Soka ma le Sapati
O lenei tala sa tupu i Honetura.
“Faapitoa le Aso Toonai. E sauni ai mo le Aso Sa” (Tusipese a Tamaiti, 105).
O le Aso Toonai a Samuelu na aafia ai lona Aso Sa.
Sa fiafia Samuelu e matamata ma Papa i le televise, aemaise lava i Aso Toonai. Sa galue malosi Papa i le vaiaso atoa. Ae i le Aso Toonai, na kuka ai e Mama ni pastelitos de piña (pai fala) ma sa latou matamata faatasi uma i le TV.
I se tasi po o le Aso Toonai, sa latou filifili ai e matamata i se partido de fútbol (taaloga soka). Ae na tuai ona amata le taaloga, ma o le a umi se taimi e faagasolo ai. Ina ua uma le afa muamua, na 0-0 ’ai o le taaloga. Sa manao Samuelu e matamata pea. Ae sa le mafai ona ia taofia lona mavava.
“O le taimi o le moe, Samuelito,” na fai atu ai Mama i se leo malu. “E tatau ona e moe ina ia mafai ona e ala malosi i le lotu taeao.”
“Se Mama,” o le tala lea a Samuelu. “O ’au sili ia e lua i Honetura!”
Na tilotilo atu Papa i le uati. “Lelei. E mafai ona e matamata pea. Ae e tatau ona e alapo taeao.”
Na sili atu ona manaia le taaloga i le afa lona lua. Ua atili ai ona malosi le pupula a Samuelu! Sa la tau fai tapuai uma ma Papa. Muamua sa i ai se kiki i le tulimanu. Ona faia lea e le faatini o se sefe lelei. Na sikoa le isi au, ma sosoo ai ma le isi. Na faateia Samuelu i le uma ai o le taaloga. Sa faaiuina i se tutusa e 1-1.
O le taeao na sosoo ai, sa matuai vaivai lava Samuelu ma ua le manao e alu ese mai lona moega. Ae na ia iloa lava e taua le alu i le lotu.
I le taimi o le sauniga faamanatuga, na amata ai ona tautulimoe Samuelu. Sa faaauau pea ona lue lona ulu. Na ’eu o ia e Mama ina ia fesoasoani ia te ia ia ala. Ae sa ia vaivai tele ma le mafai ai ona ia gauai atu i failauga. “Ou te manatu ua aafia tele lou Aso Sa i mea e te faia i le Aso Toonai,” o le tala lea a Papa.
I le Peraimeri, sa talanoa le faiaoga o Samuelu e uiga i le tausia o le Sapati ia paia. Sa ia fesili pe o le a se mea e mafai ona fai e tamaiti e avea ai le Aso Sa ma aso faapitoa. Sa mafaufau Samuelu mo se minute. Ona ia fai mai lea, “Alu e moe i le taimi e tatau ai i le Aso Toonai!”
Ina ua latou taunuu i le fale i le tuua ai o le lotu, sa talanoa atu Samuelu ia Mama ma Papa. “Sa ou fiafia lava i le matamataina o le taaloga anapo,” o le tala lea a Samuelu. “Ae sa tatau ona ou vave alu e moe. Ou te manatu e tatau ona tatou faaaogaina se vaega o le Aso Toonai e sauniuni ai mo le Aso Sa.”
“Ou te lagolagoina,” o le tala lea a Papa.
Sa luelue atu le ulu o Mama. “Ma au foi.”
O le Aso Toonai na sosoo ai, na faasalalau mai ai se isi taaloga i le TV.
“O le a se mea e tatau ona tatou faia nanei?” Sa fesili atu ai Papa. “E tuai foi ona uma le taaloga.”
“Nai lo o lena, e mafai ona tatou matamata i se ata tifaga,” o le tala lea a Mama.
“Pe mafai foi ona tatou o e savalivali,” o le tala lea a Samuelu.
“E talafeagai le savalivali mo oe?” Sa fesili atu ai Papa ia Mama.
“Ioe,” o tala lea a Mama. “E manaia lava le faatasitasi ai o se aiga.”
“Ma pe a tatou foi mai i le fale,” o le tala lea a Samuelu, “e mafai e i tatou uma ona maua se moe lelei i le po. Ona saunia lea o i tatou mo le Aso Sa!”