Uo Mamae i le Peraimeri

Saunia e Charlotte Larcabal

O Mekasini a le Ekalesia

(E faavae i se tala moni)

Sa sili atu le malie o le Peraimeri pe a fesoasoani Lizzie ia Abby.

“Ia fai oe ma faaaoao i e ua faatuatua” (1 Timoteo 4:12).

Sa masani ona mafaufau Lizzie o le tele o pese a le Peraimeri sa pe. Sa fiafia o ia i pese e uiga ia Iesu, ae sa ia lagona ua matua tele mo pese faitaga. E masani lava ona faanounou o ia ma memu upu.

Ae e le o toe i ai lena mea. O lea ua usuina e Lizzie pese uma i le fiafia na ia mafaia. Ua nofo sa‘o o ia i luga. Sa pese leotele o ia. Sa ia maua se taimi fiafia.

Ona o lea, ua nofo Abby i ona autafa.

I le amataga o le tausaga, sa faipaga ai Lizzie ma isi tamaiti i lana vasega ma se Aveolela fou. O le latou galuega o le fesoasoani i a latou uo mamae o le Aveolela ia lagona atili le toafimalie i le Peraimeri.

O Abby o le uo mamae Aveolela a Lizzie. La te nonofo faatasi i le Peraimeri. La te pepese faatasi. Soo se taimi lava e vaai ai le tasi i le isi i le lotu, la te talotalo pe feopoai i taimi uma.

Sa fiafia Lizzie e vaai ia Abby i Aso Sa uma. Ma sa ia iloa e fiafia Abby e vaai ia te ia. Sa vaai soo atu Abby ia te ia. A pese leotele Lizzie, e faapena foi Abby. Ina ua piilima Lizzie ma nofo ma le migao, sa faapena foi Abby. Sa manao ai Lizzie e avea ma se faataitaiga lelei i taimi uma.

Sa manao Lizzie ia Abby e fiafia i le Peraimeri. Sa manao o ia ia maua e Abby le fiafia ma lagona le alofaina. E mafai ona la aoao faatasi e uiga i le talalelei!

Sa saofafai faatasi Abby ma Lizzie, e pei lava o Aso Sa uma. Ae o le asō sa la saofafai ai i luga o le tulaga i le falesa faatasi ma isi tamaiti uma o le Peraimeri. O le polokalama a le Peraimeri.

Sa luelue e Abby ona vae ma ataata atu ia Lizzie.

“Toeitiiti lava oo i lou taimi,” na musumusu atu ai Lizzie. Sa tofu tamaiti taitasi o le Peraimeri ma se tautalaga i le latou polokalama. O tamaiti matutua, e pei o Lizzie, e faitauina ni vaega uumi. O tamaiti laiti, e pei o Abby, e taulotoina ni vaega pupuu. Sa fesoasoani Lizzie ia Abby e ao lana vaega.

“Tau lava o le manatua, ia leotele ma manino ia logona mai e tagata,” o le tala lea a Lizzie.

“E ta te o, a ea?” Sa fai atu ai Abby. Sa foliga popole o ia.

“Ae faafefea!” Na fai atu ai Lizzie. “O le a ou i ai i ou autafa. O le a lelei lau taumafaiga.”

Sa la tutu ma usu se pese faatasi ma tamaiti uma. Sa manatua e Lizzie sa masani ona ia le fiafia e auai i le polokalama a le Peraimeri. Ae faatasi ma Abby, sa matuai matlie lava!

Na sosoo ai ma le taimi o Abby e tautala ai. Sa savavali faatasi teineiti e toalua i le faaleotele leo. Sa fesoasoani Lizzie ia Abby e laa atu i luga o se tamai nofoa. Sa faamalō Abby. Sa foliga fefe o ia.

Sa faauouo mai e Lizzie ia Abby. Sa ia tuu atu sina oomi laitiiti i lona tauau ma musumusu atu, “I a‘u tatalo …”

Sa manavanava loloa Abby. “I a‘u tatalo, ou te ta‘u atu i le Tama Faalelagi le mea ou te faafetai ai.” O lona leo sa to’a ma manino.

Sa ataata Abby, uu le lima o Lizzie, ma oso ese mai le nofoa. Sa la saofafai i lalo a o laa atu isi tamaiti i le faaleotele leo.

“Matuai lelei tele oe, Abby!” Na fai atu ai Lizzie.

“Pe sa lava lo’u leotele ma le manino?” Sa fesili atu ai Abby.

“Matuai seki a!” Na fai atu ai Lizzie. “Ou te matea e mafai ona latou logona mai oe e tau lava i le laina pito i tua!”

Sa faamimigi ma le fiafia Abby ma faalagolago atu ia Lizzie. Sa la faalogologo a o faia tauloto a isi tamaiti i mea sa latou lotofaafetai ai.

“Ei, Lizzie?” Sa fai atu ai Abby. Sa ia toso ifo i lalo Lizzie e musumusu atu i lona taliga.

“Ou te faafetai mo oe!”

Sa ataata Lizzie. “Ou te faafetai foi mo oe!”