Nō roto mai i te Peresidenira’a Mātāmua

’Ua ti‘afa’ahou ’oia !

Nā te peresideni Henry B. Eyring

Tauturu piti i roto i te Peresidenira’a Mātāmua

Fa’aauhia mai roto mai i te « ’Ua ti’afa’ahou ’oia », Liahona, ’Ēperēra 2013, 4–5.

’Ua hōro’a mai te ti’afa’ahoura’a o Iesu Mesia ia tātou te tīa’ira’a. ’Ua hōro’a mai te reira iā’u i te tīa’ira’a i te mahana nō te tau māhanahana i te matahiti 1969, ’a pohe ai tō’u metua vahine. ’Ua ’oto vau nō te mea, ’ua ta’a ’ē au iāna nō te hō’ē tau.

’Ua ’oa’oa rā vau i te taime ’a parau mai ai te Vārua Maita’i iā’u ē, e parau mau te ti’afa’ahoura’a. E nehenehe tā’u e ’ite, mai te aha te huru ’ia ’ite fa’ahou i tō’u metua vahine ’e vetahi ’ē tei herehia, i te hō’ē mahana.

’Ua ti’afa’ahou Iesu. Maoti ’oia, e ti’afa’ahou mai te mau tamari’i ato’a a te Metua i te ao ra tei fānauhia i te ao nei, i roto i te hō’ē tino e ’ore e pohe fa’ahou.

Te ’ā’amu nō Pāsa

’A tāpūpū i te mau tāreta ’e ’a tāpiri i te reira i ni’a i te ’api parau. ’A pātia i te ’āpo’o ’e ’a tā’amu ’āmui i te reira i te taura. I teienei, e buka ’ā’amu nō te Pāsa tā ’oe !

’Ua tomo Iesu Mesia i roto i te ’oire nō Ierusalema nā ni’a i te hō’ē ateni. ’Ua ’ārue te ta’ata iāna ’e ’ua vauvau i te mau rauere tamara i ni’a i te repo. (Hi’o Mareko 11:1–11).
’Ua haere Iesu i te hiero ’Ua fa’aora ’oia i te hāpepa ’e te matapō. (Hi’o Mataio 21:12–14).
’Ua aufau te mau tahu’a pohehae i te hō’ē pipi a Iesu Mesia, ’o Iuda Isakariota, e 30 moni nō te tu’u iāna i roto i tō rātou rima. (Hi’o Mataio 26:14–16).
’Ua tāmā’a Iesu i te mā’a nō Pāsa ’e tāna mau pipi. ’Ua hōro’a ’oia ia rātou i te ’ōro’a mo’a nō te tauturu ia rātou ’ia ha’amana’o noa iāna. (Hi’o Mataio 26:19–20, 26–28).
’Ua haere Iesu i Gesetemane nō te pure i te Metua i te ao ra. I reira, ’ua ha’amata ’oia i te mamae nō tā tātou mau hara. ’Ua haere mai te mau ta’ata ’e tā rātou ’o’e ’e ’ua haru iāna. (Hi’o Mataio 26:36–50).
’Ua mamae Iesu ’e ’ua pohe i ni’a i te sātauro. ’Ua vai tōna tino i roto i te hō’ē mēnema ma te hō’ē ’ōfa’i rahi i mua i te ’ūputa. (Hi’o Mataio 27:27–35, 57–60);
’Ua tūra’i te mau melahi i te ’ōfa’i i te ātea. ’Ua parau rātou ia Maria Madegalena ’e i te tahi atu mau vahine ē, ’ua ti’afa’ahou Iesu. ’Ua fā mai Iesu i te mau vahine, ’e ’ua ha’amori rātou iāna. (Hi’o Mataio 28:1–10).
’Ua fā mai Iesu i tāna mau pipi. ’Ua fāfā rātou i tōna tino tei ti’afa’ahou. ’Ua parau ’oia ia rātou ’ia ha’api’i i tāna ’evanelia i te mau ta’ata ato’a. ’Ua ti’afa’ahou Iesu Mesia, e nā reira ato’a tātou ! (Hi’o Luka 24:36–43 ; Mataio 28:16–20).