Usa ka Mensahe Gikan sa Propeta
Gihigugma Ko Kamo
Gisagop gikan sa “Restoration Conversations with President Russell M. Nelson,” video collection, Gospel Media library.
Si Presidente Nelson nakighimamat sa pipila ka mga bata sa Primary diha sa usa ka balay nga troso sa Palmyra, New York, USA. Kini ingon og ang balay diin si Joseph Smith mipuyo sa dihang siya nakakita sa Unang Panan-awon. Ania ang pipila ka mga butang nga gipakigbahin ni Presidente Nelson uban sa mga bata.
Tanang mga Anak sa Dios
Dili igsapayan kon diin kamo natawo o unsa nga bandera ang inyong giwagayway o unsa nga pinulongan ang inyong gisulti. Kitang tanan mga anak sa Langitnong Amahan, ug kita magdako nga mahisama Kaniya.
Paninguha ug mga Ganti
Ang pagka-propeta nagkinahanglan og daghang trabaho ug daghang pagtuon. Ang tanang butang nga buhaton nga mahimong mas mahisama sa Manluluwas nagkinahanglan og paninguha. Sa dihang ang Dios gustong mohatag sa Napulo ka mga Sugo ngadto kang Moises, diin Niya gipaadto si Moises? Sa ibabaw sa Bukid sa Sinai. Busa si Moises kinahanglang molakaw hangtud sa ibabaw niana nga bukid aron kuhaon ang Napulo ka mga Sugo. Ang Ginoo gusto og paninguha, tungod kay ang paninguha nagdala og mga ganti nga dili moabut kon wala kini.
Ang Pamilya sa Propeta
Kami mga ginikanan sa napulo ka mga anak, siyam ka matahum nga anak nga mga babaye ug usa ka anak nga lalaki. Duha kanila nagpuyo sa langit karon. Sila dihay usa ka mubo nga panahon dinhi sa yuta, ug sila nagdasig kanato didto sa langit. Gihiusa kami sa kaminyoon sa templo, nga nagpasabut nga kami mag-uban hangtud sa kahangturan human kaming tanan nakaangkon sa among gamay nga panahon dinhi sa yuta.
Usa ka Resipe alang sa Kalipay
Ang mga kasulatan sama sa usa ka basahon sa pangluto. Kon ikaw walay basahon sa pangluto, ug magsugod ka lamang sa pagsagul-sagol sa harina ug gatas ug mga itlog, mahimong dili maayo ang imong cake. Ang Dios naghatag kanato og usa ka resipe alang sa kalipay, ug kini gitawag og mga sugo.
Ang pulong nga sugo ingon og usa kini ka mando, sama o gisugo kita kon unsay buhaton. Apan sa tinuod kini usa ka linaktod nga pagkat-on. Sama pananglit, Siya misugo kanato sa dili pag-inom og alak o sa pagpanabako ug uban pang mga matang nga makadaot. Ngano? Aron nga kamo mas mabuhi og dugay ug mas malipayon. Sa inyong hunahuna ako mabuhi kaha og 95 anyos ang panuigon kon ako manigarilyo ug moinom pa? Dili. Ug ako malipayon. Ug ako maka-ski uban sa akong mga apo.
Usa ka Talagsaong Butang
Ang paghinulsol nagpasabut nga kada adlaw, kita mas maninguha pa og gamay ug mas mobuhat pa og gamay nga aron mahimong sama ni Ginoong Jesukristo. Ako naghinulsol gihapon. Kada adlaw ako naninguha nga makakat-on pa og dugang ug mahimong mas mahisama nga ang Ginoo gusto nga ako mahimo. Ug kana dili usa ka silot. Kana usa ka malipayon nga oportunidad. Kada adlaw, ako molukso gikan sa higdaanan inig ka buntag ug moingon, “Ah, usa ka talagsaong butang ang mahitabo karon! Himoon ko nga mas mahisama ni Jesus.”
Mga paghulagway pinaagi ni David Habben