Magtambayayong sa Pagpaningkamot
Nanghinaot si Jack nga wala lang unta siya misingka sa iyang Mama.
“Kamo kinahanglan gayud nga mopasaylo sa usag usa” (Doktrina ug mga Pakigsaad 64:9).
Si Jack may problema. Iyang gisundot ang iyang manghud nga babaye, si Harper. Gisultihan siya ni mama sa paghunong. Giyabo niya ang iyang mga dulaan sa kusina. Gihangyo siya ni mama sa pagpunit niini. Gikuha niya ang tanang plastik nga baso aron itumpi-tumpi kini. Gisultihan siya ni mama sa paghipos niini. Dayon nakig-away siya sa iyang gamayng igsoong lalaki, si Adam. Ug mao na kadto ang higayon nga si Mama misingka kaniya. Mibalos og singka si Jack. Dayon gisultihan ni Mama si Jack nga molingkod sa gawas.
Midagan si Jack agi sa kusina ug migawas ngadto sa balkonahe. Gibundak niya sa pagsira ang pultahan kutob sa iyang mahimo. Nagbalik-balik siya og lakaw-lakaw. Nasuko siya!
Ug naguol siya. Nanghinaut siya nga wala lang unta misingka si Mama kaniya.
Mihunong siya ug mitan-aw sa mga sakyanan nga anaa sa ubos sa apartment. Mitan-aw siya sa gagmayng mga sakyanan ug dagkong mga bus nga nanglabay. Nanghinaut siya nga wala lang unta siya misingka ni Mama. Wala unta niya sungoga si Harper. O nangaway ni Adam. Dili kaayo maayo ang iyang mga pagpili karon.
Nanghupaw si Jack. Mitan-aw siya og balik sa kalsada ug miihap sa mga sakyanan.
Sa wala madugay ang pultahan sa balkonahe miabli. Si Mama kadto.
“Jack?” hinay siya nga miingon. Migawas siya ug gisira ang pultahan sa iyang luyo. Mibarug siya tupad ni Jack ug mitan-aw sa mga sakyanan uban kaniya.
“Pasayloa ko nga wala ako maminaw nimo,” miingon si Jack. “Ug pasayloa ko nga ako dili kaayo maayo. Pasayloon ba ko nimo?”
“Syempre.” Gigakos ni Mama si Jack. “Pasayloa ko nga misingka ako nimo. Nagkat-on pa gihapon ko sama nimo, ug usahay masayop sab ko.”
Gigakos ni Jack si Mama og hugot.
“Atong paningkamotan og usab,” miingon si Mama.
Misunod siya ni Jack nga mibalik og sulod. Mitabang siya sa pagpunit sa mga baso. Mitabang sila ni Harper sa pagpangita sa iyang habol. Dayon nakigdula sila uban ni Adam ug Harper. Sa dihang si Adam nasuko kay napildi wala mobalos og kasuko si Jack. Mipahiyum og dako si Mama ngadto niya. Sila nagkat-on ug nagtambayayong sa pagpaningkamot.
Mga Paghulagway ni Bob Monahan