Gimingaw ni Lola ug Lolo
Ang tagsulat nagpuyo sa Colorado, USA.
Unsaon pagkamingaw ni Zoe sa usa ka tawo nga wala pa niya mahimamat sukad?
“Ang mga kasingkasing sa mga anak mobati sa ilang mga amahan” (Doktrina ug mga Pakigsaad 2:2).
Si Zoe midali og kaon sa iyang biskwit. “Yummm.”
“Kini sama gyud lamang sa bantugang mga biskwit ni Lola,” miingon ang magulang nga lalaki ni Zoe nga si Zach. “Siya mihimo sa labing lami nga mga biskwit sukad!”
Ang mga ginikanan ni Papa namatay sa wala pa matawo si Zoe. Ang iyang magulang nga igsoong mga lalaki ug mga babaye ug mga ig-agaw nag-istoryahanay mahitungod ni Lola ug Lolo sa kanunay.
“Ang imong lola usa ka maayong magluluto,” miingon si Papa samtang siya mipunit og laing biskwit. “Gimingaw ako niadtong mga panihapon nga siya ug si Lolo aduna kada Dominggo. Sila kanunay midapit sa tibuok pamilya.”
Sama sa unsa kaha nga makaila ni Lola ug Lolo? Si Zoe naghunahuna.
Si Zoe naminaw ngadto sa iyang pamilya nga nag-asoy og daghan pa nga mga istorya mahitungod sa iyang mga apohan. Gusto siyang maminaw mahitungod kanila, apan mibati usab siya og gamay nga walay labut. Siya walay bisan unsa nga mga panumduman nga ikapakigbahin.
Paglabay sa pipila ka adlaw siya didto sa balay sa iyang magulang nga ig-agaw nga si Lily. Diha sa higdaanan ni Lily mao ang usa ka monyeka nga panapton.
“Nindot kaayo siya!” Miingon si Zoe. Hinay niyang gihikap ang sinina sa monyeka.
“Gihatag siya ni Lola ngari kanako,” miingon si Lily. “Kanunay siyang mibuhat og maayo nga mga butang sama niana. Gimingaw ako sa tinuod kaniya.”
“Gimingaw sab ako niya,” miingon si Zoe. Dayon mikusmod siya. Unsaon niya pagkamingaw sa usa ka tawo nga wala pa gayud niya mahimamat?
Sa pagkasunod semana si Zoe kanunay naghunahuna mahitungod sa iyang mga apohan. Sa matag higayon nga ang usa ka tawo mag-istorya mahitungod kanila, bation niya ang kahaw-ang sa iyang kasingkasing.
“Ako wala gani gayud nakahimamat ni Lola ug Lolo,” misulti si Zoe ni Papa usa ka gabii. “Nganong ako masulub-on kaayo nga wala na sila?”
Mipahiyom si Papa. Nanghupaw siya og hinay. “Ang inyong mga apohan nahigugma sa ilang pamilya labaw kay sa bisan unsa.” Ang iyang tingog ingon og milubad. “Nahibalo ako nga kana wala mausab human sila namatay. Pinangga kaayo ka nila. Ug sila nagdasig kanimo samtang ikaw nagtubo.”
Gipatingog ni Papa ang iyang mga tudlo. “Hoy, ako adunay ideya. Tingali kita kinahanglan nga adunay usa ka espesyal nga leksyon sa pamilya aron sa pagtabang kaninyo nga mas makaila sa inyong mga apohan.”
“Nindot kanang paminawon,” miingon si Zoe.
Mipahiyom si Papa og usab. “Makakat-on ka sa tanang matang sa makalingaw nga mga butang, sama kon giunsa ni Lola sa pagsulat og mga binuang nga mga awit alang sa iyang mga apo.”
Nangandoy si Zoe nga siya adunay usa ka awit nga gisulat sa iyang lola.
Pagkasunod gabii, ang pamilya nagpundok sa pagpakigbahin og paborito nga istorya mahitungod ni Lola ug Lolo. Gani gipakigbahin nila ang pipila sa mga binuang nga mga awit nga gisulat ni Lola!
Sa katapusan sa leksyon, milingi si Mama ngadto ni Zoe. “Ako nahibalo nga ikaw naghunahuna kanunay mahitungod sa imong mga apohan,” miingon siya. “Sa umaabot nga panahon mahimamat nimo sila. Hangtud niana, si Papa ug ako naghunahuna nga kini tingali makatabang kanimo nga mobati nga mas duol ngadto kanila.” Si Papa mitunol ni Zoe og usa ka litrato ni Lola ug Lolo.
Si Zoe mibati og kalipay samtang siya mitan-aw sa litrato sa iyang mga apohan. Pila ka adlaw siya sa katapusan makahimamat kanila!
Ako gusto nga makakat-on mahitungod sa akong pamilya. Gusto ako nga mahibalo sa akong pamilya ug mahibalo sa kasaysayan sa akong mga katigulangan. Malipayon ako nga ang ubang mga tawo makatabang kanako nga mahibalo pa og dugang mahitungod sa akong pamilya.
Enzo R., edad 9, Rio Grande do Sul, Brazil
Mga paghulagway pinaagi ni Joanne Lew Vriethoff