O se Pale o le Aso Fanau
E alala le tusitala i Colorado, ISA.
“Lea ua ou i le fale!” O le valaau lea a Tama. Sa vave o ia i le fale mo le aso fanau o Wyatt. Ua atoa le lima o Wyatt i le aso!
Sa tamoe atu Wyatt ia te ia. Na tuu atu e Tama se opo lapoa ia te ia. “A uma le ’aiga o le aoauli, o oe ma a’u o le a o i le paka,” o le tala lea a Tama.
“Na o ta’ua?” O le fesili lea a Wyatt. Sa alofa o ia i lona tina ma lona tuafafine laitiiti, o Maria, ae o nisi taimi sa ia manao ai e fai mea na o ia ma Tama.
“Na o ta’ua,” o le tala lea a Tama.
Sa kuka e Tina meaai uma lava e fiafia i ai Wyatt mo le ’aiga o le aoauli. Sa ia faia foi se pale mai pepa auro ma mea ilaila.
“O le mea lena mo au?” Na fesili Wyatt, ma ona mata lapopoa.
“O lea lava,” o le tala lea a Tina.
O se aso fanau faapitoa!
Sa fai e Wyatt le pale i le paka. Sa see ese ma lona ulu, ae sa lei popole i ai. “Tama, faamata o le i ai o lo’u pale o le aso fanau e avea ai a’u ma se tagata faapitoa?” na ia fesili atu ai.
Sa ataata Tama. “O le pale o le aso fanau e manaia, ae e le avea lena ma mea e faapitoa ai oe. E faapitoa lava oe ona o oe o se atalii o le Atua! E faapena foi tagata uma. O lona uiga e faapitoa foi tagata uma.”
Sa taaalo Tama ma Wyatt i le malae taalo. Na alu atu Wyatt i lalo i le faasee.
“E te manatu e mafai foi ona ou alu i lalo i le faasee?” Na fesili ai Tama.
Na ata Wyatt. “E te telē tele.”
Sa ae Wyatt i luga o le apefai e toe alu ai i lalo o le faasee. Sa i ai se teineititi i ona luma. Sa fefe o ia e alu i lalo. Sa mafaufau Wyatt i le auala na faapitoa ai tagata uma i le Tama Faalelagi.
“E mafai ona e faia,” sa ia fai atu ai.
Sa ia faasee atu i lalo o le faasee. Na faapena foi Wyatt.
“Lelei tele!” Na fai atu ai Wyatt. Na ia ataata atu ia te ia, ma na ia ataata atu foi.
O le agalelei sa maua ai e Wyatt le fiafia! Sa ia iloa e faapitoa tagata uma, e tusa lava pe i ai se pale o le aso fanau pe leai.