O le Aiga o Salote
“O nisi taimi pe a matou usuina le ‘E Mafai Ona Faavavau Aiga,’ ou te mafaufau, ‘Vagana ai lo’u aiga.’”
Sa oomi e Salote ona tamatamailima i ona taliga. O taimi o pesepesega sa masani lava ona avea ma se vaega sili ona fiafia i ai o le Peraimeri. Ae o le asō na te lei fia faalogo ai i pese sa latou usuina. Nai lo o lena sa ia fesili atu pe mafai ona ia nofo i le fale faafiafia.
Sa sioa atu o ia i le kapeta lanumeamata, ma taumafai e aua le tagi. E lei aoga.
Sa savali mai se tagata i ona autafa. Sa vave ona solo ese e Salote ona loimata ma ea ae i luga.
O Sister Henry. “O le a le mea ua tupu?” o lana fesili lea.
Na manavaloloa Salote. “O na pese e faatatau i aiga fiafia ma le faatasia e faavavau,” na ia fai mai lemu ai.
“Oi. O lena Ia.” Sa nofo ifo i lalo Sister Henry i talaane o Salote.
I ni nai masina ua mavae, na faatautaia ai e matua o Salote se fonotaga faaleaiga. Sa faamatala mai e Tama o ia o le a siitia ese.
“O lona uiga e pei o le a lua tete’a” Na fesili ai Salote.
“E le pei,” o le tala lea a Tina. “Ma te alolofa uma ia te oe, ae ioe, o ma’ua o le a tete’a.”
Sa manatua e Salote lona lagonaina o lona pa’u ua malulu ma vevela i le taimi lava e tasi. Ona lagonaina malosi lea o faalogona uma! O le fefe, ita, le mautonu, ma le faanoanoa loloto—le ituaiga lea e lagona ai le ma’i.
Sa ia lagonaina pea lena tulaga i nisi taimi. E pei o le taimi na nonofo ai Tina ma Tama i itu faafeagai o le vaitaele i ana tauvaga aau. Pe i le taimi e tagi ai lona tuagane laitiiti mo Tina a o latou nonofo ai i le fale o Tama.
Pe i le taimi latou te pepese ai e uiga i aiga i le Peraimeri.
“Ina ua tetea ou matua, sa pei na tu’i e se tasi lo’u manava,” o le tala lea a Sister Henry. “I lea taimi ma lea taimi.”
Sa te’i Salote. “Ua tetea foi ou matua?”
Sa lue atu le ulu o Sister Henry. “Na tetea i laua a o ou pei o lou matua.”
Sa tilotilo atu Salote i ona lima. “O nisi taimi pe a matou usuina le ‘E Mafai Ona Faavavau Aiga,’ ou te mafaufau, ‘Vagana ai lo’u aiga.’” Sa moeiini ona mata. “Ou te ita tele. Ma e leaga lena mea, a ea?”
Sa lulu le ulu o Sister Henry. “Leai. Sa masani ona ou lagona le ma’i pe a ou vaaia faatasi tamaiti ma o latou matua.”
“Ioe!” Fai mai Salote. “E pei o loo latou i ai i se kalapu fiafia faaleaiga, a o a’u e leai. Ua eseese mea uma i le taimi nei.”
“Ua o se mea masani nei le lagona o le ita, faanoanoa, po le fefe nei—po o a lava ou lagona,” na fai mai ai Sister Henry. “E faigata le tete’a. Ae ou te folafola atu o le a e maua ni lagona lelei. O lou aiga o loo avea pea ma ou aiga, e tusa lava pe foliga mai ua ese nei. Na fesoasoani tele ia te au le manatua ai pea e faapea e alolofa o’u matua ia te a’u, ma o le a faapena foi mo le faavavau atoa.”
Na ataata Salote. Sa ia fiafia ia Sister Henry.
Sa faalagolago atu Sister Henry ia Salote. “Ae e te iloa le mea na sili ona fesoasoani ia te au?” na ia musumusu atu ai.
“O le a?” Sa toe musumusu atu ai Salote.
“Sa ou aoaoina o loo i ai pea so’u aiga atoatoa, ma le fiafia,” o le tala lea a Sister Henry. “Ma e faapena foi oe. O tatou uma lava, e tusa lava pe faapei le aiga faalelalolagi i le taimi nei. ”
Sa faanunumi e Salote lona isu. “E faapefea?”
“Ia, e le atoatoa o tatou aiga i le lalolagi, ae o lo tatou aiga faalelagi e atoatoa. Po o le a lava le mea e tupu, o loo i ai o tatou matua faalelagi e alolofa ia i tatou ma se aiga faalelagi matagofie o loo faatalitali mai mo i tatou.”
Ina ua mafaufau Salote i lena mea, sa ia lagonaina sina faamoemoe. Sa ia vaai faalemafaufau pe faapei le aso o le a ia toe vaai ai i ona matua faalelagi.
“Atonu pe a tatou pepese e uiga i aiga, e mafai ona ou mafaufau e uiga i lou aiga faalelagi,” o le tala lea a Salote. Sa lue atu le ulu o Sister Henry.
Toe tasi lava le fesili a Salote. “Mata e foliga mai sa ’ou tagi?”
“E leai,” o le tala lea a Sister Henry.
Na tu i luga Salote. “Ia ou te manatu la ua ou sauni e pese.”