Mauaina o le Molimaua Sabrina
E alala le tusitala i Karolaina i Matu, ISA.
Sa le’i mautinoa e Sabrina pe i ai sana molimau.
“E ala i nei mea ona matou iloa o loo i ai se Atua i le lagi” (Mataupu Faavae ma Feagaiga 20:17).
Sa susue faasolosolo e Sabrina ma Tina itulau o le tusi o le papatisoga a Sabrina. Faatoa atoa le valu tausaga o Sabrina, ma e toe lua vaiaso oo i lona papatisoga. Sa fiafia o ia—ma ua i ai sina popole—pe a papatiso.
“Vaai i le tele o mea ua uma ona ta faia!” Na fai atu ai Tina. Sa ia susue faasolosolo i itulau. O le tusi e fesoasoani ai ia Sabrina e saunia ai mo le papatisoga. Sa la faatumuina itulau e faatatau i mea e sili ona ia fiafia i ai ma se isi itulau e uiga i lona aiga. Ona la oo atu lea i se itulau o i ai upu “O La’u Molimau” i le pito i luga.
“Ou te le manao e faatumu lena mea,” o le tala lea a Sabrina.
“Ua lelei,” o le tala lea a Tina, ao susue le itulau. “E mafai ona ta faatumuina mulimuli.”
“Ou te le o manatu ou te manao lava e faatumu,” o le tala lea a Sabrina.
“Aisea?” O le fesili lea a Tina.
“Aua ou te le iloa po o le a le molimau.” Sa lagona e Sabrina ona foliga ua mumu ma vevela.
Sa tu Tina. “O lona uiga o le iloa e alofa le Tama Faalelagi ia te oe.”
“Ae e lei tali mai lava le Tama Faalelagi i au tatalo.” Sa loimatā mata o Sabrina. “Sa ou tatalo mo se masina atoa ina ia maua lo’u palanikeke, ae ou te le’i mauaina lava!”
Sa fiafia Sabrina i lona palanikeke. E lanu piniki ma e vaivai. Sa gaosia e lona tinamatua mo ia i le taimi na fanau mai ai o ia. Sa moe ma ia i po uma a o lei leiloa.
Na opo mai e Tina ia Sabrina i ona lima. “O nisi taimi e le tali mai ai le Tama Faalelagi i a tatou tatalo i le taimi lava lena. Ma o nisi taimi o Lana tali o le leai. Ae e le faapea ai la Na te lei faafofogaina a tatou tatalo pe le alofa foi o Ia ia i tatou.”
Sa manava loloa Sabrina. “Masalo.”
I le Aso Sa, sa faitau ai e le faiaoga o le Peraimeri a Sabrina, o Sister Lee se tala mai le Uo. Sa faatatau i se tamaitiiti sa le fiafia ona sa ia faalogo i upu masoa i luga o le pasi. Sa ia tatalo e uiga i lona faafitauli. Ona i ai lea o sona manatu o le a ia faalogologo i ana meafaalogo i luga o le pasi. O lena manatu sa o se tali i lana tatalo.
“Oi! Na’o le pau lava lena?” Na fesili ai Sabrina. “Sa ou manatu o tali i tatalo sa sili atu nai lo lena! E pei o le faalogoina o se leo po o le vaai i se agelu.”
“O nisi taimi e moni lena mea,” o le tala lea a Sister Lee. “Ae o le tele o taimi, e tali mai le Agaga Paia i a tatou tatalo i ni auala filemu. E pei o se manatu po o se lagona mafanafana.”
Sa tilotilo atu Sabrina i le ata o le tamaitiiti i luga o le pasi. Sa ia mafaufau e uiga i le malamalama, ma le lagona fiafia sa ia te ia e uiga i le papatisoina. Atonu o le Agaga Paia lena na ta’u atu ia te ia o se filifiliga lelei.
Atonu sa i ai moni lava sana molimau.
Na oo mai le aso o le papatisoga o Sabrina. Na uu e lona tamā lona lima, ma sa ia laa atu i totonu o le vai mafanafana. Ina ua sau o ia i fafo mai le vai, sa ia lagona le fiafia. Ma ina ua faaee e Tama ona lima i luga o lona ulu ma tuu atu ia te ia le meaalofa o le Agaga Paia, sa ia lagonaina le mafanafana i mea uma.
O le Aso Sa na sosoo ai o le Aso Sa anapogi. Na o atu tagata e faasoa mai a latou molimau. Sa oso ese mai Sabrina mai lona nofoa ma savali atu i luga i le pito i luma o le falesa. Sa manava loloa o ia ma ataata. Na ia iloa le mea o le a ia fai atu ai. Ma sa ia iloa le mea o le a ia tusia i lena itulau avanoa i lana tusi o le papatisoga mulimuli ane.
Na te lei mauaina lona palanikeke i le taimi lava lena, ae ua ia mauaina lana molimau.
Ata na tusia e Amanda Smith