Au Uso Tietie Uila
O lenei tala sa tupu i Gauteng, Aferika i Saute. Faafetai ia Samu S. mo le faasoaina mai o lana tala!
Sa le’i fia taalo Samu. Ae sa manao o ia e faia ni manatuaga ma Sinati.
“E i ai so’u aiga i lalo nei. … Ou te fia mau pea ma i latou e faavavau” (Viiga, nu. 183).
Sa faataalise atu Samu i luga o le fanua i lana uila vilivae lanumoana. O lona uso e lua tausaga o Sinati, sa i ona tua tonu lava i luga o lana sikuta lanumumu.
“Sau, ta toe o!” Na fai atu ai Samu ina ua la taunuu i le faatausiusiuga o le fanua. Sa liliu o ia ma vili lana uila i le vave sa ia mafaia e foi atu ai i le pito i luma. Na agi malosi atu le savili i ona foliga.
“Samu ma Sinati!” Na ee atu ai Samu.
Sa ata Sinati. Na ia ee faatasi ma Samu.
“Samu ma Sinati! Samu ma Sinati!”
Na la tietie faataamilo i le fanua, agai i luma ma tua, luma ma tua, seia oo ina vaivai vae o Samu ua le toe mafai ona toe vili.
“Se’i ta malolo,” na fai atu ai Samu ma lona sela tele.
“Sau i luga iinei ma malolo,” sa valaau mai ai Tama i le tapoleni osooso.
Na paka e Samu lana uila ma taitai atu le lima o Sinati. Sa ia fesoasoani i lona uso laitiiti e a’e i luga o le tapoleni osooso. Ona ia a’e lea i luga ma nofo i tafatafa o Tamā.
“Na e maua le fiafia?” O le fesili lea a Tamā.
“Ioe!” O le tala lea a Sinati.
Na taoto Samu i luga o le tapoleni osooso ma mapuea. O le lagi i luga ae o ia sa lanumoana sesega, ma sa lagonaina le mafanafana o le la i lona tino.
“O se aso matagofie, a ea?” Na fai mai ai Tamā.
Sa luelue le ulu o Samu. Na moeiini ona mata ma faalogologo atu i le pepese o manulele a o talanoa atu Tamā ia Sinati. Sa faasolo ina tautulemomoe o ia.
“Samu.”
Sa pupula ona mata. Na faalagolago atu Sinati i ona foliga.
“O le a?” O le fesili lea a Samu.
“Ta o!” Sa tusi atu Sinati i lana sikuta.
“E le o le taimi nei. O lea ou te malolo.”
Na amata ona faa’u’ū foliga o Sinati.
“Faamalie atu,” sa fai atu ai Samu. “Ua matuai ou le lavā lava.”
Na toso mai e Sinati le lima o Samu. “Sau loa!”
“Leai! Ua uma ona ta taaalo!”
“Samu,” na fai atu ai Tamā.
Sa tilotilo atu Samu ia te ia.
“I se aso, pe a matua o ia, o le a manatua ai e Sinati le auala na masani ona lua taaalo faatasi ai. O manatuaga e te faia i le taimi nei o le a ola i lona loto.”
Na tilotilo atu Samu i mata lanu eena lapopoa o lona uso laitiiti.
“Faamolemole?” O le fesili lea a Sinati.
Sa lei lagona lava e Samu le fia taalo. Ae sa ia manao e faia ni manatuaga ma Sinati.
Sa ataata o ia. “Ua lelei.”
Sa fiafia Sinati. “Yay!”
Sa puna i lalo Samu mai le tapoleni osooso ma fesoasoani ia Sinati e toe alu i lana sikuta. Ona ia tuu lea o lona vae i lana lava uila.
“Ua sauni?” na ia fesili ai.
“Ioe!”
Sa la tietie faatasi atu i le isi itu o le fanua. “Samu ma Sinati!” sa la toe alalaga ai.
Na lelava lava Samu, ae o se ituaiga lelava lelei. Sa lagona le malosi i ona vae a o vili atu lana uila i tua o Sinati. Ou te faamoemoe o le a manatua e Sinati lenei mea, o lona manatu lea. O le a ou manatuaina e faavavau.