E pei lava ona ia vaai faalemafaufau
O lenei tala sa tupu i Kyiv, Iukureini.
Sa fiafia Kvitka o le a papatiso, ae sa faanoanoa o ia e le mafai ona o mai ni tagata.
“Ma tutu o ni molimau a le Atua i taimi uma ma i mea uma, ma i nofoaga uma” (Mosaea 18:9).
O le aso nei o le aso papatisoga a Kvitka. Sa ia mafaufau e uiga i lenei aso mo se taimi umi. Sa ia mafaufauina mea uma. Ofuina o se ofu paepae faapitoa. Tato (Tama) na papatisoina o ia. Ma o ana uo ma aiga uma sa iina, ua ataata ma le mitamita tele.
Ae o le aso o le a fai si eseesega nai lo le mea na mafaufauina ai Kvitka.
O nisi mea na tutusa lava. Sa ia ofuina se ofu paepae faapitoa, e pei lava sa ia mafaufauina. Babusya (tinamatua) sa suiina lenei ofu mo Mama e papatiso ai a’o laitiiti o ia. Ma o lea la ua oo i le taimi o Kvitka.
O le a papatiso o ia e Tato. E pei lava ona sa ia mafaufauina. Sa matamata Kvitka ia te ia i le loloina o lona lima i totonu o le vai o loo i totonu o le faatanoa.
“Lelei ma mafanafana,” o lana tala lea. Sa ataata atu o ia ia Kvitka. Sa ia toe ataata mai. Ona ia tilotilo atu lea i nofoa sa ia fesoasoani e faatulaga ma Tato.
E le’i toatele naua. O le eseesega sili lena. Sa mafaufau pea Kvitka e toatele tagata o le a omai i lona papatisoga. Ae na o ni nai tagata lava na i ai.
Talu lava ona mamai tagata mai le KOVITI-19, e tele ni mea sa ese ai. O ia ma lona tuagane laititi o, Vlas, sa aooga i le fale. Sa latou faia ni ufimata pe a latou tuua lo latou fale mautotogi. Ma e leai se tasi na potopoto i vaega toatele. Leai se mea i soo se mea. Sa manao Kvitka e fesoasoani e tausia tagata ia saogalemu, ae o nisi taimi sa faigata.
Faapei o le a le mafai ona e valaauliaina tagata uma i lou papatisoga.
“Kvitka! Ua e aulelei a!”
Na tilotilo atu Kvitka ma iloa ai Babusya o savali atu i le faitotoa.
“Malo, Babusya!” Sa oso ese mai Kvitka mai lona nofoa ma tamoe atu i luga.
“E te foliga e pei lava o lou tina,” o le tala lea a Babusya. Sa ia pa’i atu i fugalaau papae i le lauulu o Kvitka. Sa fetaui ma Leise memei fugalaau e i luga o lona ofu. E fiafia Kvitka i fugalaau. O lona igoa o le “fugalaau” lona uiga i le faaIukureini.
“Ua e fiafia o le a e papatiso?” O le fesili a Babusya.
“Ioe!” o le tala lea a Kvitka. “Pau lava, e leai se tasi o iai iinei.”
“Leai se tasi!” O le tala lea a Babusya. Sa tilotilo solo o Ia. “Ae o loo o’u vaai atu ia Mama, Tato, Vlas, ma Melania laitiiti. Ma le epikopo lale. Ma faifeautalai e toalua. E le’o o le leai se tasi lena.”
Sa faamimigi Kvitka. “Ae e leai se tasi o a’u uo o i ai iinei.”
“E tatau ona e faanoanoa ai,” o le tala lea a Babusya. “Ae e i ai ni malo faaaloalogia e toalua.”
Sa fiafia Kvitka. “O Ai?”
“O le uso o lou tina o Pavlina,” o le tala lea a Babusya. “Ma lou tausoga o Emma!”
“E mo’i?” Sa fesili mai ai Kvitka ma le naunautai.
Sa ataata Babusya. “Pe a o mai laua iinei, pe mafai ona e faia se mea mo a’u?”
Sa luelue mai le ulu o Kvitka . “O le a?”
“Ia, pe a e papatiso, o le tasi mea e te folafola atu o le tu lea o se molimau ia Iesu Keriso. E te iloa le uiga o lena mea?”
Sa iloa e Kvitka. Sa suesueina e lona aiga feagaiga o le papatisoga mo ni vaiaso!
“O lona uiga o le avea ma se faifeautalai!”
“Lelei tele,” o le tala lea a Babusya. “O le uso o lou tina ma lou tausoga e le’i auai lava i se tasi o maota o le Ekalesia muamua. Pe o le a avea ea oe ma se faifeautalai ma fesoasoani e avatu ia i laua se malaga maimoa?”
“Ioe!” o le tala lea a Kvitka.
Ina ua taunuu atu Aunty Pavlina ma Emma, na faapena le mea na faia e Kvitka ma Babusya. Sa la faaali atu ia i laua le potu o le Peraimeri, lona potuaoga, ma le falesa. Ona latou o ane ai lea i le faatanoa o le vai papatisoga. Sa ta’u atu e Kvitka ia i latou sa manao e papatiso e mulimuli ai ia Iesu Keriso. Sa ia lagonaina se malamalama, lagona mafanafana a o ia tautala. Sa ataata atu Aunty Pavlina ma Emma ia te ia. Sa ia faamoemoe sa la lagonaina foi lea lava lagona e tasi.
E le’i umi ae oo mai le taimi mo le papatisoga. Sa taofi le manava a Kvitka a o faatofu o ia i lalo o le vai e Tato—e pei lava ona sa ia mafaufau i ai. Atonu e na o ni nai tagata na matamata, ae sa latou ataata e pei lava sa ia mafaufauina. Ma sa ia mautinoa sa ataata mai foi le Tama Faalelagi ma Iesu Keriso i lalo ia te ia. Sa faigofie ona mafaufauina lena mea.
Ata na tusia e Stephanie Dehennin