Matinabangong mga Kamot [Helping Hands] sa tibuok Kalibotan

Himamata si Eleanor gikan sa USA

Himamata ang mga bata sa Primary nga nagtabang sa uban, sama sa gibuhat ni Jesus.

Impormasyon mahitungod ni Eleanor

Edad: 7

Gikan sa: Florida, USA

Pinulongan: Iningles

Pamilya: Si Mama, Papa, duha ka magulang nga babaye ug duha ka magulang nga lalaki, idugang ang iyang iro, si Coco, ug ang iyang iring, si Sushi!

Mga tumong ug mga pangandoy: 1) Mobuhat og 100 ka nindot nga mga butang sa usa ka semana. 2) Mahimong usa ka tigbansay sa dolphin ug usa ka doktor.

Ang Matinabangong mga Kamot ni Eleanor

Human sa kusog nga bagyo sa Florida, USA, ang balay ni Eleanor naguba. Ang mga balay sa iyang mga silingan nangaguba usab. Busa si Eleanor ug ang iyang mga igsoon mihimo og ilang kaugalingon nga proyekto sa Matinabangong mga Kamot diha sa kasilinganan. Gidapit nila ang ilang mga higala nga mokuyog usab! Naghiusa sila sa pagtabang sa tigulang nga magtiayon nga mohawan sa dakong kahoy nga nagbabag sa ilang atubangan nga pultahan. Si Eleanor mitabang sa paghawan sa mga sanga ug mitabang sa pagbalhin sa mga piraso sa kahoy samtang giputol kini.

Ang mga higala sa kasilinganan nagtrabaho og pipila ka adlaw aron motabang sa paghawan sa mga basura ug mga sanga sa kahoy gikan sa kadalanan, mga agianan sa sakyanan, ug mga nataran. Sa dihang miabot ang daghan pa nga mga boluntaryo aron motabang human sa kusog nga bagyo, si Eleanor mihatag sa iyang kwarto aron sila adunay kapuy-an. Si Eleanor miingon, “Ako mosunod ni Jesus pinaagi sa pagtabang sa uban, ug ganahan ko nga motabang sa pagpanglimpyo human sa kusog nga bagyo. Mipanindot kini sa akong gibati. Gani mipahunong kini sa pagbati og kalisod tungod kay nalipay kaayo ko.”

Mga Paborito ni Eleanor

Dapit: Panimalay

Estorya mahitungod ni Jesus: Sa dihang natawo Siya sa Betlehem

Awit sa Primary: “Gihigugma Ako sa Langitnong Amahan” (Songbook sa mga Bata, 16–17)

Pagkaon: Kamote

Kolor: Hayag nga blue

Subject sa eskwelahan: Science