Hō’ē mana’o māhanahana.
Tē ora nei te ta’ata pāpa’i i Tuatemara.
« E fa’a’ati au ia ’oe i nā rima o tō’u nei here » (Te Parau Ha’api’ira’a ’e te mau Parau Fafau 6:20).
E po’ipo’i nehenehe ’e te māramarama taua taime ra i San Jose Pinula, hō’ē ’oire iti na’ina’i i pīha’i iho i te ’oire nō Guatemala. « ’Aita tā’u e nehenehe e tīa’i ! » ’Ua parau Joshua i tōna teina tuahine. I teie mahana tōna bāpetizora’a !
I muri a’e i te taera’a mai te ’utuāfare i te fare purera’a, ’ua ’ahuhia ’o Joshua ’e ’o pāpā i te ahu ’uo’uo. I te ha’amatara’a, ’ua huru taiā ri’i ’o Joshua. Terā rā, ’ua tāpe’a ’o pāpā i tōna rima ’a pou ai rāua i roto i te pape, ’e ’ua ’ore tōna taiā. I te taime ’a haere mai ai ’o Joshua i rāpae i te pape, e hōho’a mata ata rahi tōna.
’Ua taui ’o Joshua ’e ’o pāpā i te ’ahu marō. I muri iho, ’ua tu’u ’o pāpā ’e te mau tonton ’o Joshua ’e te pāpā rū’au i tō rātou rima i ni’a i te upo’o o Joshua. ’Ua ha’amau rātou iāna ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua fa’aro’o ’o Joshua ia pāpā i te paraura’a ē, « ’a fāri’i mai i te Vārua Maita’i ».
« ’Ua ’oa’oa roa vau ! » tāna ïa i parau ’a ’āpā ai ’oia ia pāpā.
« ’A ha’amana’o i te mau parau fafau tā ’oe i rave i teie mahana », ’ua parau pāpā. « Mai te mea e nā reira ’oe, e vai noa te Vārua Maita’i i pīha’i iho ia ’oe. E ’ore roa ’oe e vai noa ’o ’oe ana’e ».
I te hō’ē po’ipo’i, tau ’āva’e i muri mai, ’ua ara mai ’o Joshua ma te ta’i. E māuiui rahi tōna i te ’ōuma ! « Māmā ! » ’Ua tuō ’o Joshua nā ni’a mai i tōna ro’i. « Māuiui roa tō’u ’ōpū ! »
Te rahi noa atura te māuiui o tōna ’ōpū. ’Aita ’oia e nehenehe e haere. ’Ua hōro’a pāpā ia Joshua i te hō’ē ha’amaita’ira’a autahu’ara’a, ’e ’ua ’āfa’i rāua ’o māmā iāna e hi’o i te taote.
’Ua parau te taote ē, e tītauhia ’o Joshua ’ia tāpū-’oi’oi-hia. E au ra e mea huru ri’ari’a.
« E ’āfa’i mātou ia ’oe i te hō’ē piha ta’a ’ē nō tāpūra’a », ’ua parau te taote. « E’ita ’oe e ’ite i te hō’ē mea, nō te mea e fa’ata’otohia ’oe. ’E e tīa’i mai tō ’oe nā metua ia ’oe i rāpae’au noa mai ».
’Ua rahi roa atu tō Joshua ri’ari’a. Nō te aha e’ita e ti’a i tōna nā metua ’ia fa’aea mai i roto i te piha i pīha’i iho iāna ? ’Aita ’oia i fa’aea i te ta’i.
’Ua parau marū noa māmā. « E aha tā māua e nehenehe e rave nō te tauturu ia ’oe ’ia huru maita’i a’e oe ? » tōna ïa reo.
« ’Ua ’ite au e aha tā tātou e nehenehe e rave » tā Joshua i parau. « E hīmene nā muri iho iā’u, ‘E tamari’i au nā te Atua’. I muri iho, e pure ā tātou i te hō’ē pure ».
’A hīmene marū ai rātou, ’ua ha’amana’o Joshua i te hīmenera’a ’oia i te reira hīmene i tōna bāpetizora’a. ’E ’a pure ai rātou, ’ua feruri ’oia i te mea tā pāpā i parau i te mahana o tōna bāpetizora’a : « E nehenehe te Vārua Maita’i e vai noa i pīha’i iho ia ’oe. E ’ore roa ’oe e vai noa ’o ’oe ana’e »
’Ua vai noa te mata’u ’o Joshua ’a hōpoi ai te tū’ati ma’i iāna i roto i te piha tāpūra’a. ’Aita tāna e nehenehe e ’ite i te hōho’a mata o te taote ’e o te mau tū’ati ma’i nō te mea e pāruru vaha tō rātou. ’Ia hi’o rā ’oia i roto i tō rātou mata, ’ua ’ite ’oia ē, e hoa rātou nōna, ’e e ’atu’atu maita’i rātou iāna.
I muri a’e i tōna tāpūra’a, ’ua parau te taote ē, e tītauhia ’ia fa’afa’aea Joshua. Te rohirohi ’e te māuiui noa ra ā ’oia, terā rā, ’ua huru maita’i ri’i te māuiui o tōna ’ōuma. ’Aita ’oia i hina’aro e ta’i fa’ahou. ’Ua ’ite ’oia e maita’i ’oia.
« ’Ua ’ite au i te hō’ē mea i roto i tō’u ’ā’au » te reo ’o Joshua ia māmā ’e ia pāpā. « ’O te hō’ē mana’o māhanahana »
« ’O te hō’ē o te mau rāve’a e ’ite ai tātou i te Vārua Maita’i » te parau ïa a māmā.
’Ua tā’iri’iri Joshua i tōna upo’o. ’Ua māuruuru roa ’oia i te fāri’ira’a i te hōro’a o te Vārua Maita’i. Nō te mea e’ita roa te Vārua Maita’i e vaiiho ’o ’oia ana’e.
Fa’ahōho’ara’a nā Glenn Harmon