O Paionia i Atunuu Uma
Vicky Tadić
Uluai Tagata Liliu Mai i Bosnia ma Herzegovina
“Pe o le Agaga Paia ea lena?” O le fesili lea a Vicky.
“Sau ia!” Na valaau atu ai le tuagane o Vicky. “Ta o e taaalo ma le au Rowes!”
O le au Rowes o o la tuaoi fou. Sa latou siitia atu i Bosnia ma Herzegovina mai le Iunaite Setete. E tutusa lava le matutua o a latou fanau ma Vicky ma nai ona tei. Ae latou te le tautatala i le gagana Bosnia. Na o Vicky lava le tagata o lona aiga na tautala faa-Peretania. Sa ia faaliliu ina ia mafai ona latou taaalo faatasi.
Sa nonofo faatasi Vicky ma Mrs. Rowe i luga o le poletito a o taaalo isi tamaiti.
“E foliga mai e ese lava lou aiga,” o le tala lea a Vicky. “I se ala lelei.”
Sa ataata Mrs. Rowe. “E te fia sau i le lotu ma i matou? E ono fesoasoani lena mea ia te oe e iloa ai le pogai ua ese ai i matou. E leai se fale o le matou lotu iinei i Bosnia, o lea e fai ai le matou lotu ma lo matou aiga i le fale.”
Sa naunau lava Vicky i le fiailoa ina ua taunuu i le fale o le au Rowe i le Aso Sa. Na muamua ona latou usuina se pese. Sa fai e se tasi o tamaiti se tatalo. Ona tatalo lea o Mr. Rowe ma tufatufa atu le falaoa ma le vai i tagata taitasi. Sa latou fai mai na taua lena o le faamanatuga. Ina ua mavae lena o se tasi o lo laua afafine, o Jessie, afafine, o Jessie, na tuuina atu se tautalaga.
“E alofa le Tama Faalelagi ia i tatou. E fetalai mai o ia ia i tatou e ala i le Agaga Paia, “o le tala lea a Jessie. “O nisi taimi e tuuina mai ai e le Agaga Paia ia i tatou se lagona toafilemu. Po o nisi taimi na te tuu mai ia i tatou se manatu.”
O le aso na sosoo ai, na savali atu ai Vicky i le faleoloa e faatau mai se falaoa. A o savali o ia i le fale, sa toeitiiti lava a ia pasia ni kalone lapisi ae taofi loa e se leo i lona mafaufau. Aua e te alu i ai, na faapea mai ai le leo.
Na tu faasasa’o Vicky. Na faafuasei lava ona oo mai se taavale ma faataamilo i le tulimanu. TAIA! Na taiaina kalone lapisi.
Sa manavanava loloa ia Vicky. Na matuai fiafia o ia ona sa ia faalogo i le leo!
Mulimuli ane, na faamatala atu e Vicky le tala ia Mrs. Rowe. “Pe o le Agaga Paia ea lena?”
“E foliga mai e sa’o. O nisi taimi e lapataia i tatou e le Agaga Paia i se tulaga lamatia.”
“Na puipuia au e le Atua,” na fai mai ai Vicky. “O le a ou faalogo lava e le aunoa i le Agaga Paia.”
Sa faaauau pea ona alu Vicky i le fale o le au Rowes mo le lotu i Aso Sa taitasi. Ona faasoa atu lea e Vicky o le Tusi a Mamona i lona tina. E lei umi ae aoao loa lona aiga atoa e uiga i le talalelei mai i le au Rowe. Sa faaliliu Vicky mo tagata uma.
I se tasi aso na fesili atu ai Mr. Rowe i le aiga o Vicky. Na toe fai atu e Vicky i le gagana Bosnia. “Faamata o le a outou mulimuli i le faataitaiga a Iesu Keriso e ala i le papatisoina?”
Sa faatalitali Vicky. Sa manao o ia ina ia papatisoina. Ae sa popole lava o ia i se tala o le a fai mai ai lona aiga.
Mulimuli ane, na tautala mai le tama o Vicky. “Da.”
“Da,” o le tala lea a lona aiga.
Sa matuai fiafia Vicky sa ia lagonaina e pei o le a pa lona loto. “Ioe,” sa ia fai atu ai ia Mr. Rowe. “Ioe, o le a matou faia.”
I le tasi le vaiaso mulimuli ane, na tietie atu ai Vicky ma lona aiga mo le lima itula i le falesa na sili ona latalata ane a le Ekalesia. Sa lagona e Vicky le fiafia a o laa atu o ia i totonu o le vai ina ia papatisoina. Sa sili atu lona fiafia ina ua faamauina o ia o se tagata o Le Ekalesia a Iesu Keriso o le Au Paia o Aso e Gata Ai.
O lea o le a ia maua le Agaga Paia e faatasi ma ia i taimi uma.
O Bosnia ma Herzegovina e 73 tagata o le Ekalesia e i ai.
O le malumalu aupito lata ane i Bosnia ma Herzegovina o le malumalu o Roma i Italia.
O Bosnia ma Herzegovina e tu i saute sasa’e o Europa.
E fiafia Vicky i fafo. O le savaliga sopo o se tasi lea o mea e sili ona ia fiafia e fai.
Sa papatisoina Vicky i le 16 o ona tausaga.
Ina ua matua Vicky, sa ia faaipoipo i le malumalu. Ua toalua nei lana fanau.
Ata na tusia e Zhen Liu