Ua Manatunatu Helamana
“Ua na o ni imeli. O le talafaasolopito lena o aiga?”
“O le a liliu atu loto o fanau i o latou tamā” (Mataupu Faavae ma Feagaiga 2:2).
Sa manatunatu Helamana e uiga i le tele o mea. Sa manatunatu o ia e uiga i le saienisi ma talafaasolopito. Ma sa ia manatunatu pe na faapeī mea i le taimi na pei ai o ia le matutua o ona matua matutua.
I se tasi aso sa ia kikiina ai se polo soka i se pa i fafo. Sa ia kikiina i tua ma luma, i tua ma luma.
Faamata o a ituaiga o taaloga na taaalo ai tamaiti i fafo i aso ua leva, sa ia mafaufau ai. Pe na taaalo soka foi ona matua matutua i le taimi o laiti?
Sa taofi e Helamana le polo i lona vae. Faatali … e mafai ona ia fesili atu ia i latou!
Sa ia tamoe atu i totonui le komepiuta ma alu i totonu i lana imeli. Na faia e Tina ma Tama mo ia. Sa ia faaaogaina e imeli ai i ona aiga sa nonofo mamao ese. Sa nofo o ia i lalo ma ta se imeli ia Tinamatua Barnes.
Ua manatunatu Helamana …
O le a le mea sa sili ona e fiafia e taalo ai i fafo a o avea oe ma se tamaitiiti? O a’u o le soka.
Alofa atu,
Helamana
Kiliki! Na ia auina atu lana fesili. Sa ia auina atu le fesili lava lea e tasi ia Tamamatua Barnes. Ona ia auina atu foi lea ia Tinamatua ma Tamamatua White.
O le aso na sosoo ai, na siaki ai e Helamana lana imeli. E lua ana meli fou! Sa ia kilikiina le meli muamua e tasi.
Talofa, Helamana!
O le mea e sili ona ou fiafia e taalo ai i fafo o pepe meataalo pepa. Matou te tautaua ma a‘u uo se palanikeke e fai ai se tamai fale. Sa ou fiafia foi e taaalo i siaki ma musa ma tietie i la‘u uila.
Alofa atu,
Tinamatua White
Sa sosoo ai ma lona faitauina o le imeli a Tamamatua White.
Talofa, Helamana,
A o avea a’u ma se tamaitiiti, sa leai ni a matou TV po o ni komepiuta. O lea sa matou taaalo soo ai i fafo. I le taumafanafana sa matou o ai e aau, ma i le taumalulu sa matou o ai e faasee i le aisa. Sa ou fiafia foi e taalo i le pu‘e le fu’a ma a‘u uo.
Alofa atu,
Tamamatua White
sa ataata Helamana. E ese le manaia o le aoao e uiga i ou matua matutua!
Na mavae atu aso, ma sa manatunatu pea Helamana. O taimi uma lava sa manatunatu ai o ia, na te fesili atu ai i ona matua matutua se fesili. Ma sa ia aoaoina ni mea se tele e uiga ia i latou!
Sa ia aoaoina o Tamamatua Barnes na ave ni vasega siva i le potusiva. Sa fiafia Tinamatua Barnes e tauloto upu ma fai ni apiteuteu. O Tinamatua White sa masani ona fefe e pese i luma o tagata. Ae mulimuli ane sa pese o ia i lona faauuga i le aoga maualuga. Sa aoao Tamamatua White i le auala e fai ai ni vaalele faataitai a o laitiiti o ia, ma sa fiafia pea o ia e fai.
Sa ata Helamana ina ua ia faitau e uiga i le pusi toeaina a Tinamatua White, o Tomi. Sa masani ona ia faaofuina o ia i ofu meataalo ma tulei solo o ia i totonu o lana taavale toso mo pepe meataalo.
“O le a lau mea o loo faitau, Helamana?” O le fesili lea a Tama.
“O se imeli mai ia Tinamatua White,” o le tala lea a Helamana. “Sa fesilisili ia te ia.”
Sa faaali atu e Helamana ia Tama ia imeli uma sa ia auina atu ma sa auina mai i ona matua matutua.
“E foliga mai ua e aoina mai ni tala maoae o talafaasolopito o aiga!” Na fai atu ai Tama. “Aisea tatou te le tuuina ai i latou i luga o le FamilySearch?”
Sa faapio e Helamana lona ulu. “Ua na o ni imeli. O le talafaasolopito lena o aiga?”
“Ae a!” Na fai atu ai Tama. “Soo se taimi lava e te aoao ai e uiga i lou aiga, o le talafaasolopito lena o aiga. O se manatu lelei le tausia o nei tala ina ia mafai ona tatou manatuaina i se taimi mulimuli ane. Lea. Se’i o’u faaali atu ia te oe.”
Sa fesoasoani Tama ia Helamana e alu i totonu o le FamilySearch.org ma ta i totonu mea uma na ta‘u atu e ona matua matutua ia te ia.
“O lea la ua sefeina tala ina ia mafai ona faitauina e lo tatou aiga i se taimi mulimuli ane. Pe le matagofie ea lena mea?” O le fesili lea a Tamā.
“Ioe!” Sa ataata Helamana. “Ma e tele isi au fesili ou te fia fesili ai.”
Ata na tusia e Gareth Conway