Loka i Fafo!
E alala le tusitala i Iuta, ISA.
O lenei tala sa tupu i Hungary Tutotonu, Hungary.
Atonu e mafai ona fesoasoani Ema!
“Ia tuu atu lou faalagolago i le Agaga lena lea na te taitai ia fai mea lelei” (Mataupu Faavae ma Feagaiga 11:12).
Na puna Ema i luga o maa ta’eta’ei o le auala savali. Sa o se aso mafanafana, i le susulu o le la. Sa la savavali atu ma Mama i le faleoloa.
“Mama, o le a le mamao o le la?” na ia fesili ai.
“Ou te le mautinoa,” o le tala lea a Mama.
Sa faanunumi atu le pupula a Ema i le lagi. “E te manatu o le a alu se roketi i le la? E te manatu e sili atu le vevela nai lo le uila emo? E te manatu …”
Sa ata Mama. “Ua faigata tele au fesili!”
Sa ata foi Ema. Na tele ni ana fesili sa i ai. Sa faia pea lava e Mama le mea sili na te mafaia e tali atu ai. O se tasi lena o mafuaaga e fiafia ai Ema e o ma Mama e savalivali.
Sa tilotilo solo Ema i lona pitonuu. O taavale la’u pasese sa feoai e agai atu i lalo o le auala papa. Na fepasia’i tagata tietie uila. O le toatele foi o tagata sa o i fafo e savavali.
Ona tilotilo atu lea o Ema i le isi itu o le auala. Sa nofo se teineitiiti i luga o faasitepu i fafo o se fale mautotogi. Na foliga mai sa tagi o ia.
Sa savali lemu Ema. Pe tatau ona ia tu e fesoasoani? Atonu na manao le teineitiiti ia tuua na o ia. O nisi taimi na manao ai Ema ia tuua na o ia pe a faanoanoa o ia.
Sa tu Ema. O le tele o taimi na manao ai Ema i se tasi e talanoa i ai pe a faanoanoa o ia. Atonu e mafai lava ona ia fesoasoani!
Sa ia uu le lima o Mama. “Vaai, Mama. Ou te manatu e manaomia e le teine lena se fesoasoani. ”
Sa tilotilo atu Mama i le isi itu o le auala. “Ou te manatu e sa’o oe.”
Sa uu e Ema le lima o Mama a o la kolosi le auala. Sa ia savali atu i luga o faasitepu i le mea sa nofo ai le teineitiiti. “Talofa,” sa fai atu ai Ema. “E te manaomia se fesoasoani?”
Sa masūsū le teineitiiti ma tilotilo atu ia i laua. O ona lima sa opoina ai ona tulivae, ma sa mumu ma fulafula ona mata.
“Ua … loka au i fafo mai lo’u fale mautotogi.” Sa manava loloa o ia. O lona leo sa tete ma lemū. Sa tootuli ifo Ema i ona autafa e faalogo lelei ia te ia.
“E le mafai ona ou faitau,” o le tala lea a le teineitiiti. “Ou te le iloa po o le a le ki e oomi e alu ai i totonu.”
Sa tilotilo atu Ema i le puipui i fafo o le fale mautotogi. Sa tele tama’i ki. E tofu lava le ki ma se igoa. I autafa o ki sa i ai se sipika.
“O ai lou faaiu?” Na fesili ai Ema.
“Schneider,” o le tala lea a le teineitiiti.
Sa faitau e Mama ki uma seia oo ina ia maua se ki o loo tusia ai “Schneider.” Sa ia oomiina.
Buzz!
Na leotele se leo ina ua oomi le ki. Ona i ai lea o se leo lē manino na sau i le sipika.
“O le au Schnesiders lenei. E mafai faapefea ona ou fesoasoani ia te oe?”
Sa tautala atu Mama i le sipika. “Talofa! O loo ma i fafo ma la’u tama teine faatasi ma se teineititi o loo fai mai ua loka o ia i fafo.”
Sa faatelea’i ona tu i luga le teineitiiti ma tamoe atu i le sipika. “Mama,” na ia fai mai ai, “sa le mafai ona ou faitauina le ki e toe foi atu ai i totonu, ma na fesoasoani mai nei tagata ia te au!”
O le leo i luga o le sipika na foliga mai na faate’ia. “Leni! Faapea a’u o loo e i totonu o lou potu! Aua le popole. Lea ua ou alu atu i lalo i taimi nei.”
I le mavae ai o ni nai sekone, sa tamoe mai se tamaitai i fafo. Sa tamoe atu i luga le teineitiiti ma fusi atu ia te ia.
Na liliu atu le tamaitai ia Ema. “Faafetai lava mo le fesoasoani i si a’u pele o Leni!”
Sa ataata Emma. “Sa faigofie lava ona fesoasoani atu.”
Sa la talotalo faatofa atu ma toe savavali mai i lalo i le faasitepu. Sa lagona e le tino atoa o Ema le mafanafana. Na ia toe mafaufau i se fesili se tasi mo Mama.
“O le fesoasoani atu i lena teineititi sa faigofie lava. Aisea ua ou matuai fiafia ai lava i lena mea? ”
Sa oomi e Mama le lima o Ema. “O le Agaga Paia lena ua ta’u atu ia te oe sa e faia se filifiliga lelei.”
Sa ataata Emma. Na fiafia o ia ona sa ia tu e fesoasoani atu.