O Paionia i Atunuu Uma
Samu Beazley
Faifeautalai Galue i Niu Sila
E alala tusitala i Uaikato, Niu Sila, ma Iuta, ISA.
Sa iloa e Samu o loo ia faia le galuega a le Atua.
Na amo e Samu se amoga o laupapa i le nofoaga o fausia ai le falesa ma faataatitia i lalo. I lena taimi, sa na o amopou laupapa na tutu. Ae e le toe umi ae avea laupapa ma amopou o se fale. Sa le mafai e Samu ona mafaufau i se auala sili atu e faaalu ai lona aso Toonai nai lo le fesoasoani e fausia se falesa fou!
Sa fiafia Samu i le fausiaina o mea. E ui o nisi taimi sa faigata ia te ia. A o tamaitiiti o ia, sa matua aafia ona lima i se faalavelave faafuasei. E oo lava i le taimi nei, i le tuputupu ae o Samu, sa malō pea ona tamatamailima. O nisi taimi sa faigata ona piki i luga ni mea po o le uuina o ni meafaigaluega.
Sa piki i luga ma le faaeteete e Samu lana samala. Sa tatau ona ia taumafai malosi atu nai lo o isi tagata faigaluega, ae sa lei afaina ia te ia. Sa na ona ia manao e fesoasoani atu. Na ia iloaina sa ia faia le galuega a le Atua. Ma afai sa ia faia le galuega a le Atua, e mautinoa lava o le a fesoasoani le Atua ia te ia!
Ao pisi Samu i le galuega sa ia faalogo atu i se tasi o sau i tua. “O se galuega lelei lena o loo e faia,” o le tala lea a le tagata.
Sa liliu atu Samu. O Elder Pasina! O ia o se taitai o le Ekalesia o le sa fesoasoani i le faatulagaina o le fausiaina o galuega faatino i Niu Sila.
“Faafetai lava,” sa fai atu ai Samu.
Sa ataata Elder Pasina. “O le a sou manao i le avea ma se faifeautalai galue? I le taimi nei ua galulue ai faifeautalai e fesoasoani e fausia se aoga a le Ekalesia mo le autalavou. Matou te manaomia nisi tagata e fesoasoani, ma ou te manatu o le a e faia se galuega maoae.”
“O le a ou fiafia e fai,” o le tala lea a Samu. Na le mafai ona ia faatali e auauna atu i le Alii o se faifeautalai!
E oo ane i le taeao o le Aso Gafua, ua avea Samu o se faifeautalai galue aloaia. Sa ia fesoasoani e sasaa le simā i se falegaosi e fai ai ni poloka mamafa. Sa faaaogaina poloka e fesoasoani e fausia ai le faleaoga. O nisi sa faaaoga foi e fausia ai le Malumalu o Hamilton Niu Sila!
O lea aso ma lea aso, i lea tausaga ma lea tausaga, sa galue malosi ai Samu. Sa ia faia pea le mea sili na ia mafaia. Mulimuli ane, sa faatonuina Samu na te vaaia le fale gaosi piliki. Sa ia taitaia isi faifeautalai galulue i o latou tiute ma faamautinoa le faataunuuina lelei o a latou galuega.
Sa fiafia foi Samu! O ia ma isi faifeautalai sa latou usuina faatasi ni pese. O nisi taimi sa latou faia a latou musika e faamalosiau atu ai i isi e o mai ma fesoasoani. Pe sa fauina e Samu, pese, pe faamasani i se tagata fou, ae na fesoasoani le Atua ia te ia i le faia o galuega lelei.
I tausaga mulimuli ane, sa valaauina ai Samu i se isi misiona. Ae o le taimi lea sa ese. O le a ia le faaaogaina ona lima e fausia ai ni mea. Nai lo lena, o le a ia faaaogaina e fesoasoani ai i tagata i totonu o le malumalu—o le malumalu lava lea sa ia fesoasoani e fausia!
A o tu Samu i totonu o le malumalu i ona ofu papae, sa ia lagonaina le filemu. Sa ia faafetai mo mea lelei uma na fesoasoani le Atua i ona lima e fai.
O Niu Sila o se atunuu o le Vasa Pasefika i Saute.
O le malumalu o Hamilton Niu Sila o le uluai malumalu na fausia i le Itulagi i Saute.
E silia ma le 300 faifeautalai galulue na fesoasoani e fausia le malumalu.
A o tamaitiiti lava, sa fesoasoani Samu e tausia ’oti a lona aiga.
Ina ua matua o ia, sa galue foi Samu i le aufono a le aai.
Sa auauna atu foi o ia i se misiona o talafaasolopito o aiga ma lona faletua o Irene.