O Paionia i Atunuu Uma
Andrew Jenson
Tusitalafaasolopito mai Tenimaka
Ia Andrew, sa taua tala a tagata uma.
Sa aumai e Andrew se peni ma tatala lana api talaaga. O le asō, ua ou sau ai i le fale mai la‘u misiona, sa ia tusia ai.
Sa ataata o ia ma tilotilo atu i fafo o le faamalama o le nofoaafi. Sa ia faaaluina tausaga mulimuli e lua i Tenimaka, le atunuu sa ia fanau ai. O iina foi na papatiso ai lona aiga. Sa latou siitia atu i Iuta, ISA, a o talavou o ia. Ma e le o toe mamao ona ia faatasi atu lea ia i latou!
Sa susue e Andrew le itulau ma tusitusi pea. Sa fiafia o ia e tusitusi. Sa fiafia foi o ia e aoao e uiga i le talafaasolopito o le Ekalesia. Sa ia faitauina mea uma na ia mafaia e uiga ia Iosefa Samita. Sa ia taulotoina foi aso taua uma i le olaga o Iosefa Samita.
E lei leva ae i ai Andrew i le fale ma lona aiga. O aso uma lava sa ia fesoasoani ai ia i latou e galulue i le faatoaga. Sa ia suaina. Sa ia totoina. Ae sa manao o ia e faia nisi mea se tele. Sa manao o ia e faitau ma tusitusi ma malaga.
O lea na tatalo ai Andrew. Sa mafaufau tele o ia i mea e tatau ona ia faia. Ona oso a’e lea o sona manatu! Sa amata ona ia faaliliuina nisi o talafaasolopito a Iosefa Samita i le gagana Take.
Ma sa na o le amataga lena. Sa faaauau pea e Andrew ona tusitusi, faitau, ma faaliliu. Sa amata ona faigaluega o ia mo le Ekalesia o se tusitalafaasolopito. Sa alu o ia i nofoaga eseese i le Iunaite Setete. Sa ia aoina mai tala ma pepa taua.
I se tasi aso, sa talosagaina ai e taitai o le Ekalesia ia Andrew e fai se mea e sili atu ona manaia. Sa latou fai atu ia te ia e alu i atunuu eseese. O le a ia tusia ni tala e uiga i tagata o le Ekalesia sa ia feiloai i ai. Sa le mafai ona faatali Andrew!
Sa faatofa atu Andrew i lona aiga. Ma, faatasi ai ma lona tusifolau, sa alu ese atu Andrew! Sa malaga o ia i vaa. Sa malaga o ia i le nofoaafi. O nisi taimi sa malaga ai o ia i taavale solofanua po o solofanua po o kamela.
Po o fea lava sa alu i ai o ia, sa talanoa atu Andrew i tagata o le Ekalesia e uiga i o latou olaga. Sa ia talanoa atu ia i latou e uiga i lo latou faatuatua. Sa ia tusia i lalo a latou tala ina ia mafai e isi tagata ona faitau i ai. Ia Andrew, sa taua tala a tagata uma.
Ina ua foi mai Andrew i le fale mai lana malaga, sa ia tuuina tala i totonu o se tusi. Sa ia aoao atu i isi e uiga i le tusia o mea ma tausia i se nofoaga saogalemu.
Sa fiafia Andrew i le faia o le galuega sa ia fiafia i ai. Ae o nisi taimi sa ia mafaufau ai pe o ia faia moni se eseesega. Sa ia filifili loa e tatalo e uiga i ai.
“Tama Faalelagi, aisea ua le talosagaina ai a’u e fai nisi mea e sili atu ona taua?” Na oo mai se tali manino i le mafaufau o Andrew. Ua musuia oe e le Atua e fai le galuega ua e faia.
Sa ataata Andrew. Sa ia iloa o loo ia faia le mea na finagalo le Atua na te faia. Ma o le a ia le taofia!
Na sefeina e Andrew tala o le silia ma le 15,000 tagata. E mafai ona tatou mulimuli i lana faataitaiga e ala i le tusia i lalo o a tatou lava tala faaleaiga. E taua tala a tagata uma—e aofia ai ma oe!
Ua tusia e se tusitalafaasolopito ma sefe tala mo tagata e aoao e uiga i ai i se aso.
O le asō, e tasi le malumalu i Tenimaka.
Toeitiiti 17,000 le Au Paia Take na siitia atu i Iuta i le ogatotonu o le vaitau o le 1800, e pei ona sa faia e Andrew.
Na tusia e Andrew ni tusi se 27 ma le silia ma le 2,000 tusiga i nusipepa.
Ua toeitiiti atoa le tasi miliona o maila na malaga ai o ia (1.6 miliona km)!
Na auauna atu Andrew i nisi misiona se iva—i Tenimaka, i isi vaega o Europa, ma i le Iunaite Setete.