Mga Pioneer sa Matag Yuta
Vicky Tadić
Unang Kinabig sa Bosnia ug Herzegovina
“Mao ba kadto ang Espiritu Santo?” Nangutana si Vicky.
“Dali na!” Mitawag ang igsoon nga lalaki ni Vicky. “Tana magdula ta uban sa mga Rowes!”
Ang Rowes mao ang ilang bag-ong mga silingan. Mibalhin sila sa Bosnia ug Herzegovina gikan sa Estados Unidos. Sila adunay gagmay nga mga bata nga ka edad ni Vicky ug sa iyang mga igsoon. Apan dili sila makasulti og Bosnian. Si Vicky mao lamang sa iyang pamilya kinsa makasulti og Iningles. Iyang hubaron aron sila magkauban og dula.
Si Vicky milingkod uban ni Gng. Rowe diha sa balkon samtang ang ubang mga bata nagdula.
“Ang imong pamilya ingon og lahi,” miingon si Vicky. “Sa maayo nga paagi.”
Mipahiyom si Gng. Rowe. “Gusto ka nga mokuyog og simba uban kanamo? Kana mahimong makatabang kanimo nga makakita kon nganong kami lahi. Ang among simbahan walay building dinhi sa Bosnia, busa kami nagsimba uban sa among pamilya dinhi sa panimalay.”
Nakuryuso si Vicky sa dihang miabut siya sa balay sa mga Rowes sa pagka-Dominggo. Una nanganta sila og awit. Usa sa mga bata mihatag sa pag-ampo. Dayon si G. Rowe nag-ampo ug mipaambit sa pan ug tubig ngadto sa kada tawo. Sila miingon nga kini gitawag og sakramento. Human niana ang ilang anak nga babaye si Jessie, mihatag og pakigpulong.
“Ang Langitnong Amahan nahigugma kanato. Siya nagsulti ngari kanato pinaagi sa Espiritu Santo,” miingon si Jessie. “Usahay ang Espiritu Santo naghatag kanato og usa ka malinawon nga pagbati. O usahay maghatag Siya kanato og usa ka hunahuna.”
Sa pagkasunod adlaw, si Vicky miadto sa tindahan sa pagpalit og pan. Sa iyang pagpauli, hapit na siya moagi sa pipila ka mga basurahan sa dihang usa ka tingog diha sa iyang hunahuna mipahunong kaniya. Palayo, miingon kini.
Wala milihok si Vicky. Sa kalit, usa ka awto miabut nga mituliyok sa may eskina. BANG! Nabangga kini ngadto sa mga basurahan.
Miginhawa og lawom si Vicky. Siya nalipay kaayo nga siya naminaw ngadto sa tingog!
Wala madugay, si Vicky miasoy ni Gng. Rowe sa istorya. “Mao ba kadto ang Espiritu Santo?”
“Murag maingon kini. Usahay ang Espiritu Santo nagpasidaan kanato sa kuyaw.”
“Ang Dios mipanalipod kanako,” miingon si Vicky. “Ako maminaw kanunay sa Espiritu Santo.”
Si Vicky nagpadayon sa pag-adto sa balay sa mga Rowes alang sa pagsimba kada Dominggo. Dayon si Vicky mipakigbahin sa Basahon ni Mormon sa iyang mama. Sa wala madugay ang iyang tibuok pamilya nagkat-on mahitungod sa ebanghelyo gikan sa mga Rowes. Mihubad si Vicky alang sa tanan.
Usa ka adlaw si G. Rowe nangutana sa pamilya ni Vicky. Gibalik kini ni Vicky sa Bosnian. “Kamo mosunod ba sa ehemplo ni Jesukristo pinaagi sa pagpabunyag?”
Mihulat si Vicky. Gusto siya nga magpabunyag. Apan siya gikulbaan mahitungod sa unsay isulti sa iyang pamilya.
Sa katapusan, ang papa ni Vicky misulti. “Da.”
“Da,” miingon ang iyang pamilya.
Si Vicky nalipay kaayo nga gibati niya nga ang iyang kasingkasing ingon og mobuto. “Oo,” miingon siya ngadto ni G. Rowe. “Oo, among himoon.”
Usa ka semana ang milabay, si Vicky ug ang iyang pamilya nagdrayb sulod sa lima ka mga oras padulong sa labing duol nga building sa Simbahan. Gibati ni Vicky ang kalipay samtang siya mitunob ngadto sa tubig aron magpabunyag. Gani gibati niya nga mas nalipay sa dihang siya gikumpirmahan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw.
Karon siya makabaton sa Espiritu Santo uban kaniya sa kanunay.
Ang Bosnia ug Herzegovina adunay 73 ka mga miyembro sa Simbahan.
Ang labing duol nga templo sa Bosnia ug Herzegovina mao ang Templo sa Rome Italy.
Ang Bosnia ug Herzegovina nahimutang sa habagatang -silangan sa Europe.
Gusto ni Vicky ang gawas sa balay. Ang hiking mao ang usa sa iyang paborito nga buhaton.
Gibunyagan si Vicky sa edad nga 16.
Sa dihang si Vicky midako na, siya naminyo didto sa templo. Karon siya adunay duha ka mga anak.
Mga paghulagway ni Zhen Liu