Sau, Mulimuli Mai ia te A’u

Taimi Fiafia i Tusitusiga Paia

O nei manatu e o faatasi ma le Sau, Mulimuli Mai ia te A’u—mo Tagata Taitoatasi ma Aiga i vaiaso taitasi.

Tutu i Nofoaga Paia

Usu le “Filifili le Ala Sa’o” (Tusipese a Tamaiti, 82).
Na aoao mai Iesu Keriso e tatau ona tatou “tutu i nofoaga paia” (Mataupu Faavae ma Feagaiga 45:32). O soo se mea lava e mafai ona avea ma nofoaga paia i le i ai o le Agaga Paia ma i tatou.
Faatasi ai ma lou aiga, lisi ni nai mea e fesoasoani ai ia te oe ia tu i nofoaga paia, e pei o le agalelei po o le tatalo. E faapefea e na mea ona saunia i tatou mo le afio mai o Iesu Keriso? Tuu lau lisi i se mea o le a e vaai soo i ai.

Usu le “O Loo Ou Taumafai e Avea e Pei o Iesu” (Tusipese a Tamaiti, 40–41).
Na tuuina mai e le Tama Faalelagi ia i tatou taitoatasi ni meaalofa faaleagaga (tagai i le Mataupu Faavae ma Feagaiga 46:11–26). O lona uiga sa Ia tuuina mai ia i tatou ni taleni faapitoa. O tagata uma e tulaga ese ma taua i le Tama Faalelagi!
Mafaufau po o a meaalofa ua e maua. Ona fai lea o se faaaliga taleni a le aiga! Faasoa atu meaalofa ua tuuina atu e le Tama Faalelagi ia te oe i isi.

Usu le “Aoao Mai Ia Ou Savali i le Malamalama” (Tusipese a tamaiti, 70).
Na aoao mai Iesu Keriso, “O le mea e mai i le Atua o le malamalama lea” (Mataupu Faavae ma Feagaiga 50:24). O le talalelei e pei o se malamalama lea e taitaieseina atu i tatou mai le pouliuli ma le le mautonu.
Nana se aitema i totonu o se potu pogisa ma taumafai e su’e. Ona toe su’e lea i se moliuila po o se moli itiiti. E faapefea ona fesoasoani le Agaga ia te oe ia maua lou ala?

“Fai Mea Tonu,” (Viiga, nu. 148).
Na aoao mai Iesu e tatau ona tatou “faamaoni i mea uma” i le tasi ma le isi (Mataupu Faavae ma Feagaiga 51:9). O lona uiga o le tautala i le mea moni ma le lē faaitu’au i isi.
Mafaufau i ni tulaga e ono fetaiai ma oe i aso uma o le olaga—e pei o le mauaina o se tupe a se tasi na leiloa po o se mea na e nonoina ae ua leiloa. Faatino mea e te faia e faaali ai lou “faamaoni i mea uma.”

Usu le “Ou Te Faafetai Ia Te Oe, Le Tama e” (Tusipese a Tamaiti, 9).
Na aoao mai Iesu, “Ia e faafetai atu i le Alii lou Atua i mea uma” (Mataupu Faavae ma Feagaiga 59:7).
Ia fai se api talaaga o le lotofaafetai faatasi ma lou aiga! Ia gagau faatasi fasipepa e pei o se tusi ma teuteu le faavaa. I po uma ae e te lei moe, tusi pe tusi ata o ni mea se tolu e te faafetai ai.