O Se Tatalo mo Papi
E alala le tusitala i Sacatepéquez, Kuatemala.
Sa foliga faanoanoa Papi. E faapefea ona fesoasoani Dana?
“Ia a’oa’o i latou ia alofa le tasi i le isi, ma auauna le tasi i le isi” (Mosaea 4:15).
Na tilotilo atu Dana i fafo o le faamalama. Sa ia iloa atu Papi ua sau i le fale mai le galuega. Sa tuai mai nai lo le mea na masani ai.
“O i ai se mea ua faaletonu, Papi?” Sa fesili Danna ina ua sau Papi i totonu o le fale. Sa foliga le lava o ia ma faanoanoa.
“Ia, sa faigata lo’u aso i le galuega,” o le tala lea a Papi. “Ma o lenei ua ou tuai i se fonotaga taua i le lotu.”
“E mafai ona ou fesoasoani atu ia te oe?” O le fesili lea a Danna. Sa popole o ia ia Papi.
“E mafai ona e fai atu ia Mami pe mafai ona fai sa’u meaai e ai i totonu o le taavale?” O le fesili a Papi. “Ou te manaomia ona ou faanatinati ma sui i o’u ofu lotu.”
Sa tamoe atu Danna e ta’u ia Mami. Ua leva ona i ai o ia i le umukuka ma faia se sanuisi.
“E mo Papi lena?” O le fesili a Danna. “Na ia fai mai ua tuai.”
“Ioe, e mo Papi,” o le tala lea a Mami. Sa ia tuu se apu ma se vaiinu i autafa o le sanuisi.
“O loo faanoanoa Papi, ma ou te le iloa po o le a le mea o faaletonu. “O e iloa?” O le fesili a Danna.
Sa mapuea Mami. “E tele mea a Papi e fai. O lona papatua na tiga foi talu ai nei. ”
“Ou te fia faia se mea e fesoasoani ai ia te ia,” o le tala lea a Danna.
“Ae faapefea pe a fai sau tatalo? E mafai ona e ole atu i le Tama Faalelagi e fesoasoani ia ona maua se lagona lelei, “o le tala lea a Mami.
Na alu Danna i lona potu. “Le Tama Faalelagi pele,” sa ia tatalo ai, “Faamolemole fesoasoani ia Papi. Ma faamolemole fesoasoani mai ia ou iloa le auala e mafai ona ou fesoasoani ai ia te ia. I le suafa o Iesu Keriso, amene.”
Ina ua uma lana tatalo, na uu mai e Danna se fasi pepa. Sa iai sona manatu!
Papa Pele, na ia tusia. Faafetai mo mea uma. Faafetai atu mo le faia o lou valaauga e tusa lava pe a e sau i le fale ma lou le lava i isi taimi. O oe o se faataitaiga lelei mo au. O oe o se atalii o le Atua, ma e alofa o Ia ia te oe. Ma le alofa, Danna.
Na tuua e Danna le tusi i le umukuka i autafa o le meaai a papi. Ona ia savali ai lea i fafo e aunoa ma se pa’o.
Sa taaalo Danna ma nai ona uso laiti ina ua oo mai Papi i ni nai minute mulimuli ane. Na i ai se ataata lapoa i ona foliga. “Faafetai lava mo le tusi, Danna,” na ia fai mai ai. Sa ia opoina o ia ma kisi i ai. “Sa e fesoasoani ia ou lagona le alofa o le Tama Faalelagi.”
Ina ua alu Papi mo lana fonotaga, sa fesili Mami po o le a le mea na tupu. Sa ta’u atu e Danna ia te ia e uiga i le tusi. Sa ataata Mami ma tuu atu ia Danna se opo lapoa lava.
“Faafetai lava, Danna. Faatasi ai ma lena tamai tusi, na e auauna atu ia Papi”
Sa fusi mau e Danna ia Mami. Sa ia faafetai na tali mai e le Tama Faalelagi lana tatalo. E manaia le lagona o le fesoasoani ia Papi e pei o Iesu.
Ata na tusia e Carolina Farías