Sinulat Nimo
Akong Magulang nga Lalaki Mibunyag Kanako
Sa dihang hapit na ko mag-edad og walo, ang akong mga ginikanan nangutana kon gusto ba nako nga ang akong magulang nga lalaki nga si Enzo maoy mobunyag kanako. Sa sinugdanan dili ko sigurado kon gusto ba nako nga siya ang mobunyag. Apan sa wala madugay mihukom ko nga mohangyo kaniya sa pagbunyag kanako.
Ang akong magulang nga lalaki nagbansay uban kanako sa wala pa ang akong bunyag. Gisultian ko niya kon unsa ang iyang isulti ug kanus-a kinahanglan nako sampongan ang akong ilong aron maandam nga motidlom sa tubig. Gitabangan sa akong papa si Enzo nga masag-ulo ang pag-ampo sa bunyag.
Ang akong tibuok pamilya adunay parte sa akong bunyag. Ang akong magulang nga mga babaye nga sila si Chloé ug si Margo mao ang mga saksi. Si Margo ug ang akong mama mihatag sa mga pakigpulong. Si Chloe mihimo og usa ka pasundayag sa musika sa biyolin. Si Enzo mibunyag kanako, ug ang akong papa mikumpirmar kanako nga usa ka miyembro sa Simbahan ug mihatag kanako sa gasa sa Espiritu Santo.
Samtang nangandam ko nga motidlom sa tubig, mibati ko nga mahinamon. Gibati nako ang kakulbahinam sa akong tibuok lawas. Sa dihang mitidlom na ko, gibati nako nga mainiton gayod nga dili ko gusto nga mohaw-as.
Pagkasunod adlaw nakaambit na ko sa sakramento isip usa ka bag-ong miyembro sa Ang Simbahan ni Jesukristo sa mga Santos sa Ulahing mga Adlaw. Ang akong igsoon nga lalaki mipanalangin usab sa sakramento sa unang higayon!
Lahi kaayo ang akong gibati human sa akong bunyag. Nabati nako ang impluwensya sa Espiritu Santo sa wala pa ko mabunyagi, apan karon mas gibati ko kini og maayo. Naningkamot ko nga mosunod ni Jesukristo. Gibati nako nga ang Espiritu Santo nagtabang kanako sa paghimo og mas maayong mga pagpili ug naghupay kanako. Gibati nako nga mas luwas, ug nasayod ko nga ang Langitnong Amahan nagbantay kanako.