ការអញ្ជើញឲ្យចូលរួមដៃជំនួយ
អ្នកអាចជួយដូចព្រះយេស៊ូវគ្រីស្ទ !
ពេលព្រះយេស៊ូវ នៅលើផែនដី ទ្រង់បានជួយមនុស្សគ្រប់គ្នាដែលទ្រង់បានជួប ។ ទ្រង់បានផ្តល់អាហារដល់អ្នកដែលស្រេកឃ្លាន ។ ទ្រង់បានលួងលោមដល់អ្នកទាំងឡាយណាដែលក្រៀមក្រំ ។ ទ្រង់បានបង្រៀនមនុស្សគ្រប់គ្នាអំពីដំណឹងល្អរបស់ទ្រង់ ។ ព្រះយេស៊ូវសុំឲ្យយើងធ្វើតាមទ្រង់ ។ នៅពេលយើងបានទទួលពិធីបុណ្យជ្រមុជទឹក យើងសន្យាដើម្បីព្យាយាមធ្វើអ្វីដែលទ្រង់បានធ្វើ ។
សព្វថ្ងៃមានមនុស្សជាច្រើននៅក្នុងពិភពលោកត្រូវការជំនួយរបស់យើង ។ ខ្លះឯកោ ។ ខ្លះស្រេកឃ្លាន ។ ខ្លះត្រូវចាកចេញពីផ្ទះរបស់ពួកគេ ។ ខ្លះមិនធ្លាប់បានឮដំណឹងល្អនៅឡើយទេ ។ យើង ម្នាក់ៗ អាច ធ្វើអ្វីមួយដើម្បីជួយ ។
អ្វីដែលក្រុមដៃជំនួយរបស់អ្នកអាចជួយ
កុមារអាចផ្លាស់ប្តូរពិភពលោកជាមួយនឹងដួងចិត្តដែលពេញដោយសេចក្តីស្រឡាញ់ និងដៃជំនួយរបស់ពួកគេ ។ ប្រហែលជា ១០០ឆ្នាំមុន កុមារថ្នាក់បឋមសិក្សាបានជួយសង់មន្ទីរពេទ្យមួយនៅទីក្រុង សលត៍លេក ស.រ.អ ។ ជារៀងរាល់សប្តាហ៍ ពួកគេបាននាំយកប្រាក់កាក់សម្រាប់មន្ទីរពេទ្យថ្មី ។ នៅពេលមន្ទីរពេទ្យនោះបានបើកដំណើរការនៅឆ្នាំ ១៩២២ វាត្រូវបានដាក់ឈ្មោះថា មន្ទីរពេទ្យកុមារបឋមសិក្សា ។ នោះក៏ព្រោះតែកុមារទាំងនោះបានជួយសាងសង់វាឡើងបន្តិចម្តងៗ !
ពេលអ្នកក្រឡេកមើលជុំវិញខ្លួន អ្នកនឹងរកឃើញមនុស្សជាច្រើនដែលអ្នកអាចជួយ ។ អ្នកអាចចែកចាយដំណឹងល្អតាមរយៈរបៀបដែលអ្នករស់នៅ និងបម្រើអ្នកដទៃ ។ អ្នកអាចជួយពួកគេឲ្យទទួលអារម្មណ៍ពីសេចក្ដីស្រឡាញ់របស់ព្រះវរបិតាសួគ៌ ។
ការអញ្ជើញឲ្យមកជួយ
ឆ្នាំនេះ យើងសូមអញ្ជើញអ្នកឲ្យប្រើដួងចិត្តដែលពេញដោយសេចក្តីស្រឡាញ់និងដៃជំនួយរបស់អ្នកដើម្បីជួយអ្នកដទៃ ។ អារម្មណ៍រីករាយដែលអ្នកមាននៅពេលអ្នកជួយនរណាម្នាក់គឺកើតចេញពីព្រះវិញ្ញាណបរិសុទ្ធ ។ វាធ្វើឲ្យអ្នកដឹងថាព្រះវបិតាសួគ៌សព្វព្រះទ័យខ្លាំងណាស់ចំពោះកិច្ចខំប្រឹងប្រែងរបស់អ្នក ។
រចនារូបភាព ដោយ លីស៍ ប្រ៊ីហ្ស៊ី