Tsa o Mango Juice?
Ang tagsulat nagpuyo sa California, USA.
Kini nga istorya nahitabo sa Taiwan.
“Nganong dili ka ganahan og tsa?” Nangutana si Jiro.
“Barugan ang Kamatuoran” (Songbook sa mga Bata, 81).
Naglakaw si Chung sa usa ka busy nga dalan sa Taiwan. Ang iyang higala nga si Jiro duol tupad kaniya. Adunay mga tawo bisan asa! Ang mga mamalitay mitan-aw og mga sinina nga gibaligya og barato, ang mga bata nagdula, ug ang mga tawo nagdali nga nag-istorya diha sa ilang mga cellphone. Gigunitan pag-ayo ni Chung ang iyang bag sa eskwelahan aron sa pagsiguro nga dili ni niya mabuhian.
“Dili ko makatuo nga hapit na mahuman ang tingklase!” Kusog nga miingon si Chung aron makadungog si Jiro.
“Mao gayod! Andam na ko nga mahuman ang mga klase,” miingon si Jiro.
Milabay si Chung ug Jiro sa mga tindahan nga nagbaligya og nagkalain-laing klase sa pagkaon. Dragon fruit ug mga strawberry. Prito o sinugba [sizzling] nga mga dumpling. Mga peanut ice cream roll. Anaa bisan asa ang humot sa lami nga pagkaon! Apan ang tanan nga mahunahunaan ni Chung kay unsa ka init ug ka pilit ang iyang gibati.
“Mura og naa ko sulod sa hudno!” Miingon si Chung.
“Ako sad,” miingon si Jiro. “Mopalit ta og mga mainom.”
Miadto sila sa tindahan nga namaligya og mga mainom nga hayag ang kolor.
Mikuha og kwarta si Jiro. “Duha ka boba nga tsa, palihog.”
Nasayod si Chung nga ang tsa supak sa Pulong sa Kaalam. “Sa tinuod lang, pwede og mango juice lang akoa?” mihangyo siya.
Mitan-aw si Jiro kang Chung. Gikulbaan si Chung. Naghunahuna ba kaha si Jiro nga salikwaot siya kay dili siya moinom og tsa?
Gitunol sa babaye ang usa ka bugnaw nga boba nga tsa ngadto kang Jiro ug ang usa ka mango juice ngadto kang Chung. Dayon ang batang mga lalaki milakaw og balik ngadto sa dalan padulong sa ilang mga panimalay.
Gisuyop ni Jiro ang iyang ilimnon. “Nganong dili man ka ganahan og tsa? Lami kaayo ni!”
Naulaw motubag si Chung. “Kuan, dili ko moinom og tsa.”
“Nganong dili man?”
Naghunahuna si Chung kon unsaon sa pagtubag sa pangutana. Ang mga misyonaryo mitudlo kaniya mahitungod sa Pulong sa Kaalam. Sa iyang klase sa Primary iyang nakat-onan nga ang pagtuman sa Pulong sa Kaalam makatabang kaniya nga makabaton sa Espiritu Santo uban kaniya.
“Nagtuo ko sa Dios, ug gusto Niya nga atimanon nako ang akong lawas. Siya mihangyo nga dili kita moinom og tsa o kape o makahubog nga ilimnon,” miingon si Chung.
“Giunsa man nimo pagkahibalo niana?” Nangutana si Jiro.
“Nakat-onan nako ang mahitungod niini sa simbahan.”
Miinom og balik si Jiro. “Mura og binuang man kana. Tsa ra man gud kana! Dili man kini makadaot kanimo.”
Gikulbaan og maayo si Chung. Unsaon man niya pagtabang ni Jiro nga makasabot? Tingali usa ka tawo didto sa simbahan ang makatabang kaniya sa pagpasabot niini ngadto kang Jiro.
“Ganahan ka ba mokuyog nako sa simbahan puhon? Nagsimba ko sa Ang Simbahan ni Jesukristo sa mga Santos sa Ulahing mga Adlaw. Makakat-on ka mahitungod sa Dios ug ni Jesukristo.”
Naghunahuna og kadiyot si Jiro. “Dili lang tingali.”
“OK,” miingon si Chung. Naguol siya og gamay nga dili gusto ni Jiro nga mokuyog uban kaniya sa simbahan. Apan nalipay gihapon siya nga gipaambit niya ang iyang pagpamatuod.
Sa hinapos nianang semanaha didto sa eskwelahan, ang magtutudlo ni Chung, si Mr. Lin, mitawag sa atensiyon nilang tanan. “Ugma mao ang kataposang adlaw sa klase. Tungod kay ang tanan naningkamot og maayo niining tuiga, ako adunay surprisa. Kitang tanan mag-boba nga tsa!”
Miabiba ang tibuok klase. Ang tanan gawas kang Chung. Ingon og mitago siya sa iyang lingkoranan. Ang pagsulti sa iyang magtutudlo nga dili siya moinom og tsa mahimo ganing mas lisod kay sa pagsulti kang Jiro! Ang tanan maghunahuna nga salikwaot kana, sama lang sa gihunahuna ni Jiro.
Gipataas ni Jiro ang iyang kamot. “Mr. Lin? Si Chung dili moinom og tsa. Kabahin kini sa iyang relihiyon. Mahimo ba nga mango juice lang iyaha hinoon?”
Milingi si Mr. Lin ngadto kang Chung. “Tinuod ba kana, Chung?”
Mitando si Chung.
Mipahiyom si Mr. Lin. “OK. Mo-order hinoon ko og juice alang kanimo.”
Human sa klase, nagdungan og lakaw pauli si Chung ug si Jiro. “Salamat sa paghimo niadto,” miingon si Chung.
Mipahiyom si Jiro. “Higala tika. Kon ang usa ka butang importante alang kanimo, nan importante kini alang kanako.”
Mga paghulagway ni Melissa Manwill