Ang Pag-ampo alang sa Piraso nga Pan
Ang tagsulat nagpuyo sa Utah, USA.
Unsaon nimo pagkahibalo kon ang Espiritu Santo nakigsulti kanimo?
“Itugyan ang imong pagsalig diha niana nga Espiritu nga nagtultol sa pagbuhat og maayo” (Doktrina ug mga Pakigsaad 11:12).
“Unsaon nimo pagkahibalo nga ang Espiritu Santo nakigsulti kanimo?” Si Carver mihangad gikan nagtan-aw sa iyang mga kasulatan.
Mipahiyom si Papa ug gibutang ang iyang Dali, Sunod Kanako nga basahon. “Ang Espiritu Santo makasulti nganha kanimo sa daghang mga paagi. Usahay kini usa ka pagbati o ideya nga mosulod sa imong hunahuna.”
Mikusmod si Carver. “Apan unsaon nimo pagkahibalo nga kini ang Espiritu Santo?”
“Tingali kita makalitok og mag-ampo aron sa pagtabang kanato og pangita sa tubag,” miingon si Mama.
Ang usa sa mga igsoong babaye ni Carver militok sa pag-ampo. Dayon nanlakaw sila padulong sa eskwelahan. Gihunahuna ni Carver ang mahitungod sa iyang pangutana sa tibuok adlaw.
Sa dihang siya miabut sa panimalay, nanimaho og lami ang balay. “Pan!” Misinggit si Carver.
“Husto kana,” miingon si Mama. “Mihimo ako og pipila ka pan aron atong ipakigbahin ngadto sa uban.”
Mitan-aw si Carver sa iyang igsoong mga babaye. Gikusnot ni Eva ang iyang ilong. Gipasaka ni Jane ang iyang kilay. “Imong gipasabut nga kita dili makakaon niini?” Si Jane nangutana.
“Gusto namo nga magpraktis sa pagpaminaw sa Espiritu Santo,” miingon si Papa. “Busa si Mama nakahunahuna og usa ka ideya.”
Sila matag usa mag-ampo aron mangutana sa Langitnong Amahan kon kinsa kaha ang nagkinahanglang mobati nga gihigugma karong adlawa. Dayon sila mohatag niana nga tawo og pan.
Miluhod si Carver sa kilid sa iyang katre. Siya buot nga makadungog sa Espiritu Santo, apan sama sa unsa ang tingog sa Espiritu Santo? Siya miginhawa og lawom ug mipiyong sa iyang mga mata.
“Langitnong Amahan, kinsa ang nagkinahanglan og pan karon?”
Si Carver naningkamot sa pagpaminaw sa Espiritu Santo, apan siya walay nadungog nga bisan unsa. Dayon nakahinumdom siya nga moagi sa balay ni Sister Smith inig pauli sa panimalay gikan sa eskwelahan. Kanunay siya nga mowarawara kaniya. Tingali ganahan siya og pan. Perpekto!
Si Mama mihatag og mga kard nga sulatan og mubo nga sulat alang sa mga tawo nga ilang bisitahan. Misulat si Carver, “Minahal nga Sister Smith, nag-ampo ako nga mahibalo hain nga tawo ang akong kinahanglan nga hatagan niini nga pan. Naghulat ako og pag-aghat, ug DAYON! miabut ka sa akong hunahuna. Nahigugma, Carver.”
Sa dihang nagdrayb si Mama ngadto sa balay ni Sister Smith, gikuha ni Carver ang iyang piraso nga pan ug milakaw padulong sa atubangan nga pultahan. Gibati niya ang kakuyaw. Unsa kaha kon si Sister Smith dili ganahan og pan? Unsa kaha kon ang pagbisita kaniya ideya lamang sa iyang utok ug dili sa Espiritu Santo?
Dayon nakahinumdom si Carver og laing butang nga gisulti ni Mama. Miingon siya nga kon kini usa ka maayo o mabination nga ideya, kamo dili kinahanglang maguol nga basin kini imo lamang kaugalingon nga hunahuna. Ang nindot nga mga butang kanunay nga maayong buhaton! Miginhawa og lawom si Carver ug gibagting ang kampana sa pultahan.
Giablihan ni Sister Smith ang pultahan. “Kumusta, Carver! Unsay nagdala kanimo dinhi?”
Gihatag ni Carver kaniya ang iyang piraso nga pan. Gitan-aw niya ang iyang sapatos, dayon balik ni Sister Smith. “Gusto ka ba og pan nga hinimo sa balay?”
“Ako kining paborito!” Mipahiyom siya. “Daghan kaayong salamat.”
Mipahiyom usab si Carver. “Walay sapayan!” Dayon daghan pang mga pulong ang misulod sa iyang hunahuna. Gisunod niya ang pag-aghat dihadiha dayon. “Ang Langitnong Amahan nahibalo nga kini imong paborito. Siya nahigugma kanimo pag-ayo!”
Ang mga mata ni Sister Smith misugod sa pagkislap. “Nalipay ako nga Siya makasalig kanimo sa pagpaminaw Kaniya.”
Gibati ni Carver ingon ka gaan sama sa usa ka balloon. Miwara-wara siya ni Sister Smith ug milakaw balik ngadto sa awto. Karon nahibalo na siya nga ang paghatag ni Sister Smith sa pan usa ka pag-aghat sa Espiritu Santo. Siya naghinam-hinam sa pagpaminaw ngadto sa Espiritu Santo pag-usab!
Mga paghulagway pinaagi ni Hollie Hibber