Ang Bag-ong Panimalay ni Ombeni
Ang tagsulat nagpuyo sa Utah, USA.
Unsaon kaha ni Ombeni sa pagpakighigala kon siya dili makasulti sa ilang pinulongan?
“Dili ninyo ako kaila apan inyo akong gidawat sa inyong mga panimalay” (Mateo 25:35).
Nagmug-ot ang nawong ni Ombeni nga nagtan-aw sa iyang tray sa paniudto. Ang pagkaon sa iyang bag-ong eskwelahan tam-is ra kaayo. Nanghinaut siya nga makakaon lang unta sa linuto sa iyang mama nga kan-on ug monggos.
Si Ombeni ug ang iyang pamilya pipila pa lamang ka semana nga nagpuyo sa Estados Unidos. Ang ilang nasud nga gigikanan peligro kaayo nga poy-an, mao nga kinahanglan silang mobalhin ngadto sa USA isip mga bakwit [refugee]. Lisud ang pagbalhin. Ang pag-anad-anad niining bag-ong eskwelahan lisod kaayo.
Si Ombeni nakakita og usa ka bakante nga dapit duol sa usa ka grupo sa mga batang lalaki ug milingkod. Silang tanan mitan-aw kaniya. Usa ka batang lalaki adunay gisulti, apan si Ombeni dili makasabot kaniya. Wala pa kaayo siyay daghang nakamaohan sa Iningles.
Misulay si Ombeni sa pagtubag. “Jambo,” miingon siya. (“Kumusta.”)
Ang bata daw naglibog. Gikusmuran niya si Ombeni ug mitalikod. Mibati si Ombeni og kaulaw, apan hilom lang siya nga milingkod didto sa tumoy sa lamesa. Usahay mora kini og anaa siya sa laing planeta niining bag-ong eskwelahan.
Sa dihang ang pag-eskwela natapos na gayod, nagdali si Ombeni ug nanipir sa iyang kupo. Didto sa ilang gipuy-an sa una, wala gayod siya nagkinahanglan og kupo, bisan unsa pay panahon sa tuig. Apan dinhi bugnaw panahon sa tingtugnaw. Ang ubang mga bata magsul-ob og lumoy nga mga gwantes ug mga kalo, apan si Ombeni walay ingon ana.
Makakita si Ombeni sa iyang gininhawa nga puting hangin samtang siya naglakaw. Misugod siya sa pagdagan aron siya mas daling makaabot sa balay. Gidasmagan niya ang pultahan sa atubangan ug hapit niya maigo si Mama.
“Ombeni! Punguza mwendo! “ miingon siya. (“Hinay lang!”)
“Pasayloa ko, Ma,” miingon siya, nga nagkurog.
Milingkod si Ombeni ug nagpainit samtang ang iyang mama nagluto og panihapon.
Human sa pipila ka minuto, si Ombeni dili na mahimutang. “Mama, dili na ko ganahan mobalik sa eskwelahan! Makahadlok ug mingaw, ug dili ko makakitag mga higala. Gimingaw ko sa akong mga higala didto sa kanhi pinuy-anan.”
Mihunong si mama sa pag-ukay ug miluhod tupad ni Ombeni. Dali dayon niyang gipahiran ang iyang mga luha. Dili siya gusto nga makit-an ni Mama kon unsa siya kaguol.
“Nasayud ko nga lisud karon.” Mainiton nga gigakos siya ni Mama. “Apan magkasayon ra kini.”
Milingiw si Ombeni. “Apan unsaon man nga mas mahimong sayon kon dili ko makasabot ni bisan kinsa?”
Nagmug-ot si mama. Makita ni Ombeni nga naghunahuna siya og maayo.
“Nakahinumdom ka ba sa dihang didto pa kita sa kampo sa mga bakwit?” nangutana siya. “Sa higayon nga ako mibati og kamingaw gayod, mangita ko og tawo nga akong matabangan. Makapahimo kini nako nga mobati og mas maayo.”
Mitando si Ombeni. Nahinumdom siya kon sa unsang paagi si Mama kanunayng makakita sa mga tawo kinsa miabut sa kampo nga nag-inusara ug gipakita kanila kon asa moadto.
Mipahiyom si Mamá. “Ug maghunahuna mahitungod ni Jesus! Kasagaran sa mga tawo bati og tinagdan ngadto Kaniya. Apan Siya kanunayng mangita sa mga tawo nga tabangan.” Siya mipahid og laing luha gikan sa aping ni Ombeni. “Usahay kon kita magguol, ang labing maayong butang nga atong mahimo aron matabangan ang atong mga kaugalingon mao ang pagpangita og mga paagi sa pagtabang sa ubang mga tawo.”
Mitando si Ombeni. Morag nindot na nga ideya. Siya gusto nga mahimong sama ni Jesus.
Pagkasunod adlaw sa tingpaniudto, si Ombeni nangita og usa ka tawo aron tabangan. Daghang mga bata nanglingkod kauban sa dakong grupo sa mga tawo. Dayon nakamatikod siya og usa ka batang babaye nga naglingkod sa usa ka lamesa nga siya rang usa.
Miduol siya ngadto niya ug gibutang ang iyang tray. Miwara-wara siya ug miingon, “Jambo!”
“Kumusta,” miingon siya.
Mipahiyum og dako si Ombeni. Mibawos og pahiyom ang batang babaye. Dayon hilom silang nagdungan sa pagpangaon.
Mibati si Ombeni og kalipay. Ang mga butang niining bag-ong eskwelahan malisod pa gihapon. Apan nalipay siya nga nasayud nga adunay mga tawo dinhi nga iyang matabangan.
Mga paghulagway ni Jen Tolman