E mau pionie i te mau fenua ato’a
Vicky Tadić
Te fa’afāriu mātamua i Bosnia-Herzegovina
« ’O te Vārua Maita’i ānei ? » ’Ua ui ’o Vicky.
« ’A haere mai ! » ’Ua pi’i te taea’e o Vicky. « E haere ana’e e ha’uti ’e ’o Rowe mā ! »
’O Rowe mā, tō rātou mau ta’ata fa’aea tāpiri mai ’āpī. ’Ua haere mai rātou i Bosnia-Herzegovina mai te fenua Mārite mai. E tamari’i tā rāua i te fāito matahiti mai ia Vicky ’e tōna mau taea’e. ’Aita rā rātou e paraparau i te reo Bosnia. ’O Vicky ana’e i roto i tō rātou ’utuāfare e paraparau i te reo Peretāne. Nāna e ’auvaha ’ia nehenehe rātou e ha’uti ’āmui.
’Ua pārahi ’o Vicky i pīha’i iho ia Rowe vahine i mua i te ’ōpani fare, ’a ha’uti noa ai te mau tamari’i.
’Ua parau ’o Vicky, « e mea ta’a ’ē tō ’oe ’utuāfare ». « I te pae maita’i ».
’Ua ’ata’ata ’o Rowe vahine. « E hina’aro ānei ’oe e haere mai i te purera’a nā muri iho ia mātou ? Nā te reira e tauturu ia ’oe ’ia ’ite nō te aha mātou i ta’a ’ē ai. ’Aita tā mātou e fare purera’a i’ō nei i Bosnia nei, nō reira, e fa’atupu mātou i te purera’a ’e tō mātou ’utuāfare i te fare ».
E ta’ata hi’o haere ’o Vicky i tōna taera’a i te fare o Rowe mā i te sābati. Nā mua e hīmene rātou i te hō’ē hīmene. Hō’ē o te mau tamari’i e parau i te pure. I muri iho, e pure ’o Rowe tāne ’e e ’ōperehia te faraoa ’e te pape i te ta’ata tāta’itahi. ’Ua parau rātou ē, e parauhia te reira te ’ōro’a mo’a. I muri a’e i te reira, ’ua hōro’a mai tā rāua tamāhine ’o Jessie i te hō’ē a’ora’a.
« ’Ua here te Metua i te ao ra ia tātou. Tē paraparau mai nei ’oia ia tātou nā roto i te Vārua Maita’i » tē nā reira ra ’o Jessie. « I te tahi taime, e hōro’a mai te Vārua Maita’i ia tātou i te hō’ē mana’o hau. ’Aore rā i te tahi taime, e hōro’a mai ’oia ia tātou i te hō’ē mana’o ».
I te mahana i muri iho, ’ua haere ’o Vicky i te fare toa nō te ho’o mai i te faraoa. I tōna ho’ira’a i te fare, tē fātata ra ’oia i te haere nā mua i te mau fa’ari’i pehu, ’a tāpe’ahia ai ’oia e te hō’ē reo tei puta mai i roto i tōna mana’o. ’Afa’aātea ’ē atu, tē parau ra terā reo.
’Ua fa’aea tā’ue ’o Vicky. I taua iho taime ra, ’ua tere mai ra te hō’ē pere’o’o ’e ’ua fa’a’ohu i te poro o te purūmu. Harurura’a ! ’Ua tano atu i ni’a i te mau fa’ari’i pehu.
ʼUa mapu a’era te aho ’o Vicky. ’Ua ’oa’oa roa ’oia i te fa’aro’ora’a i te reo !
I muri a’e, ’ua fa’ati’a ’o Vicky ia Rowe vahine i te ’ā’amu. « ’O te Vārua Maita’i ānei ? »
« E au ra ’o terā iho ā. I te tahi taime, e fa’aara mai te Vārua Maita’i ia tātou i te fifi ».
’Ua parau ’o Vicky, « ’ua pāruru te Atua iā’u ». « E tāmau noa vau i te fa’aro’o i te Vārua Maita’i »
’Ua tāmau noa ’o Vicky i te haere i te fare o Rowe mā nō te purera’a i te mau sābati ato’a. I muri iho, ’ua fa’a’ite ’o Vicky i te Buka a Moromona i tōna māmā. ’Aita i maoro roa, tē ha’api’i mai nei tōna ’utuāfare tā’āto’a i te ’evanelia nā roto mai ia Rowe mā. ’Ua ’auvaha ’o Vicky nō te mau ta’ata ato’a.
I te hō’ē mahana, ’ua ui ’o Rowe tāne i te ’utuāfare o Vicky i te hō’ē uira’a. ’Ua fa’ahiti fa’ahou ’o Vicky i te reira nā roto i te reo Bosnia. « E pe’e ānei ’outou i te hi’ora’a ’o Iesu Mesia nā roto i te bāpetizora’a ia ’outou ? »
’Ua tīa’i ’o Vicky. ’Ua hina’aro ’oia e ’ia bāpetizohia ’oia. ’Ua taiā ri’i rā ’oia i te mea tā tōna ’utuāfare e parau mai.
I te pae hope’a, ’ua parau mai te pāpā o Vicky. « Da ».
« Da », ’ua parau mai tōna ’utuāfare.
’Ua ’oa’oa roa ’o Vicky, mai te mea ra iāna e pa’a’ina tōna māfatu. « ’Ē », tāna ïa parau ia Rowe tāne. « ’Ē, e hina’aro mātou ».
Hō’ē hepetoma i muri a’e, ’ua tere ’o Vicky ’e tōna ’utuāfare e pae hora te maoro i te fare purera’a fātata roa a’e a te ’Ēkālesia. E ’oa’oa rahi tō Vicky i te tomora’a i roto i te pape ’ia bāpetizohia ’oia. ’Ua rahi roa atu ā tōna ’oa’oa i te taime ’a ha’amauhia ai ’oia ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei.
I teienei, e vai tāmau noa te Vārua Maita’i iāna ra.
E 73 rahira’a melo nō te ’Ēkālesia i Bosnia-Herzegovina.
Te hiero fātata roa a’e ia Bosnia-Herzegovina, o te hiero ïa nō Italia.
Tei Europa apato’a hiti’a o te rā te vaira’a o te mau fenua Bosnie-Herzegovine.
E mea au nā Vicky te orara’a i rāpae. Te haerera’a nā ni’a i te mou’a o te hō’ē ïa o te mau mea au-roa-hia e āna.
’Ua bāpetizohia ’o Vicky i te 16ra’a o tōna matahiti.
’A pa’ari mai ai ’o Vicky, ’ua fa’aipoipohia ’oia i roto i te hiero. E piti tāna tamari’i i teienei.
Fa’ahōho’ara’a nā Zhen Liu