្សប្រវត្តិអាចជាផ្នែកដ៏ទៀងទាត់មួយនៃការចូលរួមរបស់យើងនៅក្នុងការស្ដារឡើងវិញដែលកំពុងកើតឡើងនេះ ។ ខ្ញុំមានចំណាប់អារម្មណ៍ និងបានចូលរួមនៅក្នុងកិច្ចការពង្សប្រវត្តិអស់ជាច្រើនឆ្នាំមកហើយ ប៉ុន្តែឧបករណ៍នៅលើអ៊ិនធើណិតបានពង្រីកជោគជ័យរបស់ខ្ញុំយ៉ាងសម្បើមនៅក្នុងការយកឈ្មោះគ្រួសារទៅកាន់ព្រះវិហារបរិសុទ្ធ ។ ខ្ញុំមានការចងចាំដ៏ពិសិដ្ឋមួយពីពេលដែលខ្ញុំអង្គុយនៅតុមួយនៅក្នុងផ្ទះយើងនៅប្រទេសហ្គាណា ហើយស្វែងរកឈ្មោះបុព្វការីជនជនជាតិអ៊ឺរ៉ុបរបស់ខ្ញុំ ដែលភរិយាខ្ញុំ និងខ្ញុំអាចយកទៅកាន់ព្រះវិហារបរិសុទ្ធអាក្រាហ្គាណា ។ ឱកាសដ៏ប្រកបដោយអំណរបានទៅតាមយើងទៅ កន្លែងផ្សេងៗទៀតដែលយើងបានទៅ ។
តាមរយៈព្យាការី យ៉ូសែប ស៊្មីធ ព្រះបានចាប់ផ្ដើមដំណើរការនៃ « ការសម្រេចនូវការសាងឡើងវិញនៃរបស់ទាំងអស់ ដែលបានពោលដោយមាត់នៃពួកព្យាការីបរិសុទ្ធ ចាប់តាំងពីដើមមក » ( គោលលទ្ធិ និងសេចក្ដីសញ្ញា ២៧:៦ ) ។ ការស្ដារឡើងវិញនោះបានបន្តដល់បច្ចុប្បន្ននេះ ដូចដែលព្រះ « បើកសម្ដែងនៅពេលឥឡូវនេះ » ហើយ « នឹងបើកសម្ដែងនូវការណ៍ដ៏ធំ និងសំខាន់ៗជាច្រើន ដែលទាក់ទងទៅនឹងនគរនៃព្រះ » ( មាត្រានៃសេចក្ដីជំនឿ ១:៩ ) ។ ខ្ញុំមានអំណរគុណយ៉ាងជ្រាលជ្រៅ ដែលយើងអាចចូលរួមនៅក្នុងការស្ដារឡើងវិញដែលកំពុងកើតឡើងនេះ ។