Ang Leksyon bahin sa Uhong
Ang tagsulat nagpuyo sa Bavaria, Germany.
Misaad si Annie ug ang uban pa nga maminaw gayod og maayo.
“Pinaagi sa gahum sa Espiritu Santo kamo mahimo nga masay[o]d sa kamatuoran sa tanan nga mga butang” (Moroni 10:5).
Naghinam-hinam kaayo si Annie. Si mama gustong manguha og ihalas nga mga uhong uban sa iyang higala, si Miss Maria. Ug siya miingon nga si Annie mahimo usab nga mokuyog! Ang iyang tulo usab ka igsoon nga igo na ang pangidaron.
“OK,” miingon si Mama sa wala pa sila mobiya. “Tugotan mo nako nga mokuyog tungod kay nahibalo ko nga kamo maminaw gayod og maayo. Importante kaayo kana samtang mangita kita og mga uhong. Ang ubang ihalas nga mga uhong lami kaayo. Apan ang ubang mga uhong makahilo. Mahimong magkasakit kamo niini. Busa makasaad ba mong tanan sa pagbuhat unsa gayod ang isulti ni Miss Maria?”
“Oo!” Misinggit si Annie ug ang iyang mga igsoon. Sila si Annie, Autumn, Gideon, ug Adelaide mikuha sa ilang mga basket ug nanglakaw ngadto sa lasang aron mahimamat si Miss Maria.
Si Miss Maria eksperto bahin sa mga uhong. Gitudloan siya unsaon sa pagpangita og luwas kaonon nga mga uhong didto sa Lasang sa Bavaria sa Germany.
“Hoy, mga bata!” Miingon si Miss Maria. “Kinsa ang andam sa pagpangita og mga uhong?”
Si Annie ug ang iyang mga igsoon naninggit. “Ako! Ako!”
“Maayo kaayo!” Miingon si Miss Maria. “Karon hinumdomi, mahimo lamang kamong mohikap o manguha og mga uhong kon ako moingon nga luwas kining kaonon.”
Si Annie ug ang uban misaad na usab nga maminaw og maayo. Dayon misunod sila ni Miss Maria ngadto sa lasang.
Ang adlaw hayag kaayo samtang naglakaw sila latas sa yuta nga natabonan sa mga lumot. Adunay mga uhong bisan asa! Adunay orange, puti, pula, ug brown nga mga uhong. Ang uban dagko. Ang uban gagmay.
Ang mga paborito ni Annie mao ang pula nga mga uhong nga adunay puti nga tuldok-tuldok. Kini nagpahinumdom kaniya sa mga fairytale. Apan naminaw siya kon moingon si Miss Maria nga dili mohikap niini. Kadto nga mga uhong maanindot apan makahilo gayod!
Si Miss Maria mainampingong migiya kanila. Si Annie ug ang iyang mga igsoon naminaw gayod og maayo, sama sa ilang gisaad.
Sila usab mitabang sa ubang mga paagi. Si Autumn mikuha og mga litrato sa mga uhong. Kon si Miss Maria makakita og mga uhong nga luwas kaonon, si Gideon mainampingong moputol sa mga punoan. Dayon si Annie ug si Adelaide ang modala niini diha sa mga basket.
Sa kataposan oras na sa pagpauli. Si Miss Maria mipahinumdom kanila nga manghugas sa ilang mga kamot gamit ang sabon ug tubig inig-abot dayon nila.
“Salamat sa pagpakita kanamo sa lasang ug sa pagtabang namo sa mga uhong,” miingon si Annie.
Mipahiyom si Miss Maria. “Salamat sa inyong pagpaminaw og maayo!”
Alang sa panihapon nianang gabhiona, nagluto si Papa og mga patatas, sausage, ug mga itlog uban sa usa ka hilabihan ka espesyal nga sagol. Mga uhong!
“Kalami,” miingon si Annie samtang mihungit na usab siya. “Lami kaayo kini!”
“Maayo gani kay si Miss Maria nahibalo kon hain sa mga uhong ang luwas kaonon,” miingon si Mama.
“Ug maayo gani kay naminaw kami sa unsay gisulti ni Miss Maria!” miingon sa Autumn.
Naghunahuna si Annie sa makadiyot. “Mora ba kana og sama sa paagi nga kita kinahanglang maminaw sa Espiritu Santo?” Si Annie nangandam na nga mabunyagan ug makompirmahan. Siya nakat-on mahitungod kon unsay gipasabot sa pagbaton sa gasa sa Espiritu Santo.
Mitando si Mama. “Oo! Ang Espiritu Santo makatabang kanato nga masayod unsa ang husto ug maayo. Sama sa paagi sa pagtabang ni Miss Maria kanato nga masayod kon hain sa mga uhong ang maayong kaonon.”
“Busa importante nga maminaw og maayo sa Espiritu Santo,” miingon si Papa.
“Sakto,” mitubag si Mama.
“Nalipay ko nga ang Espiritu Santo makatabang kanato nga magpabiling luwas,” miingon si Annie. Ug tungod niana, siya mipahiyom ug mikaon og dako sa lamian nga mga uhong.
Paghulagway pinaagi ni Simini Blocker