Usa Lamang ka Taxi
Ang tagsulat nagpuyo sa Amihanang Carolina, USA.
“Tabangi kami nga makakita og usa lang ka taxi aron kami makahimo sa pag-adto sa simbahan karong adlawa,” ang mga batang babaye nag-ampo.
“Kanunay akong adunay malipayong pagbati kon ako mosimba” (Children’s Songbook, 157).
Kini nga istorya nahitabo sa Cantabria, Spain.
“Unsaon nato pag-adto sa simbahan karong adlawa?” Ang gamay nga igsoong babaye ni Ellie, si Peppa, nangutana. “Kusog kaayo ang ulan!”
“Ayaw kaguol,” miingon si Ellie. “Mga isug kita!”
Mitabang si Ellie ni Peppa sa pagbutones sa iyang kupo. Dayon gikuha niya ang iyang kaugalingong mga botas.
Si Ellie ug Peppa milakaw sa gawas uban ni Mami ug Papi. Mas misamot og kakusog ang ulan. Ang hangin mibali sa ilang payong. Si Ellie wala na kaayo mobati og kaisug.
“Unsa ang kinahanglan natong buhaton?” Nangutana si Ellie. Lisud ang paglakaw ngadto sa bus tungod sa kakusog sa unos.
“Magtaxi lang hinoon ta,” miingon si Papi.
“Maayo nga ideya,” miingon si Mami. “Tana!”
Sila milakaw diha sa nagbaha nga dalan. Walay taxi o mga awto nga milabay kanila. Bisan ang panadería (bakery) sirado.
Sa katapusan sila nakakita sa lugar diin ang mga taxi miparking sa pagpasakay og mga tawo. Apan ang unang luna nga parkinganan sa taxi walay sulod.
“Ay wala!” Si Peppa miingon.
“Ok ra. OK ra,” miingon si Ellie. “Tingali anaa pay taxi. Dili pa lamang nato makita kini.”
Mipaduol sila. Ang sunod luna nga parkinganan walay sulod usab.
“Karon unsa man?” nangutana si Peppa.
“Kahibalo ko,” miingon si Ellie. “Mag-ampo ta.”
Ang mga batang babaye mihunghong og pag-ampo. “Among Langitnong Amahan, palihug tabangi kami sa pagpangitaita og taxi aron kami makahimo sa pag-adto sa simbahan karong adlawa. Kami naninguha sa pagpili sa matarung, ug kining ulan naghimo niini nga malisud. Sa ngalan ni Jesukristo, amén.” Si Ellie nagkat-on pa og Kinatsila, busa gisagol niya ang Ingles ug Kinatsila.
Naglakaw pa sila og diyutay. Ang sunod dapit sa parkinganan walay sulod usab.
“Tingali kita kinahanglang mobalik ug mopauli sa panimalay,” misinggit si Papi ngadto sa hangin.
“Basa kaayo ang atong mga tiil!” miingon si Mami.
“Adto ta layo-layo lang og gamay,” miingon si Ellie. “Kinahanglan lang gyud nato ang usa ka taxi.”
Karon makita na nila ang katapusan nga luna sa parkinganan.
Didto, uban sa berde niining suga nga nagsiga, mao ang usa ka taxi!
Si Ellie ug Peppa misakay sa taxi. Gitabangan sila ni Mami sa paghusay sa ilang buhok. “Pasayloa mi nga nabasa ang imong mga lingkuranan,” miingon si Papi ngadto sa drayber.
Sila miabut sa chapel ug mitimbaya sa ilang mga higala uban sa mga besos ug abrazos (mga halok sa aping ug mga paggakos).
“Dili ako makatuo nga kita nakakita og usa ka taxi,” miingon si Mami. “¡Ka werte!”
“Dili kini swerte,” miingon si Ellie. “Si Peppa ug ako nag-ampo nga ang Langitnong Amahan motabang kanato nga makaadto sa simbahan. Ug Siya naminaw!”
Mga paghulagway ni Patricia Geis