Higala ngadto sa Higala
Usa ka Pagbati sa Kalinaw
Gikan sa usa ka interbiyo ni Lucy Stevenson Ewell.
Usa ka buntag sa dihang 11 anyos pa ko, nakamata ko ug nakadungog og mga tingog sa sala. Walay mipukaw nako alang sa eskwelahan sama sa ilang buhaton kasagaran. Sa dihang migawas ko aron makita kon unsay nahitabo, akong nahibaloan nga namatay ang akong papa.
Samtang ang akong pamilya nag-istoryahanay sa sala, miadto ko sa among tanaman. Dako ang among tanaman, ug mitrabaho ko kauban ang akong papa aron sa pagtabang sa pag-atiman niini. Milingkod ko sa lingkoranan ilawom sa kahoy ug mihilak. Naguol gyod ko ug naglibog.
Human sa pipila ka minuto, akong nakita ang akong magtutudlo sa Primary nga miabli sa ganghaan. Miduol siya ug milingkod sa lingkoranan tupad nako ug miingon, “Joni, nakahinumdom ka ba sa atong leksyon sa miaging Dominggo mahitungod sa plano sa kaluwasan?” Ang akong magtutudlo mipasabot nako pag-usab nga ang atong mga kalag gilangkoban sa usa ka espiritu ug usa ka lawas. Siya miingon nga ang espiritu sa akong papa anaa sa maayong dapit, ug sa umaabot nga adlaw siya mabanhaw. Sa umaabot nga adlaw makita nako siya pag-usab.
Bisan tuod og naguol gihapon ko, mibati ko og kalinaw. Mahinumdoman nako kana nga kalinaw sa matag higayon nga maghunahuna ko mahitungod niana nga kasinatian. Ang akong magtutudlo sa Primary nangalagad ngari kanako, ug ang Espiritu Santo mihupay kanako. Nakatabang kini sa pag-ugmad sa akong pagpamatuod bahin sa gugma sa Langitnong Amahan ug sa plano sa kaluwasan.
Bisan unsa pay imong giagian, ang Dios nagpakabana kanimo. Dili kinahanglan nga mahimong usa ka hamtong aron mobati sa Espiritu nga nagpamatuod nga ang tanan mahimong OK ra. Makaugmad ka og pagpamatuod bahin sa plano sa Langitnong Amahan. Makahimo ka sa pagbati og kalinaw.
Paghulagway pinaagi ni Arthur Lin