Te fa’aineinera’a nō te Pāsa
« E ha’amori atu i te Metua i tōna ra i’oa, ma te ’ā’au mā, ’e te rima vi’ivi’i ’ore » (2 Nephi 25:16).
« ’A ti’a i ni’a, e Lydia », ’ua parau māmā. « E mahana maha mā teie ! » I Rusia, i reira Lydia e ora ai, ’ua riro te mahana maha mā ’ei mahana ta’a ’ē nō te fa’aineinera’a nō te Pāsa.
’Ua huri a’era ’o Lydia ’e ’ua hi’o atu nā te ha’amāramarama. E mea pōuri noa ā i rāpae.
Nā ’ō atura ’o Lydia, « e māmā, ’ua rohirohi roa vau ». « E nehenehe ānei tā’u e ta’oto ri’i ā ’e araua’e e rave ai i te ’ohipa ? »
’Ua ’ata’ata mai ’o māmā ’e ’ua pārahi mai ra i ni’a i te ro’i. « Tē vai ra hō’ē tumu e ti’a ’oi’oi ai tātou i ni’a i teie mahana. ’Ua ’ite ānei ’oe e aha te reira ? »
’Ua feruri māite ’o Lydia, ’aita rā ’oia i ’ite.
« E rave itoito tātou i te ’ohipa i teie mahana nō te tāmā i tō tātou fare, nō te fa’aha’amana’o ia tātou i te taime ’a horoi ai Iesu i te ’āva’e o tāna mau pipi. ’Ua here ’oia ’e ’ua tāvini ia vetahi’ ē, ’e tē hina’aro nei tātou e tāvini mai tā Iesu i rave i roto i tō tātou fare. E mahana teie nō te ha’amana’ora’a ia Iesu ! » Te reo ïa o māmā.
’Ua hina’aro ’o Lydia e tāvini mai ia Iesu, nō reira, ’ua ou’a ’oia i rāpae i te ro’i. ’Ua rave itoito ’oia i te ’ohipa i te toe’a o te mahana. ’Ua tāmā ’oia i te tahua, ’ua pu’a i te ’ahu, ’e ’ua tauturu i te tunura’a i te mā’a. I te hope’a o te mahana, ’ua ha’apeu roa ’oia. ’Ua ’ana’ana mā te mau mea ato’a.
Te mahana i muri iho, ’o te farairē maita’i ïa. ’Ua hāmani ’o Lydia, ’o māmā ’e ’o pāpā i te mau huero moa Pāsa. ’Ua pātia rātou i te mau ’āpo’o na’ina’i i ni’a i te ’apu o te huero moa ’e ’ua māni’i i te re’a i rāpae. ’Ua pāpa’i rātou i te mau hōho’a i ni’a i te mau huero moa ’e ’ua tāpo’i i te hinu pa’ari. ’E ’ua utuhi rātou i te mau huero moa i roto i te pēni ’ute’ute ’ana’ana, te vare’au ’e te matie. ’Ua au roa ’o Lydia i te nehenehe o te mau hōho’a e ’ohu ra.
’Ia mārō te mau huero, ’ua ’ōtaro Lydia i te mau hōho’a na’ina’i o tōna ’utuāfare ’e ’ua tu’u i roto i te huero moa tāta’itahi. ’Ua riro te reira farairē ’ei mahana nō te ’āmuira’a mai ’e nō te ha’amana’o i te tusia o Iesu. ’O te mahana teie o te hepetoma i pohe ai Iesu. Tē fa’aha’amana’o nei te mau huero moa ia Lydia i te mēnema i reira te vaiihora’ahia Iesu. ’Ua rave te ’utuāfare o Lydia mai tō rātou maita’i roa a’e nō te ha’amana’o iāna.
I te mahana mā’a mo’a, ’ua hāmani māmā i te kulich (te faraoa nō te Pāsa). ’Ua riro te hāmanira’a i te kulich ’ei peu faufa’a roa nō te Pāsa i Rusia. E tāmata te mau ta’ata i te mau taime ato’a e fa’atura ’ia tunu-ana’e-hia te kulich. ’Ua feruri ’o Lydia i tōna ’utuāfare, te ti’afa’ahoura’a o Iesu, ’e te mau mea tāna i māuruuru. E mea ’ōhie roa ’ia feruri nō ni’a i te mau mea pae vārua ’ia mā ana’e tōna fare ’e te hau.
I te pae hope’a, ’o te sābati Pāsa ïa ! E ’oa’oa rahi tō Lydia. ’Ua haere mai tōna mau tuahine fēti’i e fārerei ia rātou. ’Ua ’amu rātou pā’āto’a i taua mā’a au maita’i tāna i tauturu i te tunura’a. Tē vai ra te pai, te kulich, te tōtī [saucisse], ’e te pata pa’ari. ’A tāmā’a ai rātou, ’ua fa’a’ite rātou i tō rātou ’itera’a pāpū ’e ’ua paraparau nō ni’a i te mau mea tā rātou i māuruuru.
I muri a’e i te tāmā’ara’a, ’ua ha’uti rātou i te hō’ē ha’uti ta’a ’ē. E tāpe’a te ta’ata tāta’itahi i te hō’ē huero moa fa’a’una’unahia ’e e tūpa’ipa’i i ni’a i te tahi atu huero. Te ta’ata tāna te huero e pararī nā mua, ’ua pau ïa ’oia. ’Ua ruru te rima o Lydia ’a tūpa’ipa’i ai ’oia i tāna huero moa i ni’a i te huero moa a tōna tuahine fēti’i. ’Ua tuō ’oia, « haere e te huero moa ! » ’Ua hu’ahu’a roa tāna huero vare’au. I roto i te pa’a pararī, tē vai ra te hōho’a o tōna ’utuāfare.
’Ua ’ata’ata ’o Lydia ’a hi’o ai ’oia i te hōho’a. ’Aita ’oia i ha’ape’ape’a ē, ’ua pau ’oia. ’Ua tupu te hō’ē mana’o māhanahana ’e te ’oa’oa i roto i tōna ’ā’au. ’Ua rave itoito ’oia i te ’ohipa nō te fa’aineine i teie Pāsa nā roto i te tauturura’a ’e te herera’a i tōna ’utuāfare. Maoti te ti’afa’ahoura’a o te Mesia, e ora fa’ahou rātou pā’āto’a !
Fa’ahōho’ara’a nā Sofia Cardoso