Mga Pioneer sa Matag Yuta
Géoffroy Koussemou
Unang Misyonaryo gikan sa Benin
Si Géoffroy nahibalo nga ang Dios andam nga motabang kaniya kon siya mohimo sa iyang bahin.
Si Géoffroy migawas sa klase uban sa iyang higala nga si Théodore. Ang duha ka batang mga lalaki nag edad og 16, ug sila nanimuyo sa Benin, usa ka nasud sa Africa. Moadto sila sa usa ka bag-o nga eskwelahan aron pagkat-on mahitungod sa pagpanguma. Kini ang ilang unang panahon nga pagpuyo layo sa ilang mga pamilya. Kinahanglan sila nga magtuon ug magtrabaho sulod sa daghang mga oras sa matag adlaw.
Gitarung ni Géoffroy ang iyang backpack sa iyang abaga. “Tingali moundang ko. Kini nga mga klase lisud kaayo.”
“Dili!” Si Théodore miingon. “Ayaw pag-undang. Kinahanglan nga mosalig ka sa Dios. Kon imong buhaton, ikaw molampus.”
Ang mga pulong ni Théodore mipabilin ni Géoffroy sa tibuok adlaw. Si Géoffroy gipadako isip usa ka Kristiyano, apan wala gayud siya makasulay sa pagsalig sa Dios. Siya miluhod sa salog, apan wala pa misugod sa pag-ampo. Nakuyawan siya. Apan kon dili siya makakuha og tabang gikan sa usa ka dapit, siya dili gayud makahimo sa pagpasar sa iyang mga klase. Sa hinay-hinay si Géoffroy miduko.
“Amahan sa Langit,” miingon siya, “palihug ipakita kanako unsaon sa pagsalig diha kanimo. Mahimo ba intawon imo akong tabangan nga makapasar sa akong mga klase? Mosaad ako nga moserbisyo kanimo sa labing maayo nga ako makahimo sa tibuok nakong kinabuhi.”
Gikan nianang higayuna, gibati ni Géoffroy nga mas isug ug mas determinado. Lisud gihapon ang mga klase, apan siya nasayud nga ang Dios andam nga motabang kaniya kon siya mohimo sa iyang bahin. Gisalikway ni Géoffroy ang iyang mga kahadlok ug mitrabaho og maayo.
Maayo siya sa eskwelahan. Dyesiotso ka bulan ang milabay, siya sa katapusan andam na nga mogradwar. Nahimo niya kini!
Human siya mibiya sa pag-eskwela, si Géoffroy nagpadayon sa pagtrabaho og maayo. Sa wala madugay siya may usa ka umahan nga iyang kaugalingon.
Dayon usa ka adlaw siya nakakita og usa ka higala kinsa miyembro sa Ang Simbahan ni Jesukirsto sa mga Santos sa Ulahing mga Adlaw. Ang iyang higala mihatag kaniya og Basahon ni Mormon. Gibasa ni Géoffroy ang Basahon ni Mormon ug nag-ampo. Siya mibati og kadagaang ug kalinaw sa sulod ug nahibalo sa pagkatinuod nga ang Simbahan tinuod.
Siya nahibalo na kon unsay sunod nga buhaton. Siya mitrabaho, nag-ampo, ug misalig sa Dios. Una nagpabunyag siya. Dayon mipakigbahin siya sa iyang pagpamatuod ngadto sa naglibut kaniya. Pipila sa iyang mga higala nabunyagan usab. Ang nagsugod nga usa ka gamay nga grupo sa mga miyembro sa wala madugay mitubo ngadto sa usa ka branch. Mitabang siya sa Simbahan nga motubo sa Benin!
Gusto ni Géoffroy nga magmisyon. Wala siyay igong kwarta, busa iyang gibaligya ang iyang umahan. Pipila ka bulan ang milabay, nadawat niya ang usa ka mission call ngadto sa Ivory Coast. Siya mao ang unang misyonaryo gikan sa Benin nga nakadawat og usa ka mission call!
Ang iyang pagkamaunungon mitabang kaniya sulod sa mga katuigan. Tungod sa iyang hugot nga pagtuo, ug sa ubang mga miyembro, daghan pang mga tawo ang nabunyagan. Ang iyang branch nahimong ward. Kana nga ward karon bahin sa unang stake sa Benin!
Si Géoffroy Koussemou nagpadayon sa pagtrabaho og maayo ug nagsalig sa Dios. Siya nahibalo nga ang mahinungdanon kaayo nga mga butang mahitabo uban sa tabang sa Dios.
Mga paghulagway pinaagi ni Isabel Muñoz