Higala ngadto sa Higala
Usa ka Milukoton [Peach] sa matag Higayon
Gikan sa usa ka interbyu uban ni Amber Healey
Sa gamay pa ko nga bata, ang akong mga ginikanan midala sa akong igsoong babaye ug nako ngadto sa tanaman nga gipanag-iya sa Simbahan. Didto mi aron manabang sa pagpamupo og mga milukoton. Misaka kami og tag-as nga mga hagdanan ug mikab-ot sa baga nga mga dahon aron sa pagpupo sa mga milukoton gikan sa mga punoan.
Sa sinugdanan, naghinam-hinam kami. Apan sa wala madugay ang among mga bukton nangatol tungod sa dapaw sa prutas! Gisultihan namo ang among mama, “Dili na mi ganahan mobuhat pa niini. Gusto na kaming moundang.”
Ang akong mama nangutana kanamo kon nasayod ba kami kon asa padulong ang tanang milukoton. Sa dihang misulti kami nga wala, mipasabot siya niini ngari kanamo.
“Ang matag usa niini nga mga milukoton dad-on ngadto sa usa ka gambalay diin ang mga boluntaryo mobutang niini sa sulod sa mga lata. Dayon kadtong mga linata ihatag ngadto sa mga tawo kinsa nagkinahanglan og pagkaon. Matag tuig ang Simbahan nagdonar og liboan ka mga linata nga pagkaon.”
Sa kalit lang, ang akong igsoong babaye ug ako mihunong sa pagkabalaka sa among nagkatol nga mga bukton. Nagtabang kami sa mga tawo kinsa nagkinahanglan og pagkaon! Human niadto, nalingaw kami sa pagsaka sa mga hagdanan ug namupo og mga bunga sa dapawon nga prutas nga kahil [orange].
Niining tuiga kami naghangyo kaninyo sa pag-apil diha sa usa ka imbitasyon sa Matinabangong mga Kamot [Helping Hands] (tan-awa sa Enero 2021 nga Higala). Ang pagserbisyo sa uban sa paagi nga si Kristo miserbisyo usa sa labing importanting mga butang nga inyong mahimo. Ang mga bata adunay espesyal nga paagi nga makabatyag niadtong anaa sa panginahanglan ug sa pagboluntaryo sa ilang tabang. Usa ka gamayng buhat sa pagserbisyo ingon og dili kaayo dako sa sinugdanan. Apan kon ang mga bata sa tibuok kalibotan mangita og mga paagi sa pagserbisyo, sila makadugang ngadto sa talagsaong mga butang!
Mga paghulagway ni Toby Newsome