Naputos sa Gugma
Ang tagsulat nagpuyo sa West Midlands, England.
“Ato siyang Higala ug maghuhupay” (Songbook sa mga Bata, 56).
Si Abby nagsige og dokdok sa iyang mga tudlo sa tiil diha sa salog. Naghinam-hinam siya pag-ayo nga ang iyang tiyan nagdaguok sa sulod. Diha siya sa usa ka bunyag. Ug dili lamang bisan unsa nga bunyag—iyang bunyag! Si Abby, iyang pamilya, ug iyang mga higala tanan mikanta og usa ka awit sa Primary nagdungan, nag-ampo, ug naminaw sa pakigpulong ni Lola. Karon, ang nahibilin na lamang mao ang pakigpulong ni Lolo sa dili pa siya bunyagan.
Si Lolo milakaw ngadto sa atubangan sa lawak ug mikidhat diha kaniya. Gibutang niya ang usa ka dakong bag diha sa salog. “Abby, kami mapagarbuhon kaayo sa imong pagpili nga magpabunyag karong adlawa,” miingon siya. “Ang bunyag usa ka adlaw nga puno og mga gasa. Ikaw naghatag og gasa sa usa ka ehemplo ngadto sa imong mga igsoon.” Mipahiyom siya sa upat ka manghud nga mga igsoon ni Abby.
“Naghatag ka usab og mga saad sa Dios,” miingon si Lolo. “Ug Siya naghatag kanimo og mga saad. Apan adunay laing usa ka dakong gasa nga imong makuha karong adlawa.”
Miyuko si Lolo ug mikuha sa bag. Siya mikuha og usa ka humok nga puti nga habol ug gitunol ngadto kaniya. “Kini usa ka gasa gikan kanako ug ni Lola. Apan kini usa usab ka pahinumdom sa gasa sa Espiritu Santo nga imong madawat karong adlawa. Kon gamiton nimo kini nga habol, gusto ko nga ikaw maghunahuna mahitungod sa unsa nga paagi ang Espiritu Santo mobati. Ang Espiritu Santo makahupay kanimo sama sa usa ka humok nga habol. Kini usab makagiya kanimo ug makasulti kanimo unsa ang matarung.”
Gitabon ni Abby ang habol sa iyang mga abaga. Mipahiyom siya ni Lolo. Ug samtang siya nahuman sa iyang pakigpulong, siya [Abby] nakabantay unsa ang iyang gibati sa habol. Kini init-init. Kini makahupay. Kini mitabang kaniya nga mobati nga luwas.
Sa katapusan, kini takna na alang ni Abby nga magpabunyag. Siya milakaw ngadto sa init-init nga tubig sa bunyaganan ug migunit sa kamot ni Papa. Siya mili-li sa iyang igsoong mga lalaki ug mga babaye ug mipahiyom kanila sa wala pa siya mopiyong sa iyang mga mata.
Ang tingog ni Papa kusog apan kalma samtang gipamulong niya ang pag-ampo sa bunyag sa pinulongan nga French. “Je te baptise au nom du Père, et du Fils, et du Saint-Esprit. Amen.”
Ang init-init nga tubig sa kalit mihasmag ni Abby, ug dayon, ingon usab ka dali, siya gibira pataas. Mao kadto. Siya nabunyagan na!
Si Abby migakos og hugot ni Papa ug misaka pagawas sa bunyaganan. Siya mihubo sa iyang saput sa bunyag ug misul-ob sa iyang sinina. Sa dihang siya migawas, si Maman (Mama) ug ang iyang mga higala nga si Isobel ug Florence naghulat kaniya. Mitabang sila sa paghigot sa laso diha sa luyo sa iyang sinina ug sa pagsudlay sa iyang basa nga buhok.
“Mapagarbuhon kaayo kami kanimo,” miingon si Maman.
Mipahiyom si Florence ni Abby diha sa samin. “Kanunay akong gusto nga motan-aw og mga bunyag.”
“Ania, imo kining nabiyaan sa imong lingkuranan.” Gitunol ni Isobel kang Abby ang iyang bag-ong puti nga habol.
Gigakos ni Abby ang habol samtang si Maman ug ang iyang mga higala nag-istoryahanay ug nagkinataw-anay. Ang habol init-init ug makahupay, sama lamang sa gisulti ni Lolo. Apan siya wala lamang mobati og kainit-init sa gawas. Sa sulod, si Abby mibati usab og ka maayo ug luwas. Nasayud siya diha sa iyang kasingkasing nga iyang gihimo ang husto nga desisyon ug nga ang Langitnong Amahan nalipay.
Kining init-init, malipayon nga pagbati sama kaayo sa iyang habol. Kini mao ang Espiritu Santo!
Si Abby mipahiyom sa iyang kaugalingon diha sa salamin. Dili na siya makahulat nga makumpirmahan ug makadawat sa gasa sa Espiritu Santo aron siya makahimo sa pagbati kanunay niini nga paagi. Kini mahimong mao ang labing nindot nga gasa sukad.
Mga paghulagway ni Maryn Roos