Mga Pioneer sa Matag Yuta
Kim Ho Jik
Unang Miyembro sa Simbahan gikan sa Korea
Ang Dios midala kaniya didto alang sa usa ka espesyal nga rason.
Si Kim Ho Jik miginhawa og lawom. Mao kini ang iyang unang adlaw sa pag-eskwela ug pagtudlo sa usa ka unibersidad sa Estados Unidos.
Ang pagkat-on importante alang ni Ho Jik. Gusto siya nga makakat-on kutob sa iyang mahimo mahitungod sa nutrisyon. Unya mahimo niyang mas mapanindot ang kinabuhi sa mga tawo sa South Korea, diin siya nagagikan.
Si Ho Jik nagdala og kinahon nga mga libro pasaka sa iyang bag-ong opisina.
“Hello,” miingon ang usa ka tawo sa tupad nga opisina. “Ako si Oliver. Nag-eskwela usab ko dinhi.”
“Nalipay ko nga makaila ka,” miingon si Ho Jik.
Milabay ang pipila ka semana. Si Ho Jik ug si Oliver nagkahigalaay. Nag-istorya sila mahitungod sa unsay ilang nakat-onan. Si Ho Jik nakabantay nga si Oliver dili gayod moinom o manigarilyo. Dili usab siya motrabaho ma-Dominggo. Ngano kaha, naghunahuna si Ho Jik.
Usa ka adlaw si Oliver mihatag ni Ho Jik og usa ka libro. Mahitungod kini sa mga Artikulo sa Hugot nga Pagtuo. “Kini nga libro naghisgot mahitungod sa unsay akong gituohan,” miingon si Oliver. “Pahibaloa ko kon gusto kang makakat-on pa og dugang.”
Nahuman ni Ho Jik ang libro wala pay usa ka semana. Si Oliver mihatag kaniya og laing libro nga gitawag og Basahon ni Mormon. Si Ho Jik mibasa usab dayon niini. Nagsugod siya sa pag-adto sa simbahan uban ni Oliver. Apan dili siya sigurado kon ganahan ba siyang magpabunyag.
Wala madugay miabot ang kataposang adlaw ni Oliver sa unibersidad. Si Ho Jik nakakita kaniya diha sa pasilyo. “Ako nagtuo nga ang Dios midala nimo dinhi alang sa usa ka espesyal nga rason,” miingon si Oliver. “Apan dili lamang aron imong matudloan ang imong katawhan mahitungod sa nutrisyon. Kinahanglan usab nimo silang tudloan mahitungod sa ebanghelyo.”
Naghunahuna si Ho Jik mahitungod sa gisulti ni Oliver sa taas nga panahon. Sa kataposan nakahukom siya nga magpabunyag. Nabunyagan siya sa samang suba diin si Joseph Smith gibunyagan 122 ka tuig na ang milabay!
Sa dihang nahuman na og eskwela si Ho Jik, mipauli siya sa South Korea. Naghinamhinam siya nga mopaambit sa ebanghelyo ngadto sa iyang pamilya. Daghan pa siya og natudloan mahitungod sa Ang Simbahan ni Jesukristo sa mga Santos sa Ulahing mga Adlaw.
Si Ho Jik nahimong usa ka lider. Siya nakaangkon og importante nga mga trabaho sa edukasyon ug sa gobyerno. Mitabang siya sa mga tawo sa iyang nasod nga makabaton og mas sustansiyadong mga pagkaon. Nakahimo siya og kalainan sa ilang kinabuhi.
Apan si Ho Jik gusto nga mohimo og mas dako pa gayod nga kalainan. Ang mga misyonaryo wala tugoti sa pagtudlo didto sa Korea. Si Ho Jik gustong mousab niana. Nasayod siya nga kon siya mohangyo sa gobyerno nga tugotan ang mga misyonaryo sa pagtudlo didto, magkaproblema siya. Apan nasayod siya nga angay gayod kini. Andam siya nga mawala ang tanang butang aron lang madala ang ebanghelyo ngadto sa Korea.
Mihangyo si Ho Jik sa gobyerno nga tugotan ang mga misyonaryo sa pagtudlo didto sa South Korea. Ug ang gobyerno miingon og oo! Wala madugay miabot ang mga misyonaryo, ug mitabang si Ho Jik nila sa pagtudlo og mas daghan pa nga mga tawo.
Si Ho Jik nasayod nga sakto si Oliver. Siya gipadala ngadto niana nga unibersidad aron makat-onan niya ang mahitungod sa ebanghelyo. Mapasalamaton siya nga ang Dios mipanalangin kaniya sa ebanghelyo ug sa oportunidad sa pagpaambit niini.
Ang South Korea usa ka nasod nga anaa sa Silangang Asya.
Karon aduna nay kapin sa 88,000 ka miyembro sa Simbahan sa South Korea.
May templo usab sa kapital, sa Seoul.
Si Kim Ho Jik nahimong usa ka eksperto sa bili sa nutrisyon gikan sa mga soybean.
Ang mga anak ni Ho Jik mao ang pipila sa unang mga tawo nga nabunyagan sa Simbahan didto sa Korea.
Si Ho Jik mihubad sa Mga Artikulo sa Hugot nga Pagtuo sa Koreano nga pinulongan.
Mga paghulagway pinaagi ni Alyssa Tallent