Tatou Valaaulia Tagata Uma
E nofo le tusitala i Iuta, ISA.
Sa manao Iaroma ia o mai lona aiga atoa i lona papatisoga.
“Ou te fia mau ma lo’u lava aiga, ua faaali mai e le Alii le ala ou te maua ai” (Tusipese a Tamaiti, 98).
Sa saofai Iaroma i le mutia i luma o le maraea lona nana. Ua toeititi oo i le taimi e amata ai le pati a le aiga!
Sa tilotilo a‘e o ia i luga i atavane lanumumu i autafa o le fale. “Tina, e faapefea ona e ta’u le igoa o Nana i le gagana faifaailoga?” na ia fesili ai. Sa tutuli le tinamatua o Iaroma. O nisi taimi latou te faataitaia ai le gagana faifaailoga e manatua ai o ia.
“Faapenei,” o le tala lea a Tina. Sa ia faia faalemu le igoa i ona lima. Sa faia foi e Iaroma ia faailoga i ona lima. Sa fiafia o ia e aoao e uiga i lona aiga.
“Ou te fia faata’ita’i!” Sa nofo ifo i lalo Kati le tausoga o Iaroma i o la talaane. Na toe fai e tina le igoa.
“O le masina a sau mo lo‘u papatisoga, e mafai ona tatou usuina se pese i le gagana fai faailoga?” O le fesili lea a Iaroma.
“Ae a, e mafai,” o le tala lea a Tina.
“O le a le papatisoga?” O le fesili lea a Kati.
O le toatele o le aiga o Iaroma e le o ni tagata o Le Ekalesia a Iesu Keriso o le Au Paia o Aso e Gata Ai. “O le papatisoina o se mea faapitoa i la‘u ekalesia,” o le tala lea a Iaroma. “O le taimi lea e te faia ai se folafolaga e mulimuli ia Iesu, ma e folafola mai o Ia e fesoasoani ia te oe.”
“Manaia,” o le tala lea a Kati.
“E te fia sau i lo’u papatisoga?” O le fesili lea a Iaroma.
“Ioe!” Sa ataata Kati. Ona liliu atu lea o Iaroma i lona tina.
“E mafai ona tatou fai atu i tausoga uma e o mai fo’i? Ma o‘u afineatamā/usoatina ma ganeatina/usoatamā?”
Sa luelue le ulu o Tina. “Ou te manatu o se manatu lelei tele lena.”
Sa talosagaina e Iaroma ma Tina le isi vaega uma o le aiga e o mai i le papatisoga. Sa le’i tele foi ni mea na iloa e afineatamā/usoatina ma ganeatina/usoatamā e uiga i le papatisoga. Ae sa latou iloaina o se aso faapitoa lea mo Iaroma. “O le a matou i ai iina!” sa latou fai mai ai.
Na mavae atu vaiaso. Mulimuli ane ua oo i le aso o le papatisoga o Iaroma! Ina ua savali atu Iaroma i totonu o le falesa, sa ataata tele o ia. Sa faatumulia laina uma i tagata o lona aiga!
Na fai muamua e le tama o Iaroma se lauga e uiga i le papatisoga ma le meaalofa o le Agaga Paia. Sa ia talanoa foi e uiga i le taua o aiga. “Ua matou matua fiafia lava mo le papatisoina o Iaroma i le asō. Ma ua matou fiafia lava i le faatasi mai o lo matou aiga ma i matou!” o lana tala lea. “O le a le mea e sili ona taua i le lalolagi?” na ia fesili ai. “O tagata, o tagata, o tagata.”
Sa ataata tagata uma. O se faaupuga Māori latou te fiafia uma i ai.
Ina ua uma le lauga a Tama, ona sosoo lea ma Iaroma ma Tina. Sa latou usuina se pese Peraimeri i le gagana fai faailoga. Sa lagona ai e Iaroma le latalata atu i lona nana.
Ona savavali atu lea o Iaroma ma Tama i totonu o le vai papatisoga. A o tu o ia i totonu o le vai, sa tilotilo a’e Iaroma i luga i lona aiga atoa. O tausoga, afineatamā/usoatina, ganeatina/usoatamā. Sa latou i ai uma iina!
Sa moeiini mata o Iaroma. Sa ia lagona le mafanafana ma le fiafia. Sa ia lagonaina e pei o loo tuu atu e sesi se opo lapoa lava ia te ia. Sa mafaufau o ia i lona nana. Sa mafaufau o ia i ona tuaa. Sa ia iloa sa latou mitamita foi ia te ia.
Sa sui Iaroma i ofu mago. Ona ia fusiina lea o tagata taitoatasi o lona aiga. Sa ia faafetai mo i latou uma. Ma sa faafetai o ia mo tagata o lona aiga i le lagi o le a ia feiloai i ai i se aso. Sa manao Iaroma e faia pea filifiliga lelei ina ia latou mitamita ai.
Ata na tusia e Oksana Grivina