‘Aui i le Alofa
O le tusitala e nofo i West Midlands, Egelani.
“O le Agaga Paia [o le a] faamafanafanaina i tatou, la tatou uo moni, e faavavau” (Children’s Songbook, 105).
Sa tu-tu e Abby ona tamatama’ivae i luga o le fola. Sa fiafia tele o ia na peisea’ī ua gaogao ai lona manava. Sa i ai o ia i se papatisoga. Ma e le o se isi lava papatisoga —o lona papatisoga! Sa usuina faatasi e Abby, lona aiga, ma ana uo se pese a le Peraimeri, tatalo, ma faalogologo i le lauga a Tinamatua. O le taimi nei, na o le pau lava le mea o loo totoe o le lauga a Tamamatua a o lei papatisoina o ia.
Sa savali atu Tamamatua i luma o le potu ma faa’ivi atu lona mata ia te ia. Sa ia faataatia se ato lapoa i luga o le fola. “Abby, ua matou fiafia lava i lau filifiliga ina ia papatisoina i le asō,” o lana tala lea. “O le papatisoga o se aso e tumu i meaalofa. Ua e tuuina atu le meaalofa o se faataitaiga i nai ou tei.” Sa ataata atu o ia i tei laiti e toafā o Abby.
“Ua e tuuina atu foi folafolaga i le Atua,” o le tala lea a Tamamatua. “Ma ua Ia tuuina mai ia te oe folafolaga. Ae o loo i ai se isi meaalofa telē e te maua i le asō.”
Sa punou Tamamatua ma aapa atu i totonu o le ato. Sa ia toso mai i fafo se palanikeke paepae ma tuu atu ia te ia. “O se meaalofa lenei mai ia te au ma Tinamatua. Ae o se faamanatu foi o le meaalofa o le Agaga Paia lea o le a e mauaina i le asō. Pe a e faaaogaina lenei palanikeke, ou te manao ia te oe e mafaufau pe faapefea lagona o le Agaga Paia. E mafai e le Agaga Paia ona faamafanafana ia te oe e pei o se palanikeke vaivai. E mafai foi ona taialaina ai oe ma ta’u atu ia te oe le mea sao.”
Sa toso e Abby le palanikeke i luga o ona tauau. Sa ataata atu o ia ia Tamamatua. Ina ua uma lana lauga, sa ia matauina faalogona o le palanikeke. Sa mafanafana. Sa faamafanafanaina ai ia. Sa fesoasoani ia te ia e lagona ai le saogalemu.
Mulimuli ane, na oo i le taimi e papatisoina ai Abby. Sa savali atu o ia i totonu o le faatanoa vai mafanafana ma uu le lima o Papa. Sa ia tepa atu i ona tuagane ma ona uso ma ataata atu ia i latou a o lei moeiini ona mata.
Sa leotele Papa ae sa toafilemu a o ia faia le tatalo o le papatisoga i le gagana Farani. “Je te baptise au nom du Père, et du Fils, et du Saint-Esprit. Amene.”
Na vave ona pa’i atu le vai mafanafana ia Abby, ona, faapena foi lea ona faataalise le toe toso ae o ia i luga. O lena lava. Ua papatisoina o ia!
Sa fusi e Abby ia Papa ma alu i fafo o le faatanoa. Sa ia sui mai lona ovalola ma faamaulu lona ofu soloatoa. Ina ua ia laa atu i fafo, sa faatalitali Maman (Tina) ma ana uo o Isobel ma Florence mo ia. Sa la fesoasoani e nonoa le fusi i le pito i tua o lona ofu soloatoa ma selu lona lauulu o loo sūsū.
“Ua matou matuā mitamita lava ia te oe,” o le tala lea a Tina.
Sa ataata atu Florence ia Abby i le fā’ata. “Ou te fiafia lava e matamata i papatisoga.”
“Lea, o le mea lea sa i luga o lou nofoa.” Sa tuu atu e Isobel ia Abby lona palanikeke paepae fou.
Na uu mau e Abby le palanikeke a o talanoa ma taliē Tina ma ana uo. Sa mafanafana le palanikeke ma sa faamafanafanaina, e pei lava ona sa fai atu ai Tamamatua. Ae e le na’o fafo sa ia lagonaina ai le mafanafana. I totonu, sa lagona foi e Abby le lelei ma le saogalemu. Sa ia iloaina i lona loto sa ia faia le filifiliga sao ma sa fiafia le Tama Faalelagi.
O lenei lagona mafanafana ma le fiafia sa pei lava o lana palanikeke. O le Agaga Paia lava lea!
Sa ataata atu Abby ia te ia lava i le fa’ata. Sa tau le mafai ona ia faatali ia faamauina ma maua le meaalofa o le Agaga Paia ina ia mafai ai ona ia maua lea lagona i taimi uma. O le a avea ma se meaalofa sili ona lelei.
Ata na tusia e Maryn Roos