O Se Lagona Mafanafana
E alala le tusitala i Kuatemala, Kuatemala.
“O le a Ou siomia ai oe i lima o lo’u alofa” (Mataupu Faavae ma Feagaiga 6:20).
O se taeao matagofie ma manino i San Jose Pinula, o se aai laititi e lata ane i le Aai o Kuatemala. “Ua le mafai ona ou faatali.” O le tala lea a Iosua i lona tuafafine laitiiti. O le asō le aso o lona papatisoga!
Ina ua taunuu le aiga i le lotu, na laei Iosua ma Papa i ofu papa’e. I le taimi muamua, sa i ai sina lagona fefe popole ia Iosua. Ae sa uu e Papa lona lima a o la savavali atu i lalo o le sitepu i totonu o le faatanoa, ma sa ia le lagonaina se popole tele. Ina ua alu ae i luga Iosua mai le vai, sa vaaia i ona foliga le fiafia tele.
Na sui Iosua ma Papa i ofu mago. Ona tuu atu lea e Papa ma le uso o le tamā o Iosua ma tamāmatua o latou lima i luga o le ulu o Iosua. Sa latou faamauina o ia o se tagata O Le Ekalesia a Iesu Keriso o le Au Paia o Aso e Gata Ai. Sa faalogo Iosua o faimai Papa, “Talia le Agaga Paia.”
“Ua ou fiafia lava!” na ia fai mai ai a o ia fusi ia Papa.
“Manatua folafolaga na e faia i le asō,” na fai atu ai Papa. “Afai e te faia, e mafai ona mafuta pea le Agaga Paia ma oe i taimi uma. O le a le tuua lava na o oe.”
I se tasi taeao i ni nai masina mulimuli ane, sa ala ae ai Iosua o tagi. Sa matua tiga tele lona manava! “Mama!” Sa ee Iosua mai lona moega. “Ua matua tiga tele lo’u manava!”
Sa faasolo ina faateteleina le tiga o lona manava. Sa le mafai foi ona savali o ia. Sa tuuina atu e Papa se faamanuiaga faaleperisitua ia Iosua, ona la o ai loa lea ma Mama e ave o ia i le falemai.
Na fai mai le fomai sa manaomia ona faia se taotoga o Iosua i le taimi lava lena. Sa foliga taufaafefe.
“O le a matou aveina oe i se potu faapitoa mo le taotoga,” o le tala lea a le fomai. “E te le lagonaina se mea, aua o le a e moe. Ma o le a faatalitali ou matua mo oe i fafo.”
Sa atili ai ona lagona e Iosua lona fefe. Aisea na le mafai ai ona nonofo ona matua ma ia i totonu o le potu? Sa le mafai ona taofi lona tagi.
Sa fai atu lemu Mama. “O le a se mea e mafai ona ma faia e fesoasoani ai ia te oe ia maua se lagona lelei?” na ia fai atu ai.
“Ua ou iloa le mea e mafai ona tatou faia,” o lana tala lea. “Faamolemole usu faatasi ma a’u le ‘O Au o se Atalii o le Atua’. Ona fai lea o se isi a tatou tatalo.”
A o latou pepese lemu, na manatua e Iosua le usuina o lena pese i lona papatisoga. Ma a o latou tatalo, sa ia mafaufau i le mea na fai mai ai Papa i le aso o lona papatisoga: “E mafai ona faatasi pea le Agaga Paia ma oe. O le a le tuua lava na o oe.”
Sa lagona lava e Iosua le fefe a o ave atu o ia e tausima’i i totonu o le potu o taotoga. Sa le mafai ona ia vaaia foliga o le fomai ma tausimai aua sa latou faia ni tali fofoga. Ae ina ua ia tilotilo atu i o latou mata, sa ia iloa ai o i latou o ana uo ma o le a tausia lelei o ia.
Ina ua maea lona taotoga sa ta’u atu e fomai e manaomia ona malolo ia Iosua. Sa vaivai lava ma tigaina o ia, ae sa sologa lelei le tiga i lona manava. Sa na le toe lagona le fia tagi. Sa ia iloaina lava o le a lelei mea uma mo ia.
“Sa ou lagonaina se mea i lo’u loto,” o le tala lea a Iosua ia Mama ma Papa. “O se faalogona mafanafana.”
“O se tasi lena o auala tatou te lagona ai le Agaga Paia,” o le tala lea a Mama.
Sa luelue le ulu o Iosua. Sa fiafia o ia ona sa ia te ia le meaalofa o le Agaga Paia. Ona o le Agaga Paia, o le a le tuua lava na o ia.
Ata na tusia e Glenn Harmon