Usa ka Pag-ampo alang kang Papi
Ang tagsulat nagpuyo sa Sacatepéquez, Guatemala.
Naguol tan-awon si Papi. Sa unsang paagi makatabang si Danna?
“Kamo motudlo kanila sa paghigugma sa usag usa, ug sa pag-alagad sa usag usa” (Mosiah 4:15).
Mitambo si Danna sa bintana. Iyang nakita si Papi nga nagsingabot sa balay gikan sa trabaho. Mas nadugay siya kay sa naandan.
“Duna bay problema, Papi?” Nangutana si Danna sa dihang misulod sa balay si Papi. Gikapoy siyang tan-awon ug magul-anon.
“Ah, aduna koy lisud nga adlaw sa trabahoan,” miingon si Papi. “Ug karon ulahi na ko alang sa importanting miting sa simbahan.”
“Makatabang ba ko nimo?” Nangutana si Danna. Nabalaka siya ni Papi.
“Mamalihog ko nimo sa paghangyo ni Mami kon mahimo ba siya nga mag-andam og pagkaon aron makaon nako diha sa sakyanan?” Mihangyo si Papi. “Kinahanglan ko nga magdali ug mag-ilis sa akong pangsimbahan nga sinina.”
Midagan si Danna aron sultihan si Mami. Anaa na siya sa kusina naghimo og sandwich.
“Para ba na ni Papi?” Nangutana si Danna. “Miingon siya nga ulahi na siya.”
“Oo, para ning Papi,” miingon si Mami. Mibutang siya og mansanas ug juice tupad sa sandwich.
“Naguol si Papi, ug wala ko kahibalo unsay problema. Nakahibalo ka ba?” Nangutana si Danna.
Nanghupaw si Mami. “Si Papi adunay daghang buhatonon. Nagsakit usab ang iyang likod bag-ohay lang.”
“Gusto kong adunay mabuhat aron makatabang niya,” miingon si Danna.
“Unsa kaha kon mag-ampo ka? Mahimo kang mohangyo sa Langitnong Amahan sa pagtabang kaniya nga moarang-arang ang pamati,” miingon si Mami.
Miadto si Danna sa iyang kwarto. “Minahal nga Langitnong Amahan,” nag-ampo siya, “palihug tabangi si Papi. Ug palihug tabangi ko nga masayud unsaon nako sa pagtabang kaniya. Sa ngalan ni Jesukristo, amen.”
Human sa iyang pag-ampo, mikuha si Danna og usa ka piraso nga papel. Aduna siyay ideya!
Minahal kong Papi, misulat siya. Salamat sa tanang butang. Salamat sa pagbuhat sa imong calling bisan og mouli ka sa balay nga gikapoy na usahay. Ikaw usa ka maayong ehemplo alang nako. Ikaw anak sa Dios, ug siya nahigugma! Nagmahal, Danna.
Gibilin ni Danna ang sulat diha sa kusina tupad sa pagkaon ni Papi. Dayon migawas siya wala nagsaba.
Nakigdula si Danna sa iyang mga manghud nga babaye sa dihang si Papi migawas paglabay sa pipila ka minutos. Mipahiyom siya og dako. “Salamat sa sulat, Danna,” miingon siya. Gigakos niya si Danna ug gihalukan. “Mitabang ka nako nga mabati ang gugma sa Langitnong Amahan.”
Human nga mibiya na si Papi para moadto na sa iyang miting, nangutana si Mami kon unsay nahitabo. Misulti si Danna kaniya mahitungod sa sulat. Mipahiyom si Mami ug gigakus si Danna og maayo.
“Salamat, Danna. Tungod niadtong gamayng sulat, ikaw nangalagad ni Papi.”
Migakos og hugot si Danna ni Mami. Mapasalamaton siya nga ang Langitnong Amahan midungog sa iyang pag-ampo. Nindot ang bation nga makatabang ni Papi sama sa buhaton ni Jesus .
Mga paghulagway ni Carolina Farias