Taumafai Faatasi

Saunia e Lori Fuller Sosa

Mekasini a le Ekalesia

(E faavae i se tala moni)

Sa moomoo siaki maimau pe ana le’i ee ia Tina.

“E tatau ona outou faamagalo le tasi i le isi” (Mataupu Faavae ma Feagaiga 64:9).

Na faaletonu Siaki. Sa ia taufaalili i lona tuafafine laitiiti, o Harper. Sa fai atu tina ia te ia e taofi. Sa ia tatiai ana meataalo i le umukuka. Sa fai atu ai tina ia te ia e piki i luga. Sa ia aumaia ipu palasitika uma e fausia ai. Sa fai atu tina ia te ia e aveese. Ona oo atu lea o ia i se tauaimisaga ma lona uso laitiiti, o Atamu. Ma o le taimi lena na ee atu ai Tina ia te ia. Na toe ee mai Siaki. Ona fai atu lea o tina ia Siaki e alu e nofo i fafo.

Sa tamoe Siaki i le umukuka ma agai atu i le poletito. Sa ia toe tapuni le faitotoa ma le malosi na te mafaia. Sa ia savali i tua ma agai i luma ma agai i tua ma agai i luma. Sa ita o ia!

Ma sa faanoanoa foi o ia. Sa moomoo o ia maimau pe ana le ee atu Tina ia te ia.

Sa ia tu ma tilotilo ifo i lalo i taavale lea e mamao i lalo ifo o le fale mautotogi. Sa ia matamata i taavale laiti ma pasi tetele na gasolo ifo. Sa moomoo o ia na te le’i ee ia Tina. Sa le tatau ona ia taufaalili ia Harper. Pe misa ma Atamu. Na te lei faia ni filifiliga lelei i le aso lenei.

Sa mapu’ea Siaki. Sa ia tilotilo atu i tua i le auala ma faitau ia taavale.

E le’i umi ae matala loa le Faitotoa a le poletito. O Tina.

“Siaki,” sa ia fai atu lemu ai. Sa ia tu i fafo ma tapuni mai le faitotoa i ona tua. Sa ia tu i talane o Siaki ma tilotilo faatasi atu ma ia i taavale.

“Ou te faatoese atu ou te le’i faalogo ia te oe,” o le tala lea a Siaki. “Ma ou te faamalie atu ona ou te le’i lelei tele. E mafai ona e faamagaloina a’u?”

“Ae a.” Sa tuu atu e Tina se opo lapo’a ia Siaki. “Ou te faatoese atu sa ou ee atu ia te oe. O loo o’u aoao pea e pei lava o oe, ma o nisi taimi ou te faia ai ni mea sese.”

Na fusi mau e Siaki ia Tina.

“Ta toe taumafai,” o le tala lea a tina.

Sa ia toe mulimuli ia Siaki i totonu. Sa ia fesoasoani ia te ia e piki i luga ipu. Sa la fesoasoani ia Harper e sue lona palanikeke. Ona la taaalo lea ma Atamu ma Harper i se taaloga. Ina ua le fiafia Atamu i le faia’ina, sa le’i toe ita Siaki. Sa ataata atu Tina ia te ia. Sa la aoao ma taumafai faatasi.