Pagkamabination diha sa Programa sa Primary

Ni Marissa Widdison

Mga Magasin sa Simbahan

(Gibase sa usa ka tinuod nga istorya)

Si Paul ug ang iyang mga ginikanan naglakaw ngadto sa simbahan. Si Paul mibati og kahinam. Karon mao ang programa sa Primary! Ang tanang bata manganta og mga awit ug mopaambit og mga kasulatan atol sa pagsimba. Kini ang unang higayon ni Paul nga maapil sa programa.

Pag-abot nila sa simbahan, nakita ni Paul ang mga misyonaryo. Nagtudlo sila sa pamilya ni Paul mahitungod sa ebanghelyo.

“Andam na?” Si Sister Walker miingon.

Mitando si Paul. Siya nakakat-on og usa ka kasulatan. Mahitungod kini kon sa unsang paagi nga si Jesus mihangyo kanato sa paghigugma sa tanan. Si Paul andam na nga mopaambit niini!

Silang tanan misulod ug milingkod. Sa wala madugay ang bishop mihangyo sa mga bata nga moadto sa atubangan sa chapel. Mibarog si Paul uban sa iyang bag-ong mga higala. Mipahiyom siya og dako. Nakita niya ang iyang mama ug papa nga nagpahiyom usab. Dayon misugod ang musika.

“Kon ang Manluluwas nagbarog tupad nako, buhaton ba nako ang mga butang nga akong gibuhat?” Si Paul naninguha sa pagkanta og klaro sa matag pulong. Naghunahuna siya nga naminaw si Jesus.

Sa tunga-tunga sa kanta, si Paul nakakita og usa ka tawo nga miabli sa pultahan sa luyo sa chapel. Usa ka batang lalaki nga ginganlan og Mark ang misulod. Kauban niya ang iyang pamilya. Si Mark mitan-aw sa laing mga bata nga nanganta. Ingon og naguol siya.

Basin naguol siya kay ulahi siya nga miabot, naghunahuna si Paul. Si Mark hinay nga naglakaw paingon sa atubangan.

Nahinumdoman ni Paul sa dihang miadto siya sa Primary sa unang higayon. Nalipay siya nga ang ubang mga tawo milingkod tupad niya ug mga buotan.

Gusto ni Paul nga motabang ni Mark. Mikaway siya ni Mark nga moduol niya. “Dali na diri!” Gihinay og litok ni Paul ang mga pulong.

Paspas nga milakaw si Mark ngadto sa atubangan. Si Paul migahin og luna alang ni Mark.

Gigakos niya si Mark. “Salamat sa pag-anhi,” mihunghong si Paul.

Mipahiyom og dako si Mark ngadto ni Paul.

Sa wala madugay nahuman ang kanta. Si Paul ug si Mark dungan nga nanglingkod. Si Paul nalipay nga nakatabang siya sa usa ka higala nga mobati nga gihigugma ug giabi-abi.