Lauti po o le Vaiinu Mago?
E alala le tusitala i Kalefonia, ISA.
O lenei tala sa tupu i Taiuani.
“Aisea na e le manao ai i le lauti?” O le fesili lea a Jiro.
“Tu Mo Le Mea Tonu,” (Tusipese a Tamaiti, 81).
Sa savali Chung i lalo o se auala pisi i Taiuani. Sa latalata atu lana uo o Jiro i ona tafatafa. Sa i ai tagata i soo se mea! Na tilotilo atu tagata faatau i ni ofu mo le faatauina mai, o tamaiti na taaalo i ni taaloga, ma na faanatinati tagata a o talanoa i a latou telefoni. Sa taofi mau e Chung lana ato aoga ina ia mautinoa e le pa’ū ia te ia.
“Ou te le talitonu e toeitiiti uma le tausaga a’oga!” Sa fai leotele ai Chung ina ia mafai ona lagona mai e Jiro.
“Ua ou iloa! Ua ou sauni e le toe iai ni vasega,” o le tala lea a Jiro.
Na pasia e Chung ma Jiro le vaega e faatau ai ituaiga uma o meaai. Fualaau aina Tarako ma strawberries. Puka moa falai. Aisakulimi pinati. Sa i ai manogi mananaia i soo se mea! Ae na o le pau lava le mea o loo mafaufau iai Chung o le vevela ma le piipii na ia lagonaina.
“Ou te lagona e pei o o’u i ai i se ogaumu!” o le tala lea a Chung.
“E faapena foi a’u,” o le tala lea a Jiro. “Ta faatauina ni vaiinu.”
Sa la agai atu i se vaega o loo faatauina ai ni vaiinu felanulanu a’i.
Na aveese mai e Jiro se tupe. “Lua lauti boba, faamolemole.”
Sa iloa e Chung o lauti sa le tusa ai ma le upu o le poto. “E a, e mafai ona fai sa’u vaiinu mago?” na ia fesili ai.
Na liliu atu Jiro e vaai ia Chung. Sa milimili le manava o Chung. Pe na manatu Jiro e ese lava o ia mo le le aumaia o se lauti?
Sa tuuina atu e le fafine se lauti boba malulu ia Jiro ma se vaiinu mago ia Chung. Ona toe savavali atu lea o Tama i le auala e agai atu i o la’ua fale.
Sa mimiti e Jiro lana vaiinu. “Aisea na e le manao ai i le lauti? E matuai manaia lava!”
Sa u e Chung lona laugutu. “Ia, ou te le inu lauti.”
“Aisea?”
Sa mafaufau Chung pe faapefea ona tali le fesili. Sa aoaoina o ia e faifeautalai e uiga i le Upu o le Poto. I lana vasega Peraimeri sa ia aoaoina ai o le tausia o le Upu o le Poto e fesoasoani ia te ia e maua ai le Agaga Paia.
“Ou te talitonu i le Atua, ma e na te finagalo ia ou tausia lo’u tino. Na Ia fai mai ‘aua tatou te inuina le lauti po o le kofe po o le ava malosi,” o le tala lea a Chung.
“E faapefea ona e iloaina lena mea?” Na fesili ai Jiro.
“Sa ou aoao e uiga i ai i le lotu.”
Sa toe miti e Jiro lana vaiinu. “E foliga valea lena mea. Ua na’o le ti! E te le afaina ai.”
Sa foliga mai o le manava o Chung na tumu i lane osooso. E faapefea ona ia fesoasoani ia malamalama Jiro? Atonu e mafai e se tasi i le lotu ona fesoasoani ia te ia e faamatala atu ia Jiro.
“E te fia sau i le lotu ma a’u i se taimi? Ou te auai i Le Ekalesia a Iesu Keriso o le Au Paia o Aso e Gata Ai. E mafai ona e aoao e uiga i le Atua ma Iesu Keriso.”
Sa mafaufau Jiro mo sina taimi. “Ou te manatu e leai.”
“LELEI,” o le tala lea a Chung. Sa ia lagonaina le faanoanoa laitiiti ona sa le manao Jiro e sau i le lotu ma ia. Ae peitai, sa fiafia lava o ia sa ia faasoa atu i ai lana molimau.
Mulimuli ane i lena vaiaso i le aoga, sa valaau atu ai le faiaoga a Chung, o Mr. Lin, mo le gaua’i atu o tagata uma. “O taeao o le aso mulimuli lea o le vasega. Talu ai o tagata uma sa galulue malosi i lenei tausaga, E iai sa’u meaalofa. O le a aumai uma a tatou lauti boba!”
Sa alalaga uma le vasega. Tagata uma lava se’i vagana ai Chung. Sa ia faase’e i lalo i lona nofoa. O le ta’uina atu i lona faiaoga na te le inu lauti, o le a faigata atu nai lo le ta’uina atu ia Jiro! O le a manatu tagata uma e ese lava o ia, e pei o Jiro.
Na sii le lima o Jiro. “Mr. Lin? E le inu lauti Chung. O se vaega o lana tapuaiga. Mata e mafai ona aumai sana vaiinu mago nai lo lena?”
Sa liliu atu Mr. Lin ia Chung. “E sa’o lena mea, Chung?”
Na luelue le ulu o Chung.
Sa ataata le susuga ia Mr. Lin. “LELEI. O le a ou okaina mo oe se vaiinu nai lo lena.”
Ina ua tuua le aoga, sa savavali faatasi Chung ma Jiro i le fale. “Faafetai lava mo le faia o lena mea,” o le tala lea a Chung.
Sa ataata Jiro. “O oe o la’u uo. Afai e taua se mea ia te oe, e taua foi lena mea ia te au.”
Ata na tusia e Melissa Manwill