Pagsulti sa Nindot nga mga Butang
Ang tagsulat nagpuyo sa Utah, USA.
Si Jonathan adunay bag-ong ideya nga gusto niyang sulayan.
“Ang malumong mga pulong … tam-is ug makaayo sa panglawas”(Mga Panultihon [Proverbio] 16:24).
Si Jonathan nanghupaw samtang naglakaw siya pauli gikan sa eskwelahan. Sa kasagaran nagpaabot siya sa kataposan sa semana. Apan bag-ohay lang adunay pagsige og sinungogay ug panaglalis sa iyang pamilya. Si Jonathan nanghinaot nga unta mas malingaw pa sila nga magkauban.
Nianang gabhiona, si Jonathan miluhod aron sa pag-ampo. “Langitnong Amahan, gusto kong motabang sa akong pamilya nga mas magkasinabot. Palihog tabangi ko nga makahunahuna og paagi sa pagtabang nilang tanan nga mobati nga gihigugma. Ug palihog tabangi sila nga mas magkasinabot. Sa ngalan ni Jesukristo, amen.”
Si Jonathan mibati nga mas malipayon sa dihang misaka siya sa higdaanan. Siya nasayod nga ang Langitnong Amahan motabang niya nga masayod kon unsay buhaton.
Human sa panihapon pagka-Dominggo, si Papa mihatag og mga buluhaton alang sa home evening. “Jonathan, ikaw ang responsable sa pagpahigayon [conducting],” miingon si Papa.
Si Jonathan mipahiyom. Ganahan siya og home evening. Usa kadto ka espesyal nga panahon diin silang tanan mogahin og panahon aron magkauban. Nakatabang kini kaniya nga mobati og kasuod sa matag sakop sa iyang pamilya.
Nakahatag kana ni Jonathan og ideya! Tingali adunay paagi nga mapadayon kanang epesyal nga pagbati sa tibuok semana.
Pagka-Lunes sa gabii, si Jonathan wala mahimutang sa iyang gilingkoran samtang naghulat siya nga sugdan ang home evening. Una ang iyang manghod nga lalaki, si Chris, ang mihatag sa pangbukas nga pag-ampo.
Si Jonathan mitindog. “Salamat sa nindot nga pag-ampo, Chris,” miingon siya. “Karon gusto kong mopaila og bag-ong butang. Gitawag kini og, ‘Pagsulti sa Nindot nga mga Butang.’”
“‘Pagsulti sa Nindot nga mga Butang?’” nangutana si Chris.
“Oo! Kon kinsay mopahigayon kinahanglang mosulti og nindot nga butang mahitungod sa tanan sa atong pamilya. Ug sila dili makalimot sa pagsulti og nindot nga butang mahitungod sa ilang kaugalingon! Ako ang nagpahigayon niini nga semana. Busa kinahanglan kong mosulti sa nindot nga mga butang.”
Mipahiyom si Jonathan kang Chris. “Chris, momata ka nga malipayon matag adlaw. Ikaw usa ka maayong ehemplo, ilabi na kon ako mobati og sobrang kakapoy.”
Mipahiyom si Chris. “Salamat!”
Ang kasingkasing ni Jonathan mibati og kainit. “Joanna, nagtrabaho gyod ka og maayo, apan wala gyod ko makadungog nga moreklamo ka. Ug kanunay ka nga mogahin og panahon alang nako.”
“Aww, gihigugma ko ikaw,” miingon si Joanna. Gihapohap niya ang buhok ni Jonathan ug gigakos siya og maayo.
Ang kasingkasing ni Jonathan mibati pa og dugang kainit. “Si Tag usa ka maayong tigpaminaw. Kon ako motawag kaniya sa kolehiyo, kanunay siyang mohatag nako og nindot nga tambag ug mosulti nako nga mopadayon lang. Ug sa wala pa moadto si Benson sa iyang misyon, mitabang siya nako nga higugmaon ang mga kasulatan. Gimingaw ko niya, apan maayo ang iyang gihimo sa pagtudlo sa mga tawo mahitungod sa Langitnong Amahan.”
Si Jonathan milingi ni Papa. “Pa, mitabang ka namo nga maglingaw-lingaw bisan unsay among gibuhat.”
Mikatawa si Papa. “Bisan kon nangabasa ug napuno kita sa lapok sa pagpaningkamot sa pagtanom sa atong tanaman sa ikaupat nga higayon?”
“Bisan kon kita nagbuhat niana!” Mikatawa si Jonathan. “Ug, Ma, naghimo ka og kinalamian nga mga pamahaw alang namo matag adlaw sa dili pa moeskwela. Mao kana ang nakatabang nako nga mobangon sa higdaanan inigka buntag!”
“Bitaw!” Gigakos ni Papa si Mama.
Si Mama mipahiyom ug mihalok sa iyang kamot nga morag gitayhop kini padulong ni Jonathan.
“Hoy, karon kinahanglan kang mosulti og maayo mahitungod sa imong kaugalingon, Jonathan!” Miingon si Chris.
Si Jonathan mipahiyom sa kalipay. “Sa tabang sa Langitnong Amahan, nakahunahuna ko sa ‘Pagsulti sa Nindot nga mga Butang.’ Kana nakapalipay nako!”
Ang tanan mipahiyom ni Jonathan. Ang “Pagsulti sa Nindot nga mga Butang” nakapalipay usab sa iyang pamilya.
Paghulagway pinaagi ni Garth Bruner