Fale Fou o Ombeni
E alala le tusitala i Iuta, ISA.
E mafai faapefea ona fai e Ombeni ni uo pe ana faapea e le mafai ona ia tautala i le la gagana?
“Sa fai a’u ma tagata ese, ona outou talia lea o a’u” (Mataio 25:35).
Sa faanonou Ombeni i lalo i lana meaai i le malologa. O meaai i lana aoga fou sa suamalie tele. Sa moomoo o ia ina ia mafai ona ia ai le araisa ma le meaai pi a lona tina.
Na faatoa nonofo lava Ombeni ma lona aiga i le Iunaite Setete mo ni nai vaiaso. O lo latou atunuu e matua le saogalemu mo le nonofo ai, o lea na tatau ai ona latou siitia atu i le ISA e pei o tagata sulufai. Sa faigata le siitia atu. Sa faigata foi le faamasani atu i lana aoga fou.
Na maua e Ombeni se nofoaga avanoa e latalata i se vaega o tamaiti ma saofai ifo ai i lalo. Sa latou liliu uma lava e vaai atu ia te ia. Sa fai mai e se tasi o Alii se tala, ae sa le malamalama Ombeni ia te ia. Sa le’i iloa tele e ia se Igilisi.
Sa taumafai Ombeni e toe fai se isi tala. “Jambo,” o lana tala lea. (“Talofa.”)
Sa foliga le mautonu le tamaitiiti. Sa faanonou o ia i a Ombeni ma liliuese. Sa lagona e Ombeni le fia faalapotopoto pei se tamai polo, ae sa nofo filemu o ia i le faaiuga o le laulau. O nisi taimi sa lagona e pei o loo i ai o ia i se paneta ese i lenei aoga fou.
Ina ua iu lava le aoga, sa faatopetope Ombeni ma sipi lona ofumafanafana. I lona atunuu, na te le’i manaomia se peleue, e tusa lava po o le a le taimi o le tausaga. Ae o iinei sa malulu i le taumalulu. Sa fai e isi tamaiti ia totigilima fulufulua ma pulou, ae e le’i i ai lava se mea o na mea ia Ombeni.
Sa mafai ona iloa atu e Ombeni lana manava i asu paepae o le ea a o savali. Sa amata ona tamoe ina ia vave ona alu i le fale. Sa oso mai o ia i le faitotoa i luma ma toeitiiti lava lavea atu ia Mama.
“Ombeni! Punguza mwendo! “ o lana tala lea. (“Alu lemu!”)
“Faamalie atu, mama,” na ia fai mai ai, gatete.
Sa nofo i lalo Ombeni ma taumafai e faamafanafana a o kukaina e lona tina le taumafataga o le afiafi.
Ina ua mavae ni nai minute, sa le mafai ona toe filemu Ombeni. “Mama, Ou te le toe fia alu i le aoga! E taufaafefe ma tuuatoatasi, ma e le mafai ona ou maua ni uo. Ua ou misia a’u uo i le fale. ”
Sa taofi le sa’eu a Mama ma tootuli i lalo i autafa o Ombeni. Sa vave ona ia soloese ona loimata. Na te le’i manao e vaai Mama i lona faanoanoa.
“Ou te iloa e faigata nei mea i le taimi nei.” Sa tuuina atu e Mama ia te ia se opo mafanafana. “Ae o le a oo lava ina faigofie.”
Sa tilotilo ese ia Ombeni. “Ae faapefea ona faigofie atu ia mea, pe afai ou te le malamalama i se tasi?”
Sa faanonou Mama. Sa iloa e Ombeni ua mafaufau malosi o ia.
“Manatua le taimi sa tatou i ai i le Tolauapiga a tagata sulufai?” na ia fesili ai. “Soo se taimi lava sa ou lagona ai le tuua toatasi, o le a ou saili mo tagata e mafai ona ou fesoasoani i ai. Sa ou maua ai lava le lagona fiafia.”
Sa luelue le ulu o Ombeni. Na ia manatuaina le ala e maua ai pea e Mama tagata o e o mai i le tolauapiga ma faaali atu ia i latou le mea e o i ai.
Sa ataata Mamá. “Ma Mafaufau e uiga ia Iesu! Sa masani ona agaleaga atu tagata ia te ia. Ae sa vaavaai lava o ia i taimi uma mo tagata e fesoasoani i ai. ” Sa ia soloia le isi loimata mai foliga o Ombeni. “O nisi taimi pe a tatou faanoanoa, o le mea sili e mafai ona tatou faia e fesoasoani ai ia i tatou lava o le saili mo auala e fesoasoani ai i isi tagata.”
Sa luelue le ulu o Ombeni. Ou te lagona o se manatu lelei. Sa manao o ia ia agalelei e pei o Iesu.
O le aso na sosoo ai i le taumafataga o le aoauli, sa vaavaai ai Ombeni mo se tasi e fesoasoani i ai. E toatele tamaiti na nonofo i ni vaega toatele o tagata. Ona ia matauina lea o se teineitiiti sa nofo i se laulau na o ia lava.
Sa ia savali atu ia te ia ma faataatia i lalo lana fata. Sa ia talotalo atu ma fai mai, “Jambo!”
“Talofa,” o lana tala lea.
Sa ataata tele Ombeni. Sa ataata mai foi le teineitiiti. Ona la aai faatasi lea ma le filemu a la’ua meaai.
Sa lagona e Ombeni le fiafia. O le a faigata pea mea uma i lenei aoga fou. Ae sa fiafia o ia i le iloaina sa i ai ni tagata iinei sa mafai ona ia fesoasoani i ai.
Ata na tusia e Jen Taylor